២នាក់បងប្អូន​សុំ​ឪពុកម្តាយ​ទៅរើស​ផ្លែត្នោត​ទុំ បែរ​នាំគ្នា​ទៅ​លេង​ទឹកស្រះ លង់ស្លាប់​ទាំង​ពីរ​នាក់

សៀមរាប៖ ក្មេងប្រុស/ស្រីចំនួន០២នាក់ ដែលជាបងប្អូនបង្កើតបានសុំម្តាយទៅលែងផ្ទះអ្នកជិតខាង ដើម្បីរើសផ្លែត្នោតទុំ រួចក៏នាំគ្នាហែលទឹកស្រះទើបជីកថ្មីបណ្តាលឲ្យលង់ទឹកស្លាប់ យ៉ាងអណោចអធ័ម។

ហេតុការណ៍នេះបានកើតឡើងនៅវេលាម៉ោង១៤និង០០នាទីថ្ងៃទី១៣ ខែមិថុនាឆ្នាំ២០២១ ត្រង់ចំណុចស្រះជីកវាលស្រែព្រៃរបោះស្ថិត ក្នុងភូមិក្បាលក្រពើ ឃុំរើល ស្រុកពួក ខេត្តសៀមរាប។

លោកវរសេនីយ៍ឯក ទេព ពុំសែន អធិការនគរបាលស្រុកពួក បានឲ្យដឹងថា មានករណីក្មេងលង់ទឹកស្លាប់ចំនួន ០២ នាក់៖ សពទី ១ ឈ្មោះ ឌន់ ចន្ថា ភេទស្រី អាយុ១១ឆ្នាំ ជាសិស្ស។ សពទី ២ ឈ្មោះ ឌន់ ចាន់ឌី ភេទប្រុស អាយុ៨ឆ្នាំ ជាសិស្ស។

ក្មេងទាំង ០២នាក់នេះជាបងប្អូនបង្កើតនឹងគ្នាដែលមានឪពុកឈ្មោះ សន គន់ អាយុ៣៤ឆ្នាំ និងម្ដាយឈ្មោះ ត្រើង រូន អាយុ៣០ឆ្នាំ ជាកសិករ រស់នៅភូមិ-ឃុំ កើតហេតុខាងលើ។

តាមការបំភ្លឺរបស់ឪពុកម្ដាយក្មេងរងគ្រោះបានឲ្យដឹងថា មុនកើតហេតុ ចន្លោះប្រហែលម៉ោង ១៣និង០០នាទីរសៀល ក្មេងរងគ្រោះចំនួន ០៣នាក់បងប្អូន ក្មេងរងគ្រោះទី១.ឈ្មោះ ឌន់ ចន្ថា ភេទស្រី(ជនរងគ្រោះ) ក្មេងរងគ្រោះទី២.ឈ្មោះ ឌន់ ចាន់ឌីន ភេទប្រុស(ជនរងគ្រោះ)ក្មេងរងគ្រោះទី៣.ឈ្មោះ ឌន់ ចាន់ដម ភេទប្រុស អាយុ៦ឆ្នាំ(ជាប្អូន) បានសុំម្តាយទៅលែងផ្ទះអ្នកជិតខាងគ្នា ដើម្បីរើសផ្លែត្នោតទុំម្ដុំស្រះកើតហេតុ ហើយចុះលែងទឹកស្រះ ហើយបាត់ខ្លួន។ ចំណែកក្មេងប្អូនឈ្មោះ ឌន់ ចាន់ដម បាន ស្រែកយំឮ​ដល់អ្នកភូមិជិតខាងឈ្មោះ សឿម ឌុល ភេទប្រុស អាយុ៤២ឆ្នាំ បានទៅសួរនាំទើបដឹងរឿងថាក្មេងលង់ទឹកស្រែកឆោឡោដឹងដល់ឪពុកម្ដាយក្មេង នាំគ្នាចុះស្រង់ ប្រទះឃើញក្មេងទាំងពីរអោបគ្នាជាប់ក្នុងទឹកផុតដង្ហើមស្លាប់បាត់ទៅហើយ។

លោកវរសេនីយ៍ឯក ទេព ពុំសែន អធិការនគរបាលស្រុកពួក បាន​បញ្ជាក់ថា បើតាមការស្រាវជ្រាវរបស់សមត្ថកិច្ចជំនាញនៅកន្លែងកើតហេតុ (ស្រះទំហំ ១០ម៉ែត្រ × ១០ម៉ែត្រ ជម្រៅ ២.៥០ម៉ែត្រ ) និងការពិនិត្យជាក់ស្ដែងសពក្មេងរងគ្រោះទាំងពីរ មានដីជាប់ក្នុងភ្នែក រន្ធច្រមុះ ជារួមលើខ្លួនប្រាណសពក្មេងទាំងពីរ មិនមានជាប់ពាក់ព័ន្ធនឹងករណីព្រហ្មទណ្ឌឡើយ គឺពិតជាស្លាប់ដោយលង់ទឹកពិតប្រាកដមែន ។

ក្រោយពិនិត្យ និងធ្វើកំណត់ហេតុ សមត្ថកិច្ចបានប្រគល់សាកសពជូនក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ៖ កុសល