នេប៉ាល់ធ្លាក់ចូលទៅក្នុងភាពចលាចលកាន់តែខ្លាំង ខណៈអ្នកស្លាប់កើនដល់២២នាក់

យោងតាមការចេញផ្សាយរបស់កាសែត New York Times នៅថ្ងៃទី១០ខែកញ្ញា ទីក្រុង Kathmandu ប្រទេសនេប៉ាល់បានធ្លាក់ចូលទៅក្នុងភាពចលាចលកាន់តែខ្លាំងដោយអ្ន​កស្លាប់ក្នុងបាតុកម្មកើនដល់២២នាក់ ខណៈនាយករដ្ឋមន្រ្តីK.P. Sharma Oli លាលែងពីតំណែង។

នៅក្នុងបាតុកម្មដ៏ខ្លាំងក្លាក្រុមបាតុករបានដុតបំផ្លាញសភា តុលាការកំពូល ប៉ុស្តិ៍ប៉ូលិស។ លើសពីនេះក្រុមបាតុករបានសម្រុកចូលអគាររដ្ឋាភិបាល ដុតផ្ទះរបស់អតីតមេដឹកនាំមួយចំនួន បណ្ដាលឲ្យខូចខាតអាកាសយានដ្ឋាន និងសណ្ឋាគារ ខណៈមន្ត្រីមួយចំនួនត្រូវជម្លៀសចេញតាមឧទ្ធម្ភាគចក្រ។

ជាការឆ្លើយតបយោធានេប៉ាល់ត្រូវ​បាន​គេ​ដាក់​ពង្រាយ​ដើម្បី​ស្ដារ​សណ្តាប់ធ្នាប់ ឡោម​ព័ទ្ធ​បាតុករ និង​ដាក់​បម្រាម​គោចរ ។ ទ័ពបានឈានជើងចូលកាន់អំណាចយ៉ាងមានប្រសិទ្ធភាព បន្ទាប់ពីនាយករដ្ឋមន្រ្តីលាលែងពីតំណែង។

វិបត្តិនេះបង្កឡើងដោយការបិទខ្ទប់ប្រព័ន្ធផ្សព្វផ្សាយសង្គមសំខាន់ៗរបស់រដ្ឋាភិបាលកាលពីសប្តាហ៍មុនបន្ទាប់ពីក្រុមហ៊ុនទាំងនោះមិនព្រមអនុវត្តតាមច្បាប់ថ្មីរបស់រដ្ឋាភិបាលនេប៉ាល់។ លើសពីនេះ​យុវជន​នេប៉ាល់​បាន​ខកចិត្ត​នឹង​អំពើពុករលួយ វិសមភាព និង​ភាពអត់ការងារធ្វើដែលកើនឡើងនៅក្នុងប្រទេស។

គួរបញ្ជាក់ថាទោះបីជាមានការរីកចម្រើនក្នុងការកាត់បន្ថយភាពក្រីក្រក្នុងរយៈពេលបីទសវត្សរ៍ចុងក្រោយនេះក៏ដោយ ក៏ភាពអត់ការងារធ្វើ ជាពិសេសក្នុងចំណោមយុវជន នៅតែជាបញ្ហាប្រឈមដ៏ធ្ងន់ធ្ងររបស់ប្រទេសនេប៉ាល់។ អង្គការតម្លាភាពអន្តរជាតិ បន្តចាត់ចំណាត់ថ្នាក់ប្រទេសនេះ ក្នុងចំណោមប្រទេសដែលពុករលួយបំផុតនៅអាស៊ី ដែលបង្កឱ្យមានកំហឹងជាសាធារណៈ ៕

អត្ថបទ៖ ប៊ុន សុភាព