ព័ត៌មានជាតិ

ក្រុមវាយសីតំណាងនគបាលកម្ពុជា រំពឹងខ្ពស់ក្នុងការប្រជែងពានជាមួយបណ្ដាប្រទេសចូលរួម

បានផុស

២ ខែ មុន

នៅ

ថ្ងៃពុធ ២៧ ឧសភា ២០២៦

ដោយ

ក្រុមវាយសីតំណាងនគរបាលកម្ពុជា បានបង្ហាញនូវក្ដីរំពឹងខ្ពស់ក្នុងការប្រជែងយកពាន និងមេដាយជាមួយបណ្ដាប្រទេសចូលរួមដូចជាវៀតណាម ឡាវ ឥណ្ឌូណេស៊ី និងទីម័រលេស ដែលកំពុងដំណើរការប្រកួតចាប់ពីថ្ងៃនេះរហូតដល់ថ្ងៃទី៣០ ឧសភា ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិដ្ឋភាពសន្និសីទសារព័ត៌មាន

តំណាងក្រុមវាយសីនគរបាលកម្ពុជា លោក សរ សិទ្ធិ ជាធម្មតារាល់ការប្រកួតផ្សេងៗមិនថាក្រុមណានោះទេគឺតែងតែមានក្ដីរំពឹងចំពោះការដណ្ដើមជ័យជម្នះរៀងៗខ្លួន។ យ៉ាងណាមិញចំពោះក្រុមកម្ពុជា និងជាម្ចាស់ផ្ទះរៀបចំទៀតនោះគឺមានក្ដីរំពឹងខ្ពស់ក្នុងការប្រជែងយកពាននៃការប្រកួតវាយសីនគរបាលអាស៊ីអាគ្នេយ៍នៅឆ្នាំនេះផងដែរ។

ថ្នាក់ដឹកនាំកីឡារបស់ក្រសួងមហាផ្ទៃរូបនេះបន្ថែមទៀតថា ការឈ្នះ-ចាញ់ ឬលទ្ធផលយ៉ាងណានោះគឺរង់ចាំមើលការប្រកួតជាក់ស្ដែងសិន ព្រោះក្រុមផ្សេងៗរួមទាំងកម្ពុជាសុទ្ធតែបានហ្វឹកហាត់ត្រៀមខ្លួនជាមុន និងចម្រាញរកអ្នកដែលមានសមត្ថភាពលេចធ្លោដើម្បីចូលរួម។ ក្រុមកីឡាវាយសីនគរបាលកម្ពុជានឹងខំប្រឹងប្រែងឲ្យអស់សមត្ថភាពដើម្បីប្រជែងពានអន្តរជាតិប្រចាំតំបន់អាស៊ាននេះ។

ពានរង្វាន់ និងមេដាយ

បញ្ជាក់ដែរថា ព្រឹត្តិការណ៍ប្រកួតកីឡាវាយសីជ្រើសរើសជើងឯកនគរបាលអាស៊ីអាគ្នេយ៍ (Southeast Asia Police Badminton Championship) និងពានរង្វាន់ឯកឧត្តមអភិសន្តិបណ្ឌិត ស សុខា លើកទី២ នេះមានប្រទេសចូលរួមសរុប ៥ប្រទេសរួមទាំងកម្ពុជា។ ប្រទេសដែលបានមកចូលរួមនេះរួមមានវៀតណាម ឡាវ ឥណ្ឌូណេស៊ី ទីម័រលេស។ ការប្រកួតនេះចាប់ផ្ដើមពីថ្ងៃទី២៦ ដល់ ៣០ ខែឧសភា ឆ្នាំ២០២៦ នៅទីតាំងវាយសី នៃមជ្ឈមណ្ឌលអភិវឌ្ឍធនធានកីឡាជាតិកម្ពុជាក្នុងបរិវេណសាលាបឋមសិក្សាចៅពញាហុកស្ថិតក្នុងសង្កាត់បឹងកេងកង១ ខណ្ឌបឹងកេងកង រាជធានីភ្នំពេញ៕