ព័ត៌មានជាតិ

ពូជស្រូវជាង ៦ ពាន់តោន ត្រូវបានចែកជូនប្រជាពលរដ្ឋតាមគោលដៅ

បានផុស

៤ years មុន

នៅ

ថ្ងៃអង្គារ ២៤ វិច្ឆិកា ២០២០

ដោយ

គិតមកដល់ថ្ងៃទី២៣ ខែវិច្ឆិកានេះ ពូជស្រូវចំនួន៦ ៥៧៨ តោន និងពូជបន្លែជាង៥៦ ម៉ឺនកញ្ចប់ត្រូវបានចែកជូនដល់កសិករ ដែលរងគ្រោះដោយជំនន់ទឹកភ្លៀង នៅតាមគោលដៅតាមរយ:គណៈកម្មការគ្រប់គ្រងគ្រោះមហន្តរាយ។

នេះបើយោងតាមការបញ្ជាក់ឲ្យដឹងរបស់រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ នាថ្ងៃទី២៣ ខែវិច្ឆិកា ក្នុងឱកាសអញ្ជើញចែកពូជស្រូវ ចំនួន៨៣ តោន ជូនប្រជាកសិករចំនួន៨៣០គ្រួសារ ដែលប្រារព្វធ្វើក្នុងបរិវេណ វត្តសង់ឃ្លាំង ភូមិសង់ឃ្លាំង ឃុំតាំងក្រសាំង ស្រុកសន្ទុក ខេត្តកំពង់ធំ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍ក្រសួងកសិកម្ម បានឲ្យដឹងថា ពូជស្រូវដែលត្រូវបានចែកទៅដល់កសិកររងគ្រោះនៅក្នុងខេត្តនីមួយៗ រួមមានកសិករក្នុងខេត្តពោធិ៍សាត់ទទួលបានពូជស្រូវចំនួន ១,៨៦០ តោន,ខេត្តបន្ទាយមានជ័យ ចំនួន ១,១៤៦តោន,ខណៈខេត្តបាត់ដំបងទទួលបានពូជស្រូវចំនួន១,០៥៩តោន។ ចំណែកខេត្តកំពង់ធំ ទទួលបាន ៦៩៥ តោន,ព្រៃវែង ៣៧៦ តោន,កំពង់ចាម ៣២១តោន,ក្រចេះ ២៣៧តោន,កំពង់ឆ្នាំង១៧១តោន,ស្វាយរៀង១០២តោន,កំពត៩៦តោន,សៀមរាប៨០តោន,ត្បូងឃ្មុំ ៦៥តោន,កណ្ដាល៥៨តោន,តាកែវ៥៨តោន,ភ្នំពេញ៥២តោន,ព្រះវិហារ៣៥តោន,កំពង់ស្ពឺ ១១តោន,ប៉ៃលិន ៦តោន និងស្ទឹងត្រែង១តោន។

លោក វេង សាខុន មានប្រសាសន៍ឲ្យដឹងថា តាមរយៈការចុះវាយតម្លៃអំពីវឌ្ឍនភាពនៃការស្តារផលិតកម្មដំណាំស្រូវ ឡើងវិញ នៅតាមបណ្តាខេត្តគោលដៅជុំវិញបឹងទន្លេសាប ជាលទ្ធផលជាក់ស្តែងបង្ហាញឲ្យឃើញថា ទី១-ពូជស្រូវ ដែលបានយកទៅចែកជូនភាគច្រើនដំណុះគ្រាប់មាន អត្រាខ្ពស់ហើយស្រូវកំពុងដុះលូតលាស់បានល្អ ខ្លះកំពុងបូមទឹក បញ្ជូលស្រែ បាចជី និងបាញ់ថ្នាំការពារសត្វល្អិតចង្រៃ ។ទី២- ផ្ទៃដីខូចខាតជាង៥០ភាគរយ ត្រូវបាន ស្តារឡើងវិញរួចរាល់ បើទោះបីនៅតំបន់ខ្លះសកម្មភាពស្តារឡើងវិញមានការយឺតយ៉ាងដោយសារទឹកស្រកចុះយឺត ប៉ុន្តែដើម្បីជម្នះនូវបញ្ហានេះមានប្រជាកសិករ ខ្លះមិនរង់ចាំទឹកស្រកឡើយ ហើយបានបូមទឹកចេញពីស្រែដើម្បីងាយស្រួលព្រោះគ្រាប់ពូជ ហើយសង្ឃឹមថា ផ្ទៃដីខូចខាតនឹងត្រូវបានស្តារឡើងវិញក្នុងពេលឆាប់ៗនេះ ។ ទី៣-នៅខេត្តឧត្តរមានជ័យ ប្រជាកសិករកំពុងតែសប្បាយនឹងប្រមូលផលស្រូវលក់ ប៉ុន្តែខ្លះក៏កំពុងប្រឈមនឹងបញ្ហាខ្វះម៉ាស៊ីនច្រូតប្រមូលផលស្រូវពីស្រែ ផងដែរ។

លោករដ្ឋមន្រ្តី ក្រសួងកសិកម្ម រុក្ខាប្រមាញ់ និង នេសាទ បានណែនាំឲ្យថ្នាក់ដឹកនាំក្រសួង ដែលមានមានតួនាទីទទួលបន្ទុកតាមបណ្តាខេត្ត ត្រូវបន្តចុះមកតាមការងារ អន្តរាគមន៍ស្តារផលិតកម្មកសិកម្មឡើងវិញឲ្យបានជាប់ជាប្រចាំដោយឡែកអគ្គនាយកដ្ឋានកសិកម្ម និងមន្ទីរកសិកម្ម រុក្ខាប្រមាញ់និងនេសាទខេត្តត្រូវចាត់មន្ត្រីចុះតាម ដានលើការងារបច្ចេកទេស ជំងឺ និង សត្វល្អិត ។

សូមជម្រាបថា រាជធានី-ខេត្តចំនួន ២០ បានរងផលប៉ះពាល់ដោយសារគ្រោះទឹកជំនន់កន្លងមក ក្នុងនោះមានពលរដ្ឋប្រមាណ ៦០ ម៉ឺននាក់ រងផលