ដឹងទេប្រទេស អាស៊ាន ណាខ្លះមានទាំងប្រធានាធិបតី និងនាយករដ្ឋមន្ត្រី ក្នុងពេលតែមួយ

គ្រប់ប្រទេសនៅលើពិភពលោកសុទ្ធតែមានមេដឹកនាំរៀងៗខ្លួន ដោយប្រទេសខ្លះមានប្រធានាធិបតីជាអ្នកដឹកនាំ ហើយផ្សេងទៀតគឺនាយករដ្ឋមន្ត្រីជាអ្នកបញ្ជាក្បាលម៉ាស៊ីនរដ្ឋាភិបាល ប៉ុន្តែក្នុងនោះក៏មានប្រទេសមួយចំនួនទៀតគឺមានទាំងប្រធានាធិបតី និងនាយករដ្ឋមន្ត្រីក្នុងពេលតែមួយតែម្ដង ។

ដោយឡែកសម្រាប់ប្រជាជាតិអាស៊ីអាគ្នេយ៍ (អាស៊ាន) ដែលមានសមាជិកចំនួន ១០ ប្រទេស ក្នុងនោះមានតែប្រទេស ៣ ប៉ុណ្ណោះដែលមានទាំងប្រធានាធិបតី និងនាយករដ្ឋមន្ត្រីក្នុងពេលតែមួយ  ហើយប្រទេសទាំងនោះមានដូចជា៖

វៀតណាម

ក្នុងពេលដំណាលគ្នានេះ វៀតណាមមានប្រធានាធិបតីគឺលោក Nguyen Xuan Phuc ឡើងកាន់អំណាចកាលពីថ្ងៃទី ៥ ខែមេសា ឆ្នាំ២០២១ ខណៈលោក Pham Minh Chinh ជានាយករដ្ឋមន្ត្រី ឡើងកាន់តំណែងនៅថ្ងៃខែឆ្នាំតែមួយជាមួយនឹងប្រធានាធិបតី ។

ឡាវ

មិនខុសពីវៀតណាម, ប្រទេសឡាវបច្ចុប្បន្នមានលោក Thongloun Sisoulith ជាប្រធានាធិបតី និងលោក Phankham Viphavanh ជានាយករដ្ឋមន្ត្រី ។ ទាំងលោក Sisoulith និងលោក Viphavanh សុទ្ធតែឡើងកាន់តំណែងនៅខែមីនា ឆ្នាំ២០២១ ដូចគ្នា ។

សិង្ហបុរី

បច្ចុប្បន្នលោកស្រី Halimah Yacob គឺជាប្រធានាធិបតីរបស់ប្រទេសិង្ហបុរី ។ លោកស្រីឡើងកាន់តំណែងកាលពីថ្ងៃទី១៤ ខែកញ្ញា ឆ្នាំ២០១៧ ។ ក្នុងពេលដំណាលគ្នានេះ សិង្ហបុរីក៏មាននាយករដ្ឋមន្ត្រីផងដែរគឺលោក Lee Hsien Loong កាន់តំណែងកាលពីថ្ងៃទី១២ ខែសីហា ឆ្នាំ២០០៤ ។

គួរបញ្ជាក់ថា ប្រទេសអាស៊ានដែលមានទាំងប្រធានាធិបតី និងនាយករដ្ឋមន្ត្រីទាំង ៣ នេះគឺមានការគ្រប់គ្រងអំណាចខុសៗគ្នា ពោលប្រទេសខ្លះប្រធានាធិបតីជាអ្នកមានសិទ្ធិអំណាចក្នុងសេចក្ដីសម្រេចអ្វីមួយ ខណៈប្រទេសផ្សេងទៀតសិទ្ធិក្ដោបក្ដាប់គឺស្ថិតក្នុងដៃនាយករដ្ឋមន្ត្រី ៕

ប្រែសម្រួលដោយ ៖ ជីវ័ន្ត

ប្រភព ៖ Wikipedia

ចុចអាន ៖ តម្លៃប្រេងសាំងខែថ្មីនៅ អាស៊ាន ខណៈ កម្ពុជា បន្តលក់ ៤,៧០០ រៀលក្នុងមួយលីត្រ