យានយន្តរបស់ពលរដ្ឋ និងកងទ័ពកម្ពុជាជាង​៩០០​​គ្រឿង​ រួមទាំងសត្វពាហនៈត្រូវយោធាថៃបាញ់ឆេះ និងរាយបន្លាលួសដាក់ទូកុងទីន័រហ៊ុំព័ទ្ធយក

យានយន្តចំនួន៩០៥ គ្រឿងរបស់កងទ័ព និងប្រជាពលរដ្ឋកម្ពុជា នៅភូមិជោគជ័យ ភូមិព្រៃចាន់ បឹងត្រកួន ក្នុងភូមិសាស្ត្រខេត្តបន្ទាយមានជ័យ ត្រូវបានទាហានថៃបាញ់ឆេះខូច និងរាយបន្លាលួសដាក់ទូកុងតឺន័រហ៊ុំព័ទ្ធយកក្រោយបត់ឈប់បាញ់នៃសង្រ្គាមឈ្លានពានរបស់ថៃមកលើដែនអធិបតេយ្យកម្ពុជាពីថ្ងៃទី២៧ធ្នូឆ្នាំ ២០២៥កន្លងទៅ។

យោងតាមរបាយការណ៍របស់រដ្ឋបាលស្រុកអូរជ្រៅ និងស្រុកថ្មពួក ដែលជាស្រុកជាប់ព្រំដែនមានព្រំប្រទល់ជាមួយប្រទេសថៃ និងជាស្រុករងគ្រោះ និងរងផលប៉ះពាល់ខ្លាំងដោយសារសង្គ្រាមឈ្លានពានរបស់ថៃ យានយន្តសរុប៩០៥គ្រឿងរងការខូចខាត និងបាត់បង់រួមមាន រថយន្ត២០គ្រឿង ម៉ូតូ៦០គ្រឿង កង់៨១៥គ្រឿង ត្រាក់ទ័រ១គ្រឿង គោយន្តកន្រ្ទៃ៩គ្រឿង និងសត្វពាហៈនៈ៣៤៩ក្បាល់។

ក្នុងចំណោមយានយន្តទាំងអស់ ខ្លះត្រូវឆេះខ្ទេច និងខូចដោយសារគ្រាប់បាញ់ផ្លោងរបស់យោធាថៃ និងខ្លះទៀតត្រូវថៃដាក់បន្លាលួសដាក់ទូកុងតឺន័រហ៊ុំព័ទ្ធយកក្នុងចំណោមដីស្រែចម្ការហេដ្ឋារចនាសម្ព័ន្ធរូបវ័ន្ត(ផ្លូវថ្នល់ អគ្គីសន្នី ទឹកស្អាតបណ្តាញទំនាក់ទំនង់) និងលំនៅដ្ឋានជាង២ពាន់ខ្នងដែលពលរដ្ឋមិនអាចចូលទៅយកបាននៅភូមិជោគជ័យ ព្រៃចាន់ តំបន់បឹងត្រកួន។

លោក កែវ តារារស្មី អភិបាលស្រុកអូរជ្រៅបានអោយដឹងថា ចំពោះយានយន្តដែលរងការខូចខាតដោយសារគ្រាប់បាញ់ផ្លោងរបស់យោធាថៃ ភាគច្រើនជារបស់កងទ័ព ចំពោះពលរដ្ឋគឺមិនមានទេ តែត្រូវថៃហ៊ុំព័ទ្ធមិនអាចចូលយកបាន៕

អត្ថបទ៖ អ ពៅ