អភិបាលរាជធានី ណែនាំមន្ត្រីខណ្ឌចំនួន៣ ខិតខំផ្សព្វផ្សាយផលបង្កជាជំនន់ទឹកភ្លៀង ដោយការបោះសំរាមចូលលូ ឬប្រឡាយ

លោក ឃួង ស្រេង អភិបាលរាជធានីភ្នំពេញ និងជាប្រធានគណៈកម្មាធិការគណបក្សប្រជាជនកម្ពុជា បានណែនាំឱ្យមន្ត្រីបក្សមូលដ្ឋានទាំងអស់ ខិតខំផ្សព្វផ្សាយឱ្យប្រជាពលរដ្ឋចូលរួមជាមួយអាជ្ញាធរ ស្វែងយល់ពីការទុកដាក់សំរាម ជៀសវាងការបោះចូលលូ ឬប្រឡាយ បង្កការលិចជាជំនន់ទឹកភ្លៀងតាមរយៈសកម្មភាពទាំងនេះ។

ការណែនាំបែបនេះ ធ្វើឡើងក្នុងពិធីសំណេះសំណាលជាមួយសមាជិកសមាជិកា គណៈកម្មាធិការគណបក្សសង្កាត់ចោមចៅទី១ និងសង្កាត់ចោមចៅទី២ ខណ្ឌពោធិសែនជ័យ នាព្រឹកថ្ងៃសៅរ៍ទី១៨ តុលានេះ នៅទីស្នាក់ការគណបក្សប្រជាជនកម្ពុជាខណ្ឌពោធិសែនជ័យ សំដៅធ្វើយ៉ាងណា កុំឱ្យមានជំនន់ទឹកភ្លៀងតាមរយៈការបោះសំរាមចូលលូ ឬប្រឡាយ ក្នុងភូមិសាស្ត្រទាំងនេះជាបន្តទៀត។

ទន្ទឹមនឹងការណែនាំខាងលើ លោក ឃួង ស្រេង បានណែនាំឱ្យមន្ត្រីគណបក្សមូលដ្ឋាន ត្រូវបន្តធ្វើការងារបម្រើសេវាសាធារណៈ និងផ្ដល់សេវាសាធារណៈ ឱ្យលឿនឱ្យល្អ ចូលរួមកសាងហេដ្ឋារចនាសម្ព័ន្ធប្រព័ន្ធប្រឡាយ លូ ផ្លូវ ភ្លើងជូនប្រជាពលរដ្ឋឱ្យបានល្អ។

លោកលើកឡើងដែរថា មន្ត្រីបក្សត្រូវតាមដានស្ដាប់ឱ្យបាននូវឧបាយកលរបស់គណបក្សដទៃ និងត្រូវធ្វើកិច្ចការគ្រប់បែបយ៉ាង ដើម្បីបម្រើប្រជាពលរដ្ឋឱ្យបានកាន់តែល្អ ឱ្យគាត់ពេញចិត្តពេញថ្លើមបន្តគាំទ្រគណបក្សប្រជាជនកម្ពុជាកាន់តែច្រើនឡើងថែមទៀត ហើយឈានទៅទទួលជ័យជំនះក្នុងការឈ្នះឆ្នោតនៅឆ្នាំ២០២៧ និងឆ្នាំ២០២៨ ខាងមុខនេះ បន្តទៀត។

លោក ឃួង ស្រេង បន្តថា ត្រូវបន្តរួមគ្នាធ្វើយ៉ាងណាឱ្យគណបក្សប្រជាជនកម្ពុជាដឹកនាំប្រទេសជាតិជារៀងរហូត និងសម្រេចបាននូវចក្ខុវិស័យ ក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសមានចំណូលខ្ពស់ នៅឆ្នាំ២០៥០ ដែលនេះជាបំណងប្រាថ្នាចង់បានរបស់ប្រជាពលរដ្ឋខ្មែរគ្រប់រូប ហើយក្នុងនាមជាមន្ត្រីនឹងទៅដល់ចំណុចនោះ ដោយមានសម្ដេចបវរធិបតី ហ៊ុន ម៉ាណែត ជានាយករដ្ឋមន្ត្រីរដ្ឋមន្ត្រី។

ដើម្បីបំពេញកាតព្វកិច្ចបម្រើរាស្ត្រឱ្យបានពេញលេញ ពិសេសទាក់ស្នើសុំបញ្ហាកង្វះខាតផ្សេងៗទៀត លោក ឃួង ស្រេង ប្រាប់មន្ត្រីបក្សមូលដ្ឋានទាំងអស់ អាចរាយការណ៍ស្នើសុំមករដ្ឋបាលខណ្ឌ និងរដ្ឋបាលរាជធានីភ្នំពេញភ្លាម តាមរយៈប្រព័ន្ធបច្ចេកវិទ្យា តេឡេក្រាមបាន ព្រោះវាលឿនកុំចាំបាច់ដល់មានវេទិកា ការសំណេះសំណាល ឬកិច្ចប្រជុំផ្សេងៗទើបស្នើសុំនោះ។

ជាមួយគ្នានោះ លោកឃួង ស្រេង ក៏បានថ្លែងនូវការអរគុណផងដែរចំពោះ មន្ត្រីគណបក្សខណ្ឌ សង្កាត់ ក្នុងខណ្ឌពោធិសែនជ័យដែលបានរួមចំណែក ធ្វើឱ្យគ្រប់នៃការបោះឆ្នោតទទួលជ័យជំនៈរហូតមក។

ក្នុងឱកាសនោះ ទាំងចៅសង្កាត់និងមេភូមិនីមួយៗ នៅសង្កាតើចោមចៅទី១ និងចោមចៅទី២ ក៏បានលើកឡើងពីសមិទ្ធផលរបស់បក្សដែលសម្រេចបាន ជាមួយនិងការលើកឡើងពីផែនការសកម្មភាពដែលបាននិងកំពុងអនុវត្តដូចជាការខិតខំកសាងសមាជិកបក្ស ការរក្សាសន្តិសុខសណ្តាប់ធ្នាប់ជូនប្រជាពលរដ្ឋ៕ ស្រីរ័ត្ន