ព័ត៌មានជាតិ
អភិបាលខេត្តកោះកុង ប្រាប់ដល់អភិបាលថ្មីស្រុកកោះកុង ប្រឹងប្រែងដោះស្រាយបញ្ហាវិវាទដីធ្លី
លោកស្រីអភិបាលខេត្តកោះកុង បានប្រាប់ដល់លោកអភិបាលថ្មីស្រុកកោះកុង ធ្វើយ៉ាងណាប្រឹងប្រែងសម្របសម្រួលដោះស្រាយបញ្ហាវិវាទដីធ្លីឱ្យបានល្អប្រសើរ ពិសេសនៅក្នុងមូលដ្ឋានឃុំជ្រោយប្រស់ ដែលមានវិវាទច្រើន។
វិវាទដីធ្លីតែងកើតមានក្នុងមូលដ្ឋាននីមួយៗ ដូច្នេះសូមលោកអភិបាលថ្មីស្រុកកោះកុងចាប់អារម្មណ៍យកចិត្តទុកដាក់ខ្ពស់សម្របសម្រួលដោះស្រាយឱ្យបានទាន់ពេលវេលា ចៀសវាងបញ្ហានេះបន្តនៅរ៉ាំរ៉ៃនាំពិបាកដោះស្រាយទៅអនាគត។ នេះជាការបញ្ជាក់របស់លោកស្រី ឈី វ៉ា អភិបាលខេត្តកោះកុង ថ្លែងក្នុងពិធីប្រកាសតែងតាំងលោក សុវណ្ណ ប៊ុនធឿន ជាអភិបាលថ្មីស្រុកកោះកុង ជំនួសលោក ជា សូវី អតីតអភិបាលស្រុក។
លោកស្រីអភិបាលខេត្ត បានរំលេចនៅថ្ងៃទី ២៣ ខែតុលា ទៀតថា ប្រជាពលរដ្ឋឃុំជ្រោយប្រស់ បានដាក់ពាក្យបណ្ដឹងជាច្រើនលើទំនាស់ដីធ្លី ពិសេសនៅតំបន់អភិវឌ្ឍន៍វិស្សមកាលក្រសួងការពារជាតិ។
លោកស្រីអភិបាលខេត្ត បានបញ្ជាដល់លោកអភិបាលស្រុកកោះកុង បង្កើនការតាមដានទប់ស្កាត់ការរុករានទន្ទ្រានដីធ្លីរដ្ឋខុសច្បាប់ធ្វើជាសិទ្ធិឯកជន។ ជាក់ស្តែងនៅឃុំតាតៃក្រោម ឃុំត្រពាំងរូង និងឃុំជ្រោយប្រស់។ បន្ថែមនោះ បន្តបែងចែកដីសម្បទានសង្គមកិច្ចជូនអតីតយុទ្ធជនឱ្យបានឆាប់រហ័ស តបនឹងគោលនយោបាយរបស់រាជរដ្ឋាភិបាលកម្ពុជា។
លោកស្រី ឈី វ៉ា ណែនាំដល់មន្ត្រីពាក់ព័ន្ធក្នុងស្រុក តាមដានពិនិត្យគ្រប់គ្រងស្ថានការណ៍ក្នុងមូលដ្ឋាន ចាំបាច់តាមដានក្ដោបក្ដាប់បានទាន់ពេលវេលា ជៀសវាងការផ្សព្វផ្សាយព័ត៌មានមិនពិតប្រាកដដែលនាំឱ្យចលាចលក្នុងសង្គម ដូចជាពាក់ព័ន្ធនឹងព្រឹត្តិការណ៍ជម្លោះបញ្ហាព្រំដែនរវាងកម្ពុជា និងថៃ ជាដើម។
លោក សុវណ្ណ ប៊ុនធឿន ដែលជាអភិបាលថ្មីស្រុកកោះកុង បានប្ដេជ្ញាចិត្តថា លោកនឹងប្រឹងប្រែងឱ្យអស់ពីកម្លាំងកាយចិត្ត និងបទពិសោធការងារមកបម្រើសេវាសាធារណៈជូនប្រជាពលរដ្ឋឱ្យបានឆាប់រហ័ស។ ការពារថែរក្សាសុខសន្តិភាពដែលកំពុងមានបច្ចុប្បន្នឱ្យបានល្អប្រសើរ និងបង្កើនការកសាងហេដ្ឋារចនាសម្ព័ន្ធក្នុងមូលដ្ឋានកាន់តែរីកចម្រើនបន្ថែមទៀត។
