អ្នកប្រចាំការនៅបេនឡានផ្សារច្បារអំពៅ រៀបចំគូសគំនូសចំណតរថយន្តឲ្យមានរបៀបរៀបរយ

ដើម្បីឲ្យមានរបៀបរៀបរយនៅក្នុងការគ្រប់គ្រងចំណតរបស់បេនឡានច្បារអំពៅ គេសង្កេតឃើញកម្មករប្រចាំការនៅបេនឡានមុខផ្សារច្បារអំពៅបានរៀបចំគូសគំនូសសម្រាប់ឲ្យរថយន្តភ្ញៀវចូលសំចតចៀសវាងឈប់រថយន្តគ្មានរបៀបរៀបរយ។

លោក ឡោ សុផល អ្នកប្រចាំការនៅចំណតរថយន្តច្បារអំពៅបានឲ្យដឹងថា ការគូសគំនូសសំគាល់នេះ គឺដើម្បីចូលរួមតាមការផ្សព្វផ្សាយរបស់អាជ្ញាធរមូលដ្ឋានក្នុងការរៀបចំសណ្តាប់ធ្នាប់តាមដងផ្លូវ៣៦៩ក្នុងសង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។

លោក ឡោ សុផល បានបន្តថា ជារៀងរាល់ថ្ងៃកម្លាំងកម្មករ និងសន្តិសុខប្រចាំចំណតរថយន្តច្បារអំពៅ គឺតែងតែបញ្ចេញកម្លាំងរៀបចំសណ្តាប់ធ្នាប់ជាមួយអាជ្ញាធរមូលដ្ឋានដើម្បីបញ្ចៀសចរាចរណ៍កុំឲ្យកកស្ទះ។

បើតាមការបញ្ជាក់របស់លោក យុិន វុធ ចៅសង្កាត់ច្បារអំពៅទី២ បានអះអាងថា កម្លាំងគណៈបញ្ជាការឯកភាពសង្កាត់របស់លោកតែងរៀបចំសណ្តាប់ធ្នាប់លើកំណាត់ផ្លូវ៣៦៩ជារៀងរាល់ព្រឹកមិនដែលខកខានឡើយ ទោះបីថ្ងៃសម្រាកឬថ្ងៃបុណ្យ។

លោកចៅសង្កាត់ក៏បានឯកភាពលើការចូលរួមរៀបចំគំនូសចំណតរបស់អ្នកទទួលខុសត្រូវលើចំណតនេះទៀតផង។ហើយក្នុងនោះលោកចៅសង្កាត់បានសំណូមពរដល់ពលរដ្ឋដែលមានលំនៅដ្ឋានសង្ខាងផ្លូវ៣៦៩សូមចូលរួមលើបញ្ហាសណ្តាប់នេះផង ពិសេសការយកទំនិញមកដាក់លក់លើចិញ្ចើមផ្លូវ និងរំលោភលើផ្លូវសាធារណះបង្កឲ្យស្ទះចរាចរណ៍៕

អត្ថបទ៖ នរា