កម្ពុជាសុំបទពិសោធពីសិង្ហបុរីទាក់ទងនឹងការអនុវត្តច្បាប់កាតព្វកិច្ចយោធា

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានស្នើឱ្យមានការចែករំលែកបទពិសោធពីភាគីសិង្ហបុរី ពាក់ព័ន្ធនឹងការអនុវត្តកាតព្វកិច្ចយោធា ខណៈកម្ពុជា នឹងដាក់ឱ្យអនុវត្តច្បាប់ស្ដីពីកាតព្វកិច្ចយោធា ក្នុងពេលខាងមុខឆាប់ៗនេះ។

ក្នុងជំនួបទ្វេភាគីនៅកោះសេប៊ូ ប្រទេសហ្វីលីពីន ឯក្រៅកិច្ចប្រជុំកំពូលអាស៊ាន កាលពីរសៀលថ្ងៃទី៧ ខែឧសភា សម្ដេចធិបតី ហ៊ុន ម៉ាណែត បានប្រាប់នាយករដ្ឋមន្រ្តីសិង្ហបុរី លោក Lawrence Wong ថា កម្ពុជានឹងចាប់ផ្ដើមអនុវត្តច្បាប់កាតព្វកិច្ចយោធា ក្នុងឆ្នាំ២០២៦នេះ ហើយសម្ដេចសង្ឃឹមថា កម្ពុជានឹងទទួលបានការចែករំលែកបទពិសោធពីប្រទេសសិង្ហបុរីបន្ថែមទៀត ដើម្បីធានានូវភាពរលូនសម្រាប់ការអនុវត្ត។

យោងតាមខ្លឹមសារជំនួប ដែលបង្ហាញលើបណ្ដាញសង្គមផ្លូវការរបស់សម្ដេចនាយករដ្ឋមន្ត្រីកម្ពុជា គឺមិនបានបញ្ជាក់ពីការឆ្លើយតបពីភាគីសិង្ហបុរីនោះទេជុំវិញការលើកឡើងរបស់នាយករដ្ឋមន្ត្រីកម្ពុជាខាងលើ​។ ប៉ុន្តែ ក្នុងជំនួបនោះ លោកនាយករដ្ឋមន្ត្រី Lawrence Wong បានបញ្ជាក់ពីការប្ដេជ្ញាចិត្តរបស់សិង្ហបុរី​ ក្នុងការបន្តជំរុញសន្ទុះនូវទំនាក់ទំនងនិងកិច្ចសហប្រតិបត្តិការដ៏ជិតស្និទ្ធជាមួយកម្ពុជាឱ្យកាន់តែរឹងមាំបន្ថែមទៀត។

គួរកត់សម្គាល់ថា កម្ពុជានឹងត្រៀមអនុវត្តច្បាប់កាតព្វកិច្ចយោធាថ្មី ដោយបុរសអាយុចាប់ពី១៨ឆ្នាំ ដល់២៥ឆ្នាំ ត្រូវបំពេញកាតព្វកិច្ចរយៈពេល២៤ខែ ខណៈអ្នកគេចវេសចំពោះកាតព្វកិច្ចនេះ ច្បាប់បានកំណត់អាចប្រឈមទោសជាប់ពន្ធនាគាររហូតដល់៥ឆ្នាំ។ រីឯស្ត្រី មិនតម្រូវជាកាតព្វកិច្ចឡើយ តែត្រូវបានលើកទឹកចិត្តឱ្យចូលរួមតាមគោលការណ៍ស្ម័គ្រចិត្ត។​

ប៉ុន្តែច្បាប់ថ្មីនេះ មិនទាន់បានចូលជាធរមាននៅឡើយទេ គិតមកពេលនេះ ខណៈសេចក្ដីព្រាងច្បាប់កំពុងស្ថិតក្នុងសមត្ថកិច្ចរបស់សភា ដើម្បីសុំការអនុម័តពីសមាជិកសភាទាំងពីរថ្នាក់ គឺរដ្ឋសភា និងព្រឹទ្ធសភា មុនថ្វាយព្រះមហាក្សត្រឡាយព្រះហស្តលេខាប្រកាសឱ្យប្រើប្រាស់ជាផ្លូវការ។

ច្បាប់នេះ នឹងត្រូវបានប្រកាសជាការប្រញាប់ ដើម្បីជំនួសឱ្យច្បាប់ចាស់ស្ដីពីកាតព្វកិច្ចយោធា ដែលត្រូវបានប្រកាសឱ្យប្រើកាលពីឆ្នាំ២០០៦ ដែលច្បាប់ចាស់នោះ ពុំទាន់គ្របដណ្តប់គ្រប់ជ្រុងជ្រោយនៅឡើយ ដែលតម្រូវឱ្យមានការរៀបចំច្បាប់នេះជាថ្មី។ ការធ្វើបច្ចុប្បន្នភាពច្បាប់នេះគឺជាការចាំបាច់ដើម្បីពង្រឹងខឿនការពារជាតិ ការពារបូរណភាពទឹកដី និងបណ្តុះស្មារតីស្នេហាជាតិដល់យុវជនជំនាន់ក្រោយ។​

សម្ដេចធិបតី ​ហ៊ុន ម៉ាណែត បានចាត់ទុកថា ច្បាប់ស្ដីពីកាតព្វកិច្ចយោធា ជា​ផ្នែក​មួយ​នៃ​ការ​កសាង​កម្លាំង​ទ័ព​នៅ​កម្ពុជា​ ដែល​នឹង​ជួយឱ្យមាន​យោធិន​គ្រប់​គ្រាន់​សម្រាប់​បំពេញ​ការងារ និងជួយ​កសាង​កម្លាំង​ធនធាន​ ដែល​មាន​វិន័យ​ចូល​ក្នុង​សង្គម​ផងដែរ៕

ដោយ៖ ធឿន វ៉ាន់សុង