គ្រូពេទ្យណែនាំថា បរិភោគ Hotpot ប៉ះពាល់សុខភាពខ្លាំង បើមិនធ្វើតាមក្បួនទាំងនេះទេ

ពេលវេលាជួបជុំគ្រួសារញាតិមិត្តបងប្អូន មិនអាចរំលងបានពីការបរិភោគអាហារជុំគ្នាឈុតធំឡើយ គ្រួសារខ្លះចូលចិត្តសាច់អាំង ស៊ុប ឬអាហារផ្សេងៗគ្នា អ្វីដែលពេញនិយមបំផុតនោះគឺឆ្នាំងភ្លើង គេនិយមហៅ Hotpot នោះឯង។

ស្របពេលដែលយើង រវល់តែឆ្ងាញ់និងសប្បាយដោយសារការជួបជុំ មនុស្សភាគច្រើនមិនសូវជាយកចិត្តទុកដាក់ប៉ុន្មានទេ លើផលប៉ះពាល់របស់ឆ្នាំងភ្លើងដ៏ឈ្ងុយឆ្ងាញ់ ជាពិសេសចំពោះអ្នកចូលចិត្តហុតទឹកស៊ុបតែម្ដង។

យោងទៅតាមវេជ្ជបណ្ឌិតនៅមន្ទីរពេទ្យ Mount Alvernia បានឲ្យដឹងថា ឆ្នាំងភ្លើងដែលយើងឧស្សាហ៍បរិភោគរាល់ដងនោះ ផ្ទុកសូដ្យូមខ្ពស់ហួសបរិមាណមិនគួរទទួលទាន បើតាមការណែនាំ​យើងអាចបរិភោគឆ្នាំងភ្លើងយ៉ាងច្រើនពីរដងប៉ុណ្ណោះក្នុងមួយខែ។ សូម្បីស៊ុបធ្វើពីផ្សិត បន្លែ ប៉េងប៉ោះ ដែលយើងគិតថាវាផ្ដល់នូវសុខភាពល្អ បែរជាមានកម្រិតសូដ្យូមខ្ពស់ជាងស៊ុបស៊ីឈ័នទៅទៀត។ ខាងក្រោមនេះជាក្បួនខ្លះៗសម្រាប់ញ៉ាំឆ្នាំងភ្លើងមិនឲ្យប៉ះពាល់សុខភាពដូចមុន៖

១. ជ្រើសរើសទឹកស៊ុបរសជាតិស្រាល និងព្យាយាមកុំហុតទឹកស៊ុបច្រើនពេក

២. ដាក់បន្លែស្រស់ចូលទៅក្នុងទឹកស៊ុបឲ្យច្រើនជាងពួកអាហារកែច្នៃ

៣. បរិភោគសាច់សុទ្ធ សាច់មាន់ស្រស់ សាច់ត្រី ឬតៅហ៊ូ ជាជាងសាច់ជាប់ខ្លាញ់

៤. ជៀសវាងញ៉ាំអាហារកែច្នៃដូចជា ប្រហិត ហតដក ព្រោះវាផ្ទុកសូដ្យូមច្រើនមែនទែន

៥. ជៀសវាងទទួលទានភេសជ្ជៈផ្អែមពេកអំឡុងពេលញ៉ាំឆ្នាំងភ្លើង

៦. ដាក់កម្រិតទឹកជ្រលក់ឲ្យសមល្មមកុំដិតពេក

៧. ត្រូវចម្អិតសាច់និងបន្លែឲ្យឆ្អិន ១០០ភាគរយ ការពារការពុលអាហារ

គ្រូពេទ្យនៅមន្ទីរពេទ្យ Mount Alvernia ណែនាំអ្នកចូលចិត្តទឹកស៊ុបដិតៗ សម្បូរខ្លាញ់សម្បូរសូដ្យូមឲ្យបរិភោគឆ្នាំងភ្លើងយ៉ាងច្រើនពីរដងក្នុងមួយខែជាកំហិត ដោយសារតែវាប៉ះពាល់ណាស់ចំពោះទម្ងន់ ធ្វើឲ្យលើសខ្លាញ់ លើសឈាម ខូចក្រលៀន មានជំងឺរ៉ាំរ៉ៃ និងជំងឺបេះដូង ដូច្នោះហើយអ្នកគួរបរិភោគវាឲ្យមានកម្រិតត្រឹមត្រូវទើបមានសុវត្ថិភាព៕

ប្រែសម្រួលដោយ៖ វារី

ចុចអាន៖អាហារបំប៉នភាពស៊ាំក្នុងរដូវភ្លៀង ៩ ប្រភេទ ងាយរកបានលើទីផ្សារ

ចុចអាន៖ អត់ញ៉ាំអាហារព្រឹក អាចស្លាប់ដោយសារជំងឺបេះដូង