ធនាគារជាតិប្រកាសឲ្យគ្រឹះស្ថានធនាគារ និងហិរញ្ញវត្ថុផ្អាកប្រតិបត្តិការបណ្តោះអាសន្ន ចំពោះសាខាឬការិយាល័យធនាគារស្ថិតក្នុងតំបន់បិទខ្ទប់

ធនាគារជាតិនៃកម្ពុជាបានប្រកាសឲ្យគ្រឹះស្ថានធនាគារនិងហិរញ្ញវត្ថុផ្អាកប្រតិបត្តិការជាបណ្តោះអាសន្នចំពោះសាខា ឬការិយាល័យស្ថិតក្នុងតំបន់បិទខ្ទប់ដែលប្រកាសជាផ្លូវការដោយរាជរដ្ឋាភិបាល ឬអាជ្ញាធរមូលដ្ឋាន ដើម្បីរួមសហការអនុវត្តវិធានការរបស់ក្រសួងសុខាភិបាល និងវិធានការបិទខ្ទប់តាមតំបន់ដែលមានការរីករាលដាលខ្លាំងនៃជំងឺកូវីដ១៩។

យោងតាមសេចក្ដីណែនាំ របស់ធនាគារជាតិនៃកម្ពុជា នៅថ្ងៃទី១២ ខែមេសានេះ បានណែនាំលោក លោកស្រីអគ្គនា​យក​ អគ្គនាយិការ នាយកនាយិកាគ្រប់គ្រឹះស្ថានធនាគារ និងហិរញ្ញវត្ថុទាំងអស់ ត្រូវជូនដំណឹងដល់សាធារណជនឲ្យបានច្បាស់លាស់ អំពីការផ្អាកប្រតិបត្តិការជាបណ្តោះអាសន្នចំពោះសាខា ឬការិយាល័យនោះ និងស្នើសុំអតិថិជនទៅទទួលសេវានៅសាខា ការិយាល័យដែលនៅជិតបំផុត ឬធ្វើប្រតិបត្តិការតាមរយៈប្រព័ន្ធអនឡាញរបស់គ្រឹះស្ថានធនាគារ និងហិរញ្ញវត្ថុនីមួយៗ។

ការជូនដំណឹងនេះ ត្រូវបិទផ្សាយនៅតាមសាខា ឬការិយាល័យដែលផ្អាកប្រតិបត្តិការ និងតាមរយៈមធ្យោបាយនានា ដូចជា បណ្ដាញទំនាក់ទំនងសង្គម និងគេហទំព័រផ្លូវការជាដើម ។

ទន្ទឹមនឹងនេះ គ្រឹះស្ថានធនាគារនិងហិរញ្ញវត្ថុ ត្រូវរក្សានូវប្រាក់បៀវត្សរ៍ និងអត្ថប្រយោជន៍នានា សម្រាប់បុគ្គលិកគ្រប់រូបដែលខកខានបំពេញការងារនៅសាខា ឬការិយាល័យ ដោយសារការអនុវត្តតាមវិធានការសុខាភិបាល ការធ្វើ​ចត្តាឡីស័ក និងវិធានការបិទខ្ទប់តំបន់៕

អត្ថបទ ៖ សំអឿន