ស្បែកជើង ៥គូ រចនាឡើងសាមញ្ញ តែតម្លៃវិញវាល់លាន

ក្រៅពីតម្លៃកប់ពពករបស់ស្បែកជើងទាំង ៥គូនេះ អ្វីដែលគួរឲ្យភ្ញាក់ផ្អើលនោះគឺ ស្បែកជើងទាំងនេះ សុទ្ធតែជារបស់មនុស្សស្រីទាំងអស់។ គិតៗទៅពីមុនគេប្រើប្រាស់ស្បែកជើងសម្រាប់ការពារជើងតែមួយមុខទេ ដល់ពេលសម័យ​ឥលូវ ស្បែកជើង​ក្លាយជាវត្ថុសំខាន់​ក្នុងការលេងខ្លួនឲ្យទាន់សម័យទៅវិញ។ ដូចនេះ​ហើយ ​ទើបគេ​ធ្វើ​ស្បែក​ជើងថ្លៃៗពីវត្ថុល្អៗ កម្រៗ ហើយមាំឲ្យ​សក្ដិសម​នឹង​តម្លៃ​ ដូច​កំពូល​ស្បែកជើង​ខាង​ក្រោមនេះ៖

១. ស្បែកជើងផ្កាយ​ព្រះច័ន្ទ ធ្វើ​ដោយ ANTONIO VIETRI តម្លៃ ១៩,៩លានដុល្លារ

ខ្វះតែបន្តិចចូល ២០លានដុល្លារទៅហើយ ស្បែកជើង​កែងមួយគូនេះធ្វើឡើងពីមាសសុទ្ធ ពេជ្រ៣០ការ៉ាត់ និង​អាចម៍ផ្កាយ​ពីឆ្នាំ ១៥៧៦។ វាបង្ហាញខ្លួនលើកដំបូងនៅទីក្រុងឌូបៃ ក្នុងកម្មវិធី Mide Fashion Week។ លោក Antonio Vietri មាន​ភាពល្បីល្បាញក្នុងការរចនាស្បែកជើងមាស 24k ដំបូងបង្អស់របស់ពិភពលោកក្នុងឆ្នាំ២០១៧ ដែលមានតម្លៃ ៣២,០០០ ដុល្លារ ហើយ​ស្បែកជើង​របស់​គាត់ពីរគូនេះត្រូវដឹកឲ្យអ្នកទិញតាមឧទ្ធម្ភាគចក្រទាំងអស់។

២.  ស្បែក​ជើង​ពេជ្រ JADA DUBAI & PASSION JEWELERS តម្លៃ ១៧លានដុល្លារ

ស្បែកជើងកែងនេះ​បង្កប់​ពេជ្រ grade D ១៥ការ៉ាត់ មួយគ្រាប់ លម្អ​ថែម​ជាមួយពេជ្រតូចៗ ២៣៨គ្រាប់ជុំវិញស្បែកជើងមើលទៅសមជាស្បែកជើងថ្លៃបំផុតមែន។ អ្នកជំនាញ​ធ្វើស្បែក​ជើង​ចំណាយ​ពេល​ដល់​ទៅ ៩ខែសម្រាប់ធ្វើវាពីមាសសុទ្ធ ប៉ុន្តែ​មិន​ទាន់​ដឹង​ថា​លក់​ចេញឬនៅទេ។

៣. ស្បែក​ជើង​កែង DEBBIE WINGHAM តម្លៃ ១៥,១លានដុល្លារ

ស្បែកជើងកែងដ៏​ប្រណិត​នេះ​ធ្វើឡើងពីត្បូងកម្រៗនិងមានតម្លៃខ្ពស់បំផុតក្នុងផែនដីដូចជាពេជ្រខៀវនិងផ្កាឈូក។ តួស្បែក​ជើង​គេ​ធ្វើ​ពី​ផ្លាកទីន ចំណែកឯបន្ទះវាវិញគឺធ្វើពីមាសសុទ្ធ កន្លែងដែលនៅ​សល់​គេ​ធ្វើ​ពី​ស្បែក​ប៉ុន្តែ​លាប​មាស សូម្បីតែខ្សែអំបោះក៏ជាមាសដែរ។

៤. ស្បែកជើង HARRY WINSTON RUBY តម្លៃ ៣លានដុល្លារ

វាត្រូវគេផលិតយ៉ាងល្អិតល្អន់ដោយប្រើត្បូងក្រហម rubies ៤៦០០ តំណាងឱ្យកម្ពស់នៃភាពប្រណីត។ ក្រៅពីត្បូងទទឹម ១,៣៥០ការ៉ាត់ ស្បែកជើងដ៏ស្រស់ស្អាតនេះក៏មានពេជ្រ ៥០ការ៉ាត់ផងដែរ។

៥. ស្បែកជើងកែង STUART WEITZMAN តម្លៃ ៣លានដុល្លារ

តារាហូលីវូដជើងចាស់ Rita Hayworth ធ្លាប់ពាក់ស្បែកជើងនេះនាំឲ្យមានការកត់ត្រាប្រចាំប្រវត្តិសាស្ត្រហ្វេសិនទៀតផង។ បើយើងក្រឡេកមួយភ្លែតទៅ យើងនឹងឃើញថាវាមិនសូវស្អាតប៉ុន្មានទេ ប៉ុន្តែតម្លៃថ្លៃដោយសារតែត្បូងនិងពេជ្រនោះឯង។ ថ្វីត្បិតតែវាមានតម្លៃ ៣លានដុល្លារមែន តែស្បែកជើងមួយគូនេះមិនមែនសម្រាប់លក់ឡើយ គឺវាជាទ្រព្យសម្បត្តិរបស់ព្រះនាង Yasmin Aga Khan កូនស្រី Hayworth ។

តើ​ប្រិយមិត្តមានចាប់​អារម្មណ៍​ស្រលាញ់ស្បែក​ជើងមួយគូណាទេ? ទោះបីជា​វា​ថ្លៃ​មែន​ ប៉ុន្តែ​តម្លៃ​សក្ដិសម​នឹង​ការខិតខំប្រឹងប្រែង ជំនាញធ្វើ ជាពិសេសវត្ថុធាតុដើមនឹងតែម្ដង​សុទ្ធតែមាសពេជ្រទឹក​ល្អៗ៕

ប្រែសម្រួលដោយ៖ វារី

ចុចអាន៖១០ កន្លែងគ្រោះថ្នាក់បំផុតលើពិភពលោក ស្ទើរតែមិនមានអ្នកទៅដល់

ចុចអាន៖វត្ថុធាតុដើមចម្លែកៗ ៩ ប្រភេទ ប្រើសម្រាប់ផ្សំធ្វើជាទឹកអប់ ឲ្យម៉ាក់យីហោល្បីៗ