ក្រុមហ៊ុនឥណ្ឌាត្រូវផ្អាកផលិតកម្ម ក្រោយសេរ៉ូក្អក៤ប្រភេទ ជាប់ពាក់ព័ន្ធការស្លាប់កុមារច្រើននាក់  

មន្ត្រីសុខាភិបាលឥណ្ឌា បានបញ្ជាឲ្យក្រុមហ៊ុនផលិតថ្នាំសេរ៉ូក្អក បញ្ឈប់ការផលិតឱសថ បន្ទាប់ពីថ្នាំ ត្រូវបានផ្សារភ្ជាប់ទៅនឹងការស្លាប់របស់កុមារ នៅក្នុងប្រទេសហ្គាំប៊ី។

និយតករឥណ្ឌាបានរកឃើញថា ក្រុមហ៊ុនឱសថ Maiden Pharmaceuticals បានបំពានច្បាប់ក្នុងសកម្មភាពផលិត និងការធ្វើតេស្តរបស់ខ្លួន។ ផលិតកម្មទាំងអស់នៅក្រុមហ៊ុនដែលមានមូលដ្ឋានក្នុងទីក្រុងញូវដេលីមួយនេះ ត្រូវបានផ្អាក។

នេះ​គឺ​ដោយ​មើល​ឃើញ​ពី​ភាព​ធ្ងន់ធ្ងរ​នៃ​ការល្មើស ​ដែល​បាន​សង្កេត​ឃើញ​ក្នុង​អំឡុង​ពេល​នៃ​ការ​ស៊ើបអង្កេត និង​ហានិភ័យ​​របស់​វា ​ចំពោះ​គុណភាព សុវត្ថិភាព និង​ប្រសិទ្ធភាព​នៃ​ថ្នាំ​ដែល​ត្រូវ​បាន​ផលិត។

មុននេះ អង្គការសុខភាពពិភពលោក (WHO) បានចេញការព្រមានជាសកល ជុំវិញថ្នាំសេរ៉ូក្អករបស់ក្រុមហ៊ុន Maiden ចំនួន ៤ប្រភេទ ដែលពាក់ព័ន្ធនឹងការស្លាប់កុមារជិត ៧០ នាក់។

ថ្នាំសេរ៉ូទាំង៤ប្រភេទនោះរួមមាន Promethazine Oral Solution, Kofexmalin Baby Cough Syrup, Makoff Baby Cough Syrup និង Magrip N Cold Syrup។

បច្ចុប្បន្ន ការស៊ើបអង្កេតកំពុងដំណើរការនៅក្នុងប្រទេសឥណ្ឌា និងហ្គាំប៊ី។

ទោះបីជាយ៉ាងណាក៏ដោយ ភ្លាមៗនេះ ក្រុមហ៊ុន Maiden មិនបានឆ្លើយតបភ្លាមៗចំពោះសំណើសុំការអត្ថាធិប្បាយពី BBC នោះទេ៕

ប្រែសម្រួល៖ Vann Vann

ប្រភព៖ BBC

ចុចអាន៖ WHO ចេញការព្រមានចំពោះថ្នាំសេរ៉ូផ្តាសាយ ៤ប្រភេទ បន្ទាប់ពីកុមារ ៦៦នាក់ស្លាប់ (មានវីដេអូ)