វិទ្យាស្ថានតេជោសែន សាធារណការ និងដឹកជញ្ជូន ប្រកាសផ្តល់អាហារូបករណ៍ ១០០% ដល់និស្សិតឆ្នើម៥០នាក់

វិទ្យាស្ថានតេជោសែន សាធារណការ និងដឹកជញ្ជូន នៃក្រសួងសាធារណការ និងដឹកជញ្ជូន បានប្រកាសជ្រើសរើសនិស្សិតសម្រាប់ឆ្នាំសិក្សា២០២៣-២០២៤ ចំនួន៣០០នាក់ និងផ្តល់អាហារូបករណ៍១០០% ដល់និស្សិត៥០នាក់ និង៥០% សម្រាប់និស្សិតនារីតាមលក្ខខណ្ឌរបស់វិទ្យាស្ថាន។ អាហារូបករណ៍នេះ មានរយៈពេល៤ឆ្នាំ និងស្ថិតក្រោមការវាយតម្លៃការសិក្សារបស់និស្សិតម្នាក់ៗ។ នេះបើតាមសេចក្តីប្រកាសរបស់វិទ្យាស្ថាន។

មុខជំនាញដែលវិទ្យាស្ថានតេជោសែន សាធារណការ និងដឹកជញ្ជូន ជ្រើសរើសសម្រាប់និស្សិត ៣០០នាក់ មានដូចជា៖

ក.ឯកទេសសំណង់សាធារណការ

• ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងសំណង់កំពង់ផែ
• ជំនាញប្រព័ន្ធចម្រោះទឹកកខ្វក់

ខ.ឯកទេសគ្រប់គ្រងការដឹកជញ្ជូន និងភស្តុភារកម្ម

• ជំនាញសេដ្ឋកិច្ច និងគ្រប់គ្រងការដឹកជញ្ជូនផ្លូវគោក
• ជំនាញគ្រប់គ្រងភស្តុភារកម្ម និងខ្សែច្រវាក់ផ្គត់ផ្គង់

គ.ឯកទេសនាវាចរណ៍

• ជំនាញបើកបរនាវា
• ជំនាញម៉ាស៊ីននាវា

ចំពោះជំនាញខាងលើ មានតម្លៃ ៦០០ដុល្លារក្នុងមួយឆ្នាំ។ សម្រាប់អត្ថប្រយោជន៍វិញ និស្សិត អាចចុះអនុវត្តផ្ទាល់នៅតាមការដ្ឋានសាងសង់ផ្លូវ ស្ពាន កំពង់ផែ សហគ្រាសជាតិ និងអន្តរជាតិដែលជាដៃគូសហការរបស់វិទ្យាស្ថាន។ បន្ថែមលើនេះ និស្សិតដែលមានសមត្ថភាព និងជំនាញច្បាស់លាស់ អាចប្រឡងចូលជាមន្ត្រីរាជការរបស់ក្រសួងសាធារណការ និងដឹកជញ្ជូន និងក្រសួងស្ថាប័ននានា។ និស្សិត ក៏មានឱកាសទទួលបានអាហារូបករណ៍បន្តការសិក្សានៅបរទេស និងឱកាសផ្លាស់ប្តូរការសិក្សាជាមួយដៃគូសហការរបស់វិទ្យាស្ថានថែមទៀត។

វិទ្យាស្ថានតេជោសែន សាធារណការ និងដឹកជញ្ជូន បានចាប់ផ្តើមបើក និងទទួលពាក្យ ប្រឡងជ្រើសរើសនិស្សិតជំនាន់ទី៤ ចាប់ពីថ្ងៃទី៣០ ខែវិច្ឆិកា ឆ្នាំ២០២៣តទៅ នៅការិយាល័យសិក្សា ជាន់ផ្ទាល់ដីនៃអាគារវិទ្យាស្ថាន និងឈប់ទទួលពាក្យនៅថ្ងៃទី០៨ ខែមករា ឆ្នាំ២០២៤ខាងមុខ៕