លោកអភិបាលស្រុកកោះកុង អះអាងថា នឹងគោរពតាមច្បាប់បទដ្ឋានគតិយុត្តិនានាដែលរាជរដ្ឋាភិបាលប្រគល់ជូននៅពេលនេះ។ ខិតខំសម្របសម្រួលទប់ស្កាត់ និងដោះស្រាយបញ្ហាទំនាស់ដីធ្លីមកទាបបំផុត។ ជាក់ស្តែងទុក្ខលំបាកផ្សេងៗ របស់ពលរដ្ឋ នឹងត្រូវដោះស្រាយបំពេញបន្ថែម។
ចំណែកឯ លោក ជា សូវី អតីតអភិបាលស្រុកកោះកុង ថ្លែងថា ក្នុងរយៈពេលអាណត្តិរបស់លោក លោកបម្រើសេវាសាធារណៈនៅច្រកចេញចូលតែមួយស្រុកជាង ១ ម៉ឺនច្បាប់ កសាងផ្លូវបេតុង ផ្លូវលំ និងលូរំដោះទឹកបានចំនួន ៨ គម្រោងធំៗ ស្មើនឹងប្រវែង ១ ម៉ឺន ៣ ពាន់ម៉ែត្រ។ ដោះស្រាយវិវាទក្រៅប្រព័ន្ធតុលាការបាន ១៦៤ ករណី។ ចុះបញ្ជីទោចក្រយានយន្ត ត្រីចក្រយានយន្ត បាន ១៩ ស្លាកលេខ។
ក្រៅពីនេះ លោក ជា សូវី បានបំពេញការងារស្នូលច្រើនទៀតទាំងផ្នែកសង្គមកិច្ច បរិស្ថាន និងទេសចរណ៍ ក្នុងន័យលើកកម្ពស់ជីវភាពសេដ្ឋកិច្ចក្នុងមូលដ្ឋាន ដោយធ្វើយ៉ាងណាសំដៅកាត់បន្ថយភាពក្រីក្រ និងការអភិវឌ្ឍឥតឈប់ឈរ។ ទោះយ៉ាងណាក៏មានចំណុចប្រឈមផងដែរ គឺស្រុកខ្វះខាតដីធ្វើទីលានចាក់សំរាម កង្វះទឹកស្អាតប្រើប្រាស់ និងការវាស់វែងដីធ្លីមានលក្ខណៈជាប្រព័ន្ធរួចរាល់ហើយ ប៉ុន្តែមិនទាន់ចេញបណ្ណកម្មសិទ្ធិ៕
អត្ថបទ ៖ សិរីវឌ្ឍនៈ
-
ព័ត៌មានអន្ដរជាតិ៣ ថ្ងៃ agoធ្លាក់យន្តហោះឯកជនមួយនៅអាមេរិក បណ្តាលឱ្យមនុស្សក្នុងយន្តហោះ ស្លាប់ទាំងអស់
-
កីឡា១ សប្តាហ៍ agoល្ងាចនេះ U19 កម្ពុជា ប៉ះ ថៃ វគ្គពាក់កណ្តាលផ្តាច់ព្រ័ត្រ ខណៈជួបគ្នាចុងក្រោយ ថៃ ខកចិត្តម្តងហើយ
-
ព័ត៌មានអន្ដរជាតិ៦ ថ្ងៃ agoឥណ្ឌា តវ៉ាយ៉ាងខ្លាំង ចំពោះអាមេរិកដែលវាយប្រហារនាវាដឹកប្រេងបណ្តាលនាវិកឥណ្ឌា ៣នាក់ស្លាប់
-
សន្តិសុខសង្គម២ ថ្ងៃ agoត្រួតពិនិត្យទីតាំងខុនដូ ១ កន្លែង រកឃើញជនជាតិវៀតណាម ៦ នាក់ ពាក់ព័ន្ធ Online Scams នៅខណ្ឌ ៧ មករា
-
អត្ថាធិប្បាយ១ សប្តាហ៍ agoវិចារណកថាចក្ខុវិស័យកែទម្រង់យោធាកម្ពុជា៖ ពីកម្លាំងបរិមាណ ឆ្ពោះទៅកងទ័ពជំនាញឌីជីថល និងមនសិកាការពារជាតិ
-
ព័ត៌មានអន្ដរជាតិ២ ថ្ងៃ agoយន្តហោះទម្លាក់គ្រាប់បែកនុយក្លេអ៊ែរ អាមេរិក B-52 ធ្លាក់នៅ កាលីហ្វ័រញ៉ា ស្លាប់សមាជិកអាកាសយានិក ៨នាក់
-
ព័ត៌មានជាតិ៤ ថ្ងៃ agoអាជ្ញាធរខណ្ឌទួលគោក បន្តចុះត្រួតពិនិត្យទីតាំងលក់គ្រឿងទេស ត្រី សាច់បង្កក៤ទីតាំងបន្ថែមទៀត
-
ព័ត៌មានអន្ដរជាតិ២ ថ្ងៃ agoទីបំផុត ថៃ ព្រមទៅ UN ដោយជ្រើសរើសអ្នកជំនាញ ២រូប ដើម្បីតតាំងជាមួយកម្ពុជា ក្រោមយន្តការ UNCLOS