ព័ត៌មានជាតិ

បិទមិនឱ្យភ្ញៀវទេសចរ ចូលកម្សាន្តបឹងយក្ខឡោម ខណៈភ្ញៀវចូលពីខេត្តផ្សេងត្រូវធ្វើតេស្តកូវីដ១៩

បានផុស

៥ years មុន

នៅ

ថ្ងៃអង្គារ ២២ មិថុនា ២០២១

ដោយ

សហគមន៍រមណីយដ្ឋានធម្មជាតិបឹងយក្ខឡោមបានហាមឃាត់ភ្ញៀវទេសចរមិនឱ្យចូលកម្សាន្តរយៈពេល១៤ ថ្ងៃ ដោយគិតចាប់ពីថ្ងៃទី១៧ ដល់៣០ ខែមិថុនា ឆ្នាំ២០២១ ដើម្បីទប់ស្កាត់ការឆ្លងរីករាលដាលនៃកូវីដ១៩។ នេះបើតាមលោក ង៉ែត ពិទូ ប្រធានមន្ទីរទេសចរណ៍ ខេត្តរតនគិរីបានប្រាប់កម្ពុជាថ្មីតាមទូរស័ព្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានឱ្យដឹងថា រយៈពេលចុងក្រោយនេះនៅក្នុងខេត្តបានផ្ទុះការឆ្លងកូវីដ១៩ច្រើន ដូច្នេះសហគមន៍គ្រប់គ្រងរមណីយដ្ឋានបឹងយក្ខឡោមបានសម្រេចផ្អាកបណ្ដោះអាសន្ន ដោយខ្លួនឯងរយៈពេល១៤ ថ្ងៃ មិនឱ្យភ្ញៀវទេសចរចូលកម្សាន្តឡើយ។ ការហាមឃាត់នេះមិនមែនមិនចង់ឱ្យភ្ញៀវទេសចរមកកម្សាន្តនៅខេត្តរតនគិរីទេ ប៉ុន្តែការធ្វើបែបនេះគឺដើម្បីចូលរួមជាមួយនឹងរាជរដ្ឋាភិបាលកម្ពុជា ទប់ស្កាត់ការឆ្លងកូវីដ១៩ នៅក្នុងសហគមន៍។

បន្ថែមលើនេះភ្ញៀវទេសចរ ដែលមកពីរាជធានី និងខេត្តផ្សេង គឺរដ្ឋបាលខេត្តតម្រូវឱ្យធ្វើតេស្តមុននឹងអនុញ្ញាតឱ្យចូលខេត្ត ដោយបានកំណត់គោលដៅចំនួនបួនកន្លែងទី១ គឺនៅព្រំដែនអន្តរជាតិអូយ៉ាដាវ ទី២នៅចំណុចស្ពានស្រែពកស្ទឹងត្រែង និងខេត្តរតនគិរី ទី៣នៅចំណុចអូរវ៉ាក់ចំណុចព្រំដែនខេត្តរតនគិរី និងខេត្តមណ្ឌលគិរី និងទី៤ នៅបេនឡានផ្សារបាលុងតែម្តង។

រដ្ឋបាលខេត្តរតនគិរី នៅថ្ងៃទី ២២ ខែមិថុនានេះ បានប្រកាសរកឃើញអ្នកឆ្លងជំងឺកូវីដ១៩ ថ្មីបន្ថែមទៀត ៤៣នាក់ពាក់ព័ន្ធព្រឹត្តិការណ៍សហគមន៍ ២០កុម្ភៈ នៅក្នុងភូមិសាស្ត្រខេត្តរតនគិរី ធ្វើឱ្យចំនួនអ្នកឆ្លងបានកើនដល់ ២០៥ នាក់៕