ព័ត៌មានជាតិ

ក្រុមប្រឹក្សាខណ្ឌដូនពេញ ជំរុញមន្ត្រីពាក់ព័ន្ធបង្កើនការរក្សាសន្តិសុខសណ្ដាប់ធ្នាប់ ឲ្យបានល្អ

បានផុស

៤ ខែ មុន

នៅ

ថ្ងៃសៅរ៍ ២៨ កុម្ភៈ ២០២៦

ដោយ

ក្រុមប្រឹក្សាខណ្ឌដូនពេញ ជំរុញដល់មន្ត្រីពាក់ព័ន្ធ ត្រូវបង្កើនការរក្សាសន្តិសុខសណ្ដាប់ធ្នាប់ក្នុងមូលដ្ឋានឲ្យបានល្អ ជាពិសេសមិនអនុញ្ញាតឲ្យមានបទល្មើសឆបោកតាមបច្ចេកវិទ្យានោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ២៧ ខែកុម្ភៈ ឆ្នាំ ២០២៦ រដ្ឋបាលខណ្ឌដូនពេញ បានបើកកិច្ចប្រជុំសាមញ្ញលើកទី ២១ របស់ក្រុមប្រឹក្សាខណ្ឌ អាណត្តិទី ០៤ ដើម្បីត្រួតពិនិត្យលទ្ធផលការងារ និងក្រោមវត្តមាន លោក ហែម អាន ប្រធានក្រុមប្រឹក្សាខណ្ឌដូនពេញ និងលោក ជា ខេមា អភិបាល នៃគណៈអភិបាលខណ្ឌដូនពេញ និងមានការចូលរួមពីមន្ត្រីពាក់ព័ន្ធ និងសមាជិកក្រុមប្រឹក្សា នៃរដ្ឋបាលខណ្ឌ។

នាឱកាសនោះ លោក ហែម អាន បានលើកឡើងដោយកោតសរសើររដ្ឋបាលខណ្ឌដែលបម្រើការងារដល់ប្រជាពលរដ្ឋ និងការចូលរួមការងារសង្គមផ្សេងៗ បានល្អ ជាពិសេស ចុះត្រួតពិនិត្យរាល់បទល្មើស និងរក្សាបានសន្តិសុខសណ្ដាប់ធ្នាប់សាធារណៈល្អប្រសើរជូនភ្ញៀវជាតិ-អន្តរជាតិ មកលេងកម្សាន្តតាមរមណីយដ្ឋានទេសចរណ៍ក្នុងមូលដ្ឋានខណ្ឌដូនពេញ។

ជាមួយនេះ លោក ជា ខេមា បានលើកឡើងដែរថា យោងតាមការណែនាំរបស់លោក ឃួង ស្រេង អភិបាលរាជធានីភ្នំពេញ បានដាក់បទបញ្ជាដល់អាជ្ញាធរខណ្ឌទាំង ១៤ ត្រូវម្ចាស់ការក្នុងការបោសសម្អាត និងប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា ល្បែងស៊ីសងគ្រប់ប្រភេទ និងគ្រឿងញៀនផងដែរ ពោលគឺត្រូវអនុវត្តគោលនយោបាយភូមិ-សង្កាត់ មានសុវត្ថិភាពឲ្យបានល្អ។

លោកអភិបាលបញ្ជាក់ថា ក្នុងមូលដ្ឋានខណ្ឌដូនពេញ មានអគារ ខុនដូ អាផាមិន ចំនួន ២៩៥ ទីតាំង មកដល់ពេលនេះ អាជ្ញាធរចុះត្រួតពិនិត្យ បានចំនួន ២៣៣ ទីតាំងហើយ នៅសល់ប៉ុន្មានទីតាំងទៀត កម្លាំងគណៈបញ្ជាការឯកភាព ដែលដឹកនាំផ្ទាល់ដោយរូបលោក បានបន្តចុះត្រួតពិនិត្យជាប់ជាប្រចាំ ដើម្បីបោសសម្អាតបទល្មើស onlinescam ឲ្យអស់ក្នុងមូលដ្ឋាន។

លោកអភិបាលបន្តទៀតថា ខណ្ឌដូនពេញ ជាបេះដូងរបស់រាជធានីភ្នំពេញ ដូច្នេះមិនត្រូវមានបទល្មើសគ្រប់ប្រភេទ និងត្រូវធានាបានសន្តិសុខសុវត្ថិភាព សណ្ដាប់ធ្នាប់សាធារណៈល្អប្រសើរ ជូនដល់ ប្រជាពលរដ្ឋ ម្ចាស់អាជីវកម្ម ភ្ញៀវទេសចរជាតិ-អន្តរជាតិ។

លោកអភិបាលសង្កត់ធ្ងន់ថា បញ្ហាក្មេងទំនើង មានការប្រមូលផ្ដុំគ្នាពេលយប់ព្រលប់ បញ្ហាសន្តិសុខ សណ្ដាប់ធ្នាប់នេះជាកត្តាសំខាន់ កម្លាំងជំនាញត្រូវចេញល្បាតជាប្រចាំទាំងថ្ងៃទាំងយប់ ក្នុងមូលដ្ឋាន ដើម្បីរក្សាបានសន្តិសុខសុវត្ថិភាពជូនដល់ពលរដ្ឋ ព្រោះខណ្ឌដូនពេញទីតាំងប្រមូលផ្ដុំដោយ ទេសចរណ៍ វប្បធម៌ សេដ្ឋកិច្ច និងជាបេះដូងរបស់រាជធានីភ្នំពេញ៕

អត្ថបទ ៖ សុភា