ទឹកជំនន់ សម្លាប់មនុស្ស៣៤នាក់នៅតំបន់​កាស្មៀរ ខណៈប៉ាគីស្ថានជម្លៀសមនុស្ស២១ម៉ឺននាក់

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២៨ខែសីហា ភ្លៀងធ្លាក់ខ្លាំងបានបង្កជាទឹកជំនន់ភ្លាមៗ និងបំណាក់ដីនៅទូទាំងអាស៊ីខាងត្បូង ដោយបានសម្លាប់មនុស្សយ៉ាងហោចណាស់ ៣៤ នាក់នៅតំបន់កាស្មៀរដែលគ្រប់គ្រងដោយឥណ្ឌា និងជម្លៀសមនុស្សជាង២១ម៉ឺន នាក់នៅក្នុងប្រទេសប៉ាគីស្ថាន។

គ្រោះមហន្តរាយទាំងនោះរួមមាននៅ Jammu ក្នុងតំបន់កាស្មៀរ ដោយបំណាក់ដីបានវាយប្រហារផ្លូវធម្មយាត្រាហិណ្ឌូនៅ Katra ដោយបានសម្លាប់អ្នកធ្វើធម្មយាត្រាជិត១០០នាក់ និងជាច្រើននាក់ផ្សេងទៀតរងរបួស។ ចំណែកខេត្ត Punjab របស់ប្រទេសប៉ាគីស្ថានបានរងការវាយប្រហារយ៉ាងធ្ងន់ធ្ងរបំផុត ដោយទឹកទន្លេកហក់ឡើងបានបង្ខំឱ្យមានការជម្លៀសប្រជាជនយ៉ាងច្រើន និងភូមិជាច្រើនជន់លិចទឹក។

ទោះបីជាមានភាពតានតឹងផ្នែកនយោបាយក៏ដោយ ក៏ឥណ្ឌាបានចេញការព្រមានដ៏កម្រមួយដល់ប៉ាគីស្ថាន ជុំវិញការលិចលង់ឆ្លងព្រំដែនដ៏មានសក្តានុពល ដោយបញ្ជាក់ពីទំហំនៃវិបត្តិ និងតម្រូវការបន្ទាន់សម្រាប់កិច្ចសហប្រតិបត្តិការក្នុងតំបន់។

គួរបញ្ជាក់ថាចាប់តាំងពីចុងខែមិថុនាមក ទឹកជំនន់បានសម្លាប់មនុស្សជាង ៨០០ នាក់នៅក្នុងប្រទេសប៉ាគីស្ថាន ខណៈអ្នកវិទ្យាសាស្ត្រព្រមានថាការប្រែប្រួលអាកាសធាតុកំពុងជំរុញឱ្យរដូវមូសុងកាន់តែអាក្រក់៕

អត្ថបទ៖ ប៊ុន សុភាព