ព័ត៌មានជាតិ

អាជ្ញាធរសុំឲ្យបងប្អូនលក់លើផ្លូវលេខ៣៦៩ ត្រូវចូលលក់ក្នុងផ្សារបន្លែ មិនឲ្យហួសថ្ងៃទី២៨

បានផុស

៥ years មុន

នៅ

ថ្ងៃព្រហស្បតិ៍ ២៤ មិថុនា ២០២១

ដោយ

នៅរសៀលថ្ងៃទី២៤ ខែមិថុនានេះ លោក សាន់ ប៊ុនណា ប្រធានគ្រប់គ្រងផ្សារបន្លែច្បារអំពៅបានប្រាប់កម្ពុជាថ្មីថា អាជ្ញាធរខណ្ឌច្បារអំពៅនឹងចុះរៀបចំសណ្តាប់ធ្នាប់លើកំណាត់ផ្លូវលេខ៣៦៩ ក្នុងសង្កាត់ច្បារអំពៅ ដោយមិនអនុញ្ញាតឲ្យបងប្អូនបន្លែលើទ្រូងផ្លូវដូចរាល់ថ្ងៃនេះទៀតហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សាន់ប៊ុនណា បានបញ្ជាក់យ៉ាងច្បាស់ថា អាជ្ញាធរខណ្ឌច្បារអំពៅនិងសាលាសង្កាត់ច្បារអំពៅទី២ និងចុះរៀបចំសណ្តាប់ធ្នាប់លើកំណាត់ផ្លូវលេខ៣៦៩ ចាប់ពីកែងបេនឡានយឿត្រីរហូតដល់ផ្លូវចូលទៅការិយាល័យ ភូមិបាលខណ្ឌច្បារអំពៅ ដោយមិនអនុ ញាតិឲ្យមានការលក់ដូរលើកំណាត់ផ្លូវនេះឡើយ ព្រោះអាជ្ញាធរបានរៀបចំឲ្យមានការលក់ដូរ ក្នុងផ្សារបន្លែច្បារអំពៅត្រឹមត្រូវ។ ក្នុងនោះតាមផែនការ ដែលត្រូវបានដាក់ឲ្យចុះរៀបចំសណ្តាប់ធ្នាប់លើផ្លូវលេខ៣៦៩នេះ គឺប្រព្រឹត្តធ្វើឡើងចាប់ពីម៉ោង៤ទៀបភ្លឺថ្ងៃទី២៨ខែមិថុនានេះ មានវិធានការណ៍ទៅលើអ្នកដែលចចេសរឹងរូសអាចត្រូវរឹបអូសសម្ភារៈដោយពុំទទួលខុសត្រូវ ក្នុងការខូចខាតឡើយ។

លោក សាន់ ប៊ុនណា បានបញ្ជាក់ថា កាលពីដើមឆ្នាំលោក ចេង មុនីរ៉ា អភិបាលនៃគណៈអភិបាលខណ្ឌច្បារអំពៅ បានរកកន្លែងឲ្យបងប្អូនដែលលក់លើផ្លូវ៣៦៩ម្តងជាពីរដងរួចទៅហើយ។ ប៉ុន្តែពួកគាត់មិនព្រមទៅលក់ក្នុងផ្សារសោះ សុខចិត្តមកដាក់លក់លើផ្លូវបង្កឲ្យប៉ះពាល់ដល់ការធ្វើដំណើជារៀងរាល់ថ្ងៃនេះ៕

អត្ថបទ៖ នរា