ព័ត៌មានជាតិ

អាជ្ញាធរស្រុកកោះអណ្តែត ហាមរថយន្តធុនធ្ងន់ឆ្លងកាត់ជាបណ្ដោះអាសន្ន ក្នុងភូមិសាស្ត្រមួយចំនួន ក្រោយទឹកហូរច្រោះ លិចផ្លូវ

បានផុស

៨ ខែ មុន

នៅ

ថ្ងៃព្រហស្បតិ៍ ១៦ តុលា ២០២៥

ដោយ

កាលពីព្រឹកថ្ងៃទី ១៦ ខែតុលា ឆ្នាំ ២០២៥ នេះ អាជ្ញាធរស្រុកកោះអណ្ដែត បានចេញសេចក្ដីជូនដំណឹងបន្ទាន់មួយដល់ប្រជាពលរដ្ឋក្នុងមូលដ្ឋាន និងសាធារណជនទូទៅ អំពីស្ថានភាពទឹកជំនន់ដែលកំពុងបន្តកើនឡើង និងបង្កផលប៉ះពាល់យ៉ាងធ្ងន់ធ្ងរដល់ហេដ្ឋារចនាសម្ព័ន្ធផ្លូវថ្នល់ក្នុងស្រុក ព្រមទាំងហាមរថយន្តធុនធ្ងន់ឆ្លងកាត់ជាបណ្ដោះអាសន្ន ក្នុងភូមិសាស្ត្រមួយចំនួន ក្រោយទឹកហូរច្រោះ និងលិចផ្លូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសេចក្ដីជូនដំណឹងរបស់រដ្ឋបាលស្រុក ស្ថានភាពកម្រិតទឹកជំនន់នៅតែកើនឡើងឥតឈប់ឈរ ដែលបណ្ដាលឱ្យកំណាត់ផ្លូវលំពីភូមិដើមដូង ឃុំក្រពុំឈូក ឆ្ពោះទៅកាន់ឃុំព្រៃយុថ្កា ត្រូវបានរងការហូរច្រោះយ៉ាងខ្លាំងក្លា និងបានលិចហូរកាត់ផ្លូវទាំងស្រុងត្រង់ចន្លោះស្ពានប៉ារ៉ាតង់។ ដូច្នេះ ដើម្បីធានាសុវត្ថិភាពដល់ការធ្វើចរាចរណ៍ និងដើម្បីការពារកុំឱ្យផ្លូវកាន់តែខូចខាតធ្ងន់ធ្ងរថែមទៀត រដ្ឋបាលស្រុកកោះអណ្ដែត សម្រេចផ្អាកការធ្វើចរាចរណ៍របស់រថយន្តដឹកធុនធ្ងន់ទាំងអស់ នៅលើកំណាត់ផ្លូវនេះជាបណ្ដោះអាសន្ន។

រដ្ឋបាលស្រុក ក៏បានអំពាវនាវដល់ប្រជាពលរដ្ឋទាំងអស់ដែលធ្វើដំណើរឆ្លងកាត់ផ្លូវខាងលើ ត្រូវបង្កើនការប្រុងប្រយ័ត្នខ្ពស់ជាទីបំផុតចំពោះមុខស្ថានភាពលិចលង់ និងហូរច្រោះ នៃទឹកជំនន់នេះ។