ព័ត៌មានជាតិ

ការពិនិត្យបញ្ជីឈ្មោះ និងចុះឈ្មោះបោះឆ្នោតនឹងចាប់ផ្ដើមនៅខែតុលាខាងមុខ

បានផុស

២៣ វិនាទី មុន

នៅ

ថ្ងៃអាទិត្យ ១៤ មិថុនា ២០២៦

ដោយ

គណៈកម្មធិការជាតិរៀបចំការបោះឆ្នោត (គ ជ ប ) បានឱ្យដឹងថា ពលរដ្ឋដែលគ្រប់អាយុបោះឆ្នោតឆ្នាំ២០២៧ខាងមុខ អាចនឹងទៅចុះឈ្មោះបោះឆ្នោតនៅតាមឃុំសង្កាត់ដែលខ្លួនរស់នៅចាប់ពីថ្ងៃទី៧ ខែតុលា ដល់ថ្ងៃទី៣០ ខែវិច្ឆិកា ឆ្នាំ២០២៦ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្ដីប្រកាសព័ត៌មាន គ.ជ.ប បានអំពាវនាវដល់ប្រជាពលរដ្ឋខ្មែរដែលមានសិទ្ធិបោះឆ្នោតហើយមិនទាន់ចុះឈ្មោះពីមុន និងអ្នកដែលដល់អាយុបោះឆ្នោតនៅឆ្នាំក្រោយនេះសូមអញ្ជើញទៅចុះឈ្មោះបោះឆ្នោតនៅតាមឃុំសង្កាត់ដែលខ្លួនរស់នៅសូមអញ្ជើញទៅចុះឈ្មោះឱ្យបានគ្រប់គ្នា។

ក្នុងសេចក្ដីប្រកាសព័ត៌មាននោះបានបញ្ជាក់បន្ថែមផងដែរថា ប្រជាពលរដ្ឋខ្មែរដែលមានអាយុ១៨ឆ្នាំឡើងគិតដល់ថ្ងៃបោះឆ្នោត (គឺអ្នកដែលកើតមុនឬត្រឹមថ្ងៃទី៧ខែមិថុនាឆ្នាំ២០០៩) ឬប្រជាពលរដ្ឋខ្មែរដែលបានផ្លាស់លំនៅឋាន ឬទីសំណាក់ចូលក្នុងឃុំសង្កាត់ថ្មី រួមទាំងប្រជាពលរដ្ឋដែលមានឈ្មោះក្នុងបញ្ជីបោះឆ្នោតផ្លូវការឆ្នាំ២០២៥ហើយមានបំណងកែតម្រូវទិន្នន័យជីវប្រវត្តិ (ប្តូរការិយាល័យបោះឆ្នោតក្នុងឃុំសង្កាត់ឈ្មោះភេទថ្ងៃខែឆ្នាំកំណើតឬផ្លាស់ប្តូរឯកសារចុះឈ្មោះបោះឆ្នោត) ឬប្រជាពលរដ្ឋដែលបានចុះឈ្មោះបោះឆ្នោតក្នុងឆ្នាំ២០១៦ ឬឆ្នាំ២០១៧ ដែលមិនធ្លាប់ធ្វើបច្ចុប្បន្នភាពទិន្នន័យជីវមាត្រ (រូបថត និងស្នាមម្រាមដៃ)។ ដូចនេះ សូមអញ្ជើញទៅចុះឈ្មោះបោះឆ្នោត កែតម្រូវ ឬធ្វើបច្ចុប្បន្នភាពជាមួយក្រុមចុះឈ្មោះបោះឆ្នោតនៅតាមសាលាឃុំសង្កាត់ ឬនៅតាមភូមិមួយចំនួនក្នុងឃុំសង្កាត់ដែលបងប្អូនកំពុងរស់នៅតាមកាលបរិច្ឆេទដូចបានជម្រាបជូនខាងលើ។

គួរឱ្យដឹងផងដែរថាការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៦នឹងប្រព្រឹត្តទៅនៅថ្ងៃអាទិត្យទី៦ ខែមិថុនាឆ្នាំ២០២៧ នៅគ្រប់ឃុំ សង្កាត់ទាំង ១ ៦៥២ ទូទាំងប្រទេស។

បើតាមសេចក្ដីប្រកាសព័ត៌មានរបស់ គ ជ ប ចំនួនសមាជិកក្រុមប្រឹក្សា តាមឃុំសង្កាត់នីមួយៗសម្រាប់ក្រុមប្រឹក្សាឃុំ សង្កាត់ អាណត្តិទី៦នៅតាមរាជធានីខេត្តមានចំនួន ៥រូប ៧រូប ៩រូប ឬ ១១រូប ផ្អែកតាមកត្តាភូមិសាស្ត្រ និងប្រជាសាស្ត្រជាក់ស្ដែង ហើយចំនួនសរុបនៃសមាជិកក្រុមប្រឹក្សាឃុំសង្កាត់នៅទូទាំងប្រទេសសម្រាប់អាណត្តិទី៦មានចំនួន ១១ ៦២២រូប ដូចអាណត្តិទី៥ដែរ៕

អត្ថបទដោយ ហ៊ុន សិរីវឌ្ឍន៍