ព័ត៌មានជាតិ

ពលរដ្ឋភូមិអូរអណ្ដូង ១ សង្កាត់ព្រែកប្រា ទទួលបានប្រព័ន្ធលូរំដោះទឹកថ្មី ក្រោយស្នើសុំជិត ២០ ឆ្នាំ

បានផុស

៧ ខែ មុន

នៅ

ថ្ងៃអង្គារ ១៨ វិច្ឆិកា ២០២៥

ដោយ

ពលរដ្ឋរស់នៅក្រុម ១ ភូមិអូរអណ្ដូង ១ សង្កាត់ព្រែកប្រា ខណ្ឌច្បារអំពៅ ដែលតែងតែធ្វើការស្នើសុំទៅអាជ្ញាធររាល់វេទិកាសាធារណៈឲ្យជួយដាក់ប្រព័ន្ធលូ និងផ្លូវចាក់បេតុងអស់រយៈពេលជិត ២០ ឆ្នាំ នោះ ឥឡូវជាលទ្ធផលបានប្រព័ន្ធលូ នៅសល់តែផ្លូវចាក់ក្រាលបេតុង ១ ខ្សែ ប៉ុណ្ណោះ ហើយសង្ឃឹមថា នឹងទទួលបានបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី ជា ថារ៉េត ជាពលរដ្ឋរស់នៅក្រុម ១ ភូមិអូរអណ្ដូង ១ បានឲ្យដឹងនៅថ្ងៃទី ១៨ វិច្ឆិកា នេះថា ចំពោះអ្នកស្រី ក៏ដូចជាពលរដ្ឋទាំងអស់ សប្បាយចិត្តណាស់ពេលអាជ្ញាធរបើកការដ្ឋានជីកដាក់ប្រព័ន្ធលូបង្ហូរទឹក ដែលពីមុនមកពុំមានទេ ជាហេតុធ្វើឲ្យលិចលង់ផ្លូវ ក៏ដូចជាលំនៅឋានរបស់ពលរដ្ឋប្រមាណជា ២០ ឆ្នាំ មកហើយ នារដូវវស្សា។

អ្នកស្រី បញ្ជាក់ថា ជារៀងរាល់វេទិកាសាធារណៈ ពលរដ្ឋតែងតែធ្វើការស្នើសុំទៅគណៈអធិបតីដែលដឹកនាំអង្គប្រជុំ ដោយទទូចស្នើសុំប្រព័ន្ធលូបង្ហូរទឹក ពិសេសផ្លូវចាក់ក្រាលបេតុង ខណៈតំបន់នេះពុំដែលមានផ្លូវចាក់ក្រាលបេតុងម្ដងណាឡើយ។

ដោយឡែក លោក ស្លៃម៉ាន់ អលវី អនុប្រធានភូមិអូរអណ្ដូង ១ បានបញ្ជាក់ថា តាមផែនការ គឺអាជ្ញាធរសម្រេចឲ្យជីកដាក់លូសិន ហើយប្រហែលឆ្នាំ ២០២៧ ទើបធ្វើផ្លូវចាក់ក្រាលបេតុង។

លោកអនុប្រធានភូមិ តំណាងពលរដ្ឋទាំងអស់ ក៏បានសំណូមពរដល់ថ្នាក់លើ សូមឲ្យជួយពន្លឿនសាងសង់ផ្លូវចាក់ក្រាលបេតុងនៅតំបន់ខាងលើឲ្យលឿន ដើម្បីពលរដ្ឋបានផ្លូវបេតុងប្រើប្រាស់ដូចគេគ្រប់ភូមិក្នុងមូលដ្ឋានសង្កាត់ព្រែកប្រា៕

អត្ថបទ ៖ នរា