ព័ត៌មានជាតិ

មនុស្ស៣៥នាក់ តេស្តវិជ្ជមាន និងស្ត្រីបានស្លាប់ដោយសារកូវីដ១៩ នៅខេត្តកំពង់ឆ្នាំង

បានផុស

៥ years មុន

នៅ

ថ្ងៃចន្ទ ១២ កក្កដា ២០២១

ដោយ

រដ្ឋបាលខេត្តកំពង់ឆ្នាំងនៅល្ងាចថ្ងៃទី១២ ខែកក្តដានេះ បានចេញសេចក្តីជូនដំណឹងស្ដីពីការរកឃើញអ្នកវិជ្ជមានកូវីដ១៩ ចំនួន៣៥នាក់ថ្មីទៀត និងមរណភាពស្ត្រីជនជាតិខ្មែរម្នាក់ មានវិជ្ជមានកូវីដ នៅថ្ងៃទី១១ ខែកក្កដា នៅក្នុងមន្ទីរពេទ្យបង្អែកខេត្តកំពង់ឆ្នាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកវិជ្ជមានកូវីដ១៩ ក្នុងក្នុងព្រឹត្តិការណ៍សហគមន៍២០កុម្ភៈ ចំនួន៣៥នាក់នេះ មាននៅលើអាជីវករ កម្មករ កសិករ មន្ត្រីរាជការ នាយកសាលា គ្រូបង្រៀន សិស្ស បុគ្គលិកធនាគារ និងអ្នករត់ម៉ូតូឌុប។ អ្នកវិជ្ជមានទាំង៣៥នាក់ខាងលើនោះ គឺរស់នៅក្នុងស្រុករលាប្អៀរចំនួន០៩នាក់ ស្រុកទឹកផុស ចំនួន០៣នាក់ និងក្រុងកំពង់ឆ្នាំងចំនួន២៣នាក់។

នៅក្នុងសេចក្តីសម្រេចនេះរដ្ឋបាលខេត្តកំពង់ឆ្នាំង បានបញ្ជាក់ថា អ្នកវិជ្ជមានកូវីដ១៩ ទាំង៣៥ នាក់ខាង លើនេះត្រូវបានដាក់សម្រាកព្យាបាលនៅមន្ទីរពេទ្យបង្អែកខេត្តកំពង់ឆ្នាំង មណ្ឌលព្យាបាលវិទ្យាល័យតេជោហ៊ុនសែនទឹកហូត។ មណ្ឌលព្យាបាលវិទ្យាល័យហ៊ុនសែនកំពង់ត្រឡាច និងមណ្ឌលព្យាបាលវិទ្យាល័យហ៊ុនសែនបរិបូណ៌។

ដោយឡែកការស្លាប់របស់ស្ត្រីជនជាតិខ្មែរឈ្មោះ គង់ នីន អាយុ៧២ឆ្នាំ រស់នៅភូមិសំរោង ឃុំតាចេស ស្រុកកំពង់ត្រឡាច បានចូលមកសម្រាកនៅក្នុងមន្ទីរពេទ្យបង្អែកខេត្តកំពង់ឆ្នាំង នៅថ្ងៃទី ១០ ខែកក្កដា វេលាម៉ោង ១០និង២០នាទី បានរកឃើញវិជ្ជមានកូវីដ១៩ និងបានស្លាប់នៅវេលាម៉ោង១២និង១០នាទី ថ្ងៃទី១១ ខែកក្កដា នៅក្នុងមន្ទីរពេទ្យបង្អែកខេត្តកំពង់ឆ្នាំង។

មួយគ្នានេះដែរ រដ្ឋបាលខេត្តកំពង់ឆ្នាំង សូមអំពាវនាវដល់ប្រជាពលរដ្ឋ ដែលមានការទាក់ទងដោយផ្ទាល់និងដោយប្រយោលជាមួយអ្នកវិជ្ជមានកូវីដ១៩ខាងលើនេះ មុនរយៈពេល១៤ថ្ងៃសូមទៅយកសំណាកជាមួយគ្រូពេទ្យនៅមណ្ឌលសុខភាព ឬមន្ទីរពេទ្យដែលនៅជិតបំផុត ដើម្បីរួមគ្នាទប់ស្កាត់និងការពារជំងឺកូវីដ១៩ កុំឲ្យឆ្លងចូលក្រុមគ្រួសារ និងឆ្លងចូលសហគមន៍៕

អត្ថបទ៖ ឈៀងថារិទ្ធ