តួ​លេខអ្នកស្លាប់​កើន​ដល់ ៣១នាក់ ក្រោយ​គ្រោះរញ្ជួយដីដ៏ខ្លាំងក្លានៅហ្វីលីពីន

គ្រោះរញ្ជួយដីដ៏ខ្លាំងក្លាមួយ បានវាយប្រហារភាគកណ្តាលប្រទេសហ្វីលីពីន កាលពី​​យប់​ថ្ងៃអង្គារ​ទី​៣០​ខែ​កញ្ញា​ឆ្នាំ​២០២៥ ដោយបានផ្ដួល​រលំផ្ទះ និងអគារនានាក្នុងខេត្ត Cebu និងបានសម្លាប់មនុស្សយ៉ាងហោចណាស់ ៣១​នាក់។

ចំណុចកណ្តាលរបស់ការរញ្ជួយដីកម្រិត ៦,៩​រ៉ិចទ័រ​នេះ​ស្ថិតនៅចម្ងាយប្រហែល ១៩ គីឡូម៉ែត្រភាគឦសាននៃទីក្រុង Bogo ដែលជាទីក្រុងឆ្នេរសមុទ្រមួយដែលមានអ្នកស្រុកចំនួន ៩០ ០០០​នាក់ ដែលយ៉ាងហោចណាស់មនុស្ស ១៤​នាក់ត្រូវបញ្ជាក់ថាបានបាត់បង់​ជីវិត។ ចំនួន​អ្នក​ស្លាប់​ទំនង​ជា​នឹង​កើន​ឡើង ខណៈ​ក្រុម​អ្នក​ជួយ​សង្គ្រោះ​ព្យាយាម​ទៅ​ដល់​ភូមិ​ភ្នំ​ដែល​រង​ការ​បាក់​ដី។

ចំណែក​​ឯនៅក្នុងទីក្រុង Medellin មនុស្ស ១២​នាក់បានស្លាប់នៅពេលដែលពិដាន និងជញ្ជាំងផ្ទះរបស់ពួកគេបានដួលរលំលើ ខណៈពេលដែលពួកគេកំពុងដេកលក់។ នៅទីក្រុង San Remigio មនុស្ស ៥​នាក់ផ្សេងទៀត រួមទាំងបុគ្គលិកឆ្មាំឆ្នេរសមុទ្រ ៣នាក់ អ្នកពន្លត់អគ្គិភ័យ និងកុមារម្នាក់ ត្រូវជញ្ជាំង​បាក់សង្កត់​ស្លាប់ ខណៈដែលពួកគេព្យាយាមរត់គេចពី​កន្លែង​ប្រកួតបាល់បោះមួយ​កន្លែង។

វិទ្យាស្ថាន Volcanology and Seismology ហ្វីលីពីន ដំបូង​ឡើយ​បានចេញការព្រមានអំពីរលកយក្សស៊ូណាមិសម្រាប់ទីក្រុង Cebu, Leyte និង Biliran ប៉ុន្តែក្រោយ​មក​បានដក​ការ​ព្រមាន​ចេញ​វិញ បន្ទាប់ពីមិនមាន​រលកខុស​ពី​ធម្មតាត្រូវបានកត់​សម្គាល់។

ការរញ្ជួយដីនេះ បានវាយប្រហារប៉ុន្មានថ្ងៃបន្ទាប់ពីព្យុះត្រូពិចបានសម្លាប់មនុស្សយ៉ាងតិច ២៧​នាក់នៅក្នុងតំបន់ដូចគ្នានេះ ដែល​បង្ក​​ឲ្យ​មានការបំផ្លិចបំផ្លាញ​រឹត​តែ​​ខ្លាំង។

ប្រទេសហ្វីលីពីនស្ថិតនៅលើតំបន់ប៉ាស៊ីហ្វិក «Ring of Fire» ដែលមានសកម្មភាពរញ្ជួយ​ដី និង​ការផ្ទុះភ្នំភ្លើង​ជា​ញឹកញាប់ ព្រម​ទាំង​​ខ្យល់​ព្យុះ និងព្យុះទីហ្វុងចំនួន២០​ជាមធ្យម​ជា​រៀងរាល់​​ឆ្នាំ៕

ដោយ៖ ឈាង

ចុចអាន៖ ឥណ្ឌូណេស៊ីនិងហ្វីលីពីន សុទ្ធតែកើតរញ្ជួយដីកម្រិតធ្ងន់ ទាញសញ្ញាព្រមានរលកយក្សស៊ូណាមិ