បុរស ប៉ូឡូញ ក្លាយជាមនុស្សដំបូងគេ ចុះពីភ្នំ Everest ដោយគ្មានអុកស៊ីសែន

លោក Andrzej Bargiel ជនជាតិប៉ូឡូញ បានក្លាយជាអ្នកដំបូងគេបង្អស់ ដែលជិះស្គីចុះពីលើភ្នំខ្ពស់បំផុតរបស់ពិភពលោក ដោយគ្មានបំពាក់អុកស៊ីសែនបន្ថែម។ លោកបានចុះពីលើជម្រាលភ្នំ Everest បន្ទាប់ពីឡើងដល់កំពូល ៨,៨៤៩ ម៉ែត្រ (២៩,០៣២ហ្វីត) កាលពីថ្ងៃចន្ទទី២២ ខែកញ្ញា ឆ្នាំ២០២៥។

បុរសជនជាតិប៉ូឡូញរូបនេះបាននិយាយនៅក្នុងវីដេអូដែលថតមុនពេលចុះមក ហើយបង្ហោះនៅលើ Instagram ផ្ទាល់ខ្លួន កាលពីព្រឹកថ្ងៃព្រហស្បតិ៍ថា «ខ្ញុំនៅលើកំពូលភ្នំខ្ពស់បំផុតនៅលើពិភពលោក ហើយខ្ញុំនឹងចុះដោយការជិះស្គី»។

លោក Chhang Dawa Sherpa ដែលរៀបចំបេសកកម្មចុងក្រោយបង្អស់បាន​ប្រាប់​ទីភ្នាក់ងារ​ព័ត៌មាន AFP ថា​ លោក Bargiel បានជិះស្គីចុះទៅកាន់ជំរុំទី២ ចំណាយពេលមួយយប់. បន្ទាប់មកបានទៅដល់ជំរុំមូលដ្ឋានលើជិះស្គីនៅថ្ងៃបន្ទាប់។ នេះ​ជា​ការ​ប្រឈម​ខ្លាំង​ណាស់ ហើយ​គ្មាន​នរណា​ម្នាក់​បាន​ធ្វើ​វា​ពី​មុន​ឡើយ​។

ជាងនេះទៅទៀត ការធ្លាក់ព្រិលខ្លាំងបានបង្ខំឲ្យ Bargiel ចំណាយពេល ១៦ ម៉ោងលើកម្ពស់ ៨,០០០ ម៉ែត្រ (២៦,២៥០ហ្វីត ដែលត្រូវបានគេស្គាល់ថាជាតំបន់មរណៈ ដោយសារតែខ្យល់ស្តើង និងកម្រិតអុកស៊ីសែនទាបបង្កើនហានិភ័យនៃជំងឺកម្ពស់។

ទោះបីជាបុរសរូបនេះប្រឈមនឹងគ្រោះថ្នាក់ក៏ដោយ ក៏រូបគេនៅតែអាចជម្នះឧបសគ្គបានដោយជោគជ័យ ខណៈដែលនាយករដ្ឋមន្ត្រីប៉ូឡូញ លោក Donald Tusk បានបង្ហោះនៅលើ X ថា ក្រុមរបស់លោក Bargiel បានបង្កើតប្រវត្តិសាស្ត្រ ហើយបានហៅវាថាជា ព្រឹត្តិការណ៍ដ៏សំខាន់មួយនៅក្នុងពិភពនៃការឡើងភ្នំជិះស្គី។

យ៉ាងណាក៏ដោយ អ្នកជិះស្គីមួយមួយចំនួនតូចដែលធ្លាប់ឡើងលើភ្នំ Everest គឺកម្រមានមនុស្សណាម្នាក់ដែលហ៊ានចុះចំណោតដោយមិនមានបំពាក់អុកស៊ីសែនបន្ថែមណាស់។ តែនៅនៅឆ្នាំ ២០០០ ជនជាតិស្លូវេនី លោក Davorin Karnicar បានចុះជិះស្គីជាលើកដំបូងពីកំពូលភ្នំ ទៅកាន់ជំរុំមូលដ្ឋានដោយប្រើអុកស៊ីសែនដប៕

អត្ថបទ៖ សាង ស្រីល័ក្ខ

ចុចអាន៖កូរ៉េខាងត្បូង​ អនុម័ត​ច្បាប់​ថ្មី ផ្ដល់សេរីភាពដល់អ្នកធ្វើ​សេវាកម្ម​ចាក់សាក់​មានសិទ្ធដូចគ្រូពេទ្យ