​​​អតីតរដ្ឋមន្ត្រីកសិកម្ម​ចិន ត្រូវកាត់ទោស​ប្រហារជីវិត​ តែ​ត្រូវព្យួរ២ឆ្នាំសិន ​ពី​បទ​ស៊ីសំណូក​​​ប្រាក់​ជិត​៤០លានដុល្លារ​

តុលាការប្រជាជននៃក្រុង​ Changchun ខេត្ត Jilin នៅភាគឦសាន​នៃ​​ប្រទេស​ចិន​ កាលពីថ្ងៃអាទិត្យ​ បាន​​កាត់​​ទោស​​​​​​​ប្រហារជីវិតដោយ​​ព្យួរ២ឆ្នាំ​សម្រាប់​​អតីតរដ្ឋមន្ត្រីកសិកម្ម​ និង​កិច្ច​ការ​ជន​បទ​​របស់ប្រទេសចិន ពីបទពុករលួយ ដែល​ទទួល​សំណូក​​​​​សរុប​​ជិត​​៤០​លានដុល្លារ​​​ក្នុង​ក្នុង​ការ​​ស៊ីសំណូក​​​​រយៈពេល​២ឆ្នាំ​​។ សេចក្តីថ្លែងការណ៍របស់តុលាការដែល​​ចេញ​ផ្សាយ​ដោយ​ទីភ្នាក់ងារ​​ព័ត៌មានបារាំង AFP​។

យោង​ការ​ចេញផ្សាយ​នោះ Tang Renjian បានទទួលយកសំណូកជាសាច់ប្រាក់ និងទ្រព្យសម្បត្តិសរុបជាង ២៦៨​ លានយ័ន (៣៨​លានដុល្លារ) ចន្លោះឆ្នាំ ២០០៧ និង ២០២៤។

តុលាការ​បាន​សម្រេច​ថា ការ​សូកប៉ាន់​នេះ «​បាន​បង្ក​ការ​ខាតបង់​យ៉ាង​ធ្ងន់ធ្ងរ​ដល់​ផលប្រយោជន៍​របស់​រដ្ឋ និង​ប្រជាជន ដូច្នេះ​ហើយ​បាន​ធានា​នូវ​ទោស​ស្លាប់​​​ជីវិត​​នេះ​»​។ សេចក្តីថ្លែងការណ៍​បានបន្ថែមថា លោក Tang បានសារភាពចំពោះឧក្រិដ្ឋកម្មរបស់គាត់ ហើយបានសម្តែងនូវវិប្បដិសារី​ផងដែរ។

ការ​កាត់ទោស​លោក Tang គឺ​ជា​ការ​លើក​ចុងក្រោយ​បំផុត​ក្នុង​យុទ្ធនាការ​ប្រឆាំង​អំពើ​ពុករលួយ​របស់​លោក​ប្រធានាធិបតី ស៊ី ជីនពីង (Xi Jinping)។ តាម​សេចក្តីរាយការណ៍ ចំណាត់​ការ​របស់​រដ្ឋបាល​របស់​ប្រធានាធិបតី ​ទទួល​បាន​ការ​សាទរ​ពីអ្នក​គាំទ្រ​​ ប៉ុន្តែ​អ្នក​ប្រឆាំង​វិញយល់ថា នេះ​ជា​វិធានការ​បោស​សម្អាត​​ក្រុម​​អ្នក​ប្រឆាំង​នឹង​​រូប​លោក​​ដ៏​មាន​ប្រសិទ្ធភាព​​​។

តាមសេចក្តីរាយការណ៍​របស់ China Daily លោក Tang ក៏ត្រូវបានដកហូតសិទ្ធិនយោបាយអស់មួយជីវិត ជាមួយនឹងការរឹបអូសទ្រព្យសម្បត្តិផ្ទាល់ខ្លួនរបស់គាត់ទាំងអស់។ ប្រាក់ចំណេញខុសច្បាប់ និងផលប្រយោជន៍ពាក់ព័ន្ធរបស់គាត់ត្រូវបានបញ្ជាឱ្យប្រគល់ទៅរតនាគាររដ្ឋ។ នេះបើយោងតាមសេចក្តីសម្រេចដែលធ្វើឡើងដោយតុលាការប្រជាជនកម្រិតមធ្យម Changchun ។

នៅក្នុងប្រទេសចិន ការកាត់ទោសស្លាប់​ដែលត្រូវបានព្យួរជាធម្មតាត្រូវបានកាត់ឱ្យជាប់ពន្ធនាគារអស់មួយជីវិត ប្រសិនបើឧក្រិដ្ឋជនមិនប្រព្រឹត្តិបទល្មើសថ្មីក្នុងអំឡុងពេលសាកល្បងរយៈពេលពីរឆ្នាំ។ ការកាត់ទោសអាចត្រូវបានកាត់បន្ថយបន្ថែមទៀតសម្រាប់អាកប្បកិរិយាល្អ។

តុលាការបាននិយាយថា ខ្លួនបានរកឃើញថា Tang ពីឆ្នាំ ២០០៧ដល់ឆ្នាំ ២០២៤ បានប្រើប្រាស់មុខតំណែងការងាររបស់គាត់ រួមទាំងអភិបាលខេត្ត Gansu និងរដ្ឋមន្ត្រីក្រសួងកសិកម្ម និងកិច្ចការជនបទ ដើម្បីស្វែងរកអត្ថប្រយោជន៍សម្រាប់បុគ្គល និងនាយកដ្ឋានមួយចំនួនក្នុងបញ្ហាផ្សេងៗ ដូចជាប្រតិបត្តិការអាជីវកម្ម កិច្ចសន្យាគម្រោង និងការកែសម្រួលការងារ។

លោក Tang គួរតែត្រូវបានកាត់ទោសពីបទសូកប៉ាន់ និងកាត់ទោសប្រហារជីវិត ពីព្រោះចំនួនប្រាក់សំណូករបស់គាត់មានចំនួនច្រើនណាស់ ដែលបណ្តាលឱ្យមានការខាតបង់យ៉ាងច្រើនដល់ប្រទេស និងប្រជាជន។

ទោះជាយ៉ាងណាក៏ដោយ តុលាការបានបន្ថែមថា វាបង្ហាញ​ពី​ភាព​ធូរស្រាល​វិញ​ ពេល​ដែល លោក​ Tang បានសារភាព ដោយស្ម័គ្រចិត្តរាយការណ៍ពីការសូកប៉ាន់ដល់ក្រុមអ្នកស៊ើបអង្កេត ហើយបានយល់ព្រមប្រគល់ប្រាក់ចំណេញខុស​ច្បាប់របស់គាត់។

លោក Tang អាយុ​ ៦៣ឆ្នាំ មានដើមកំណើតនៅទីក្រុង Chongqing បានចាប់ផ្តើមអាជីពរបស់គាត់នៅឆ្នាំ ១៩៨៣​ហើយ​បានចូលរួមជាមួយបក្សកុម្មុយនិស្តចិនក្នុងឆ្នាំ ១៩៩១ ។ គាត់ធ្វើការក្នុងវិស័យកសិកម្មរបស់មហាអំណាចចិន​អស់ជាច្រើនទសវត្សរ៍មកហើយ។

គាត់ត្រូវបានគេដាក់ឱ្យស្ថិតនៅក្រោមការស៊ើបអង្កេតសម្រាប់ការសង្ស័យថា បានរំលោភបំពានយ៉ាងធ្ងន់ធ្ងរលើវិន័យបក្ស និង​ច្បាប់ជាតិនៅក្នុងខែឧសភា ឆ្នាំ ២០២៤​។ ប្រាំមួយខែក្រោយមកគាត់ត្រូវបានបណ្តេញចេញពីបក្ស ហើយត្រូវបានដកចេញពីតំណែងសាធារណៈ៕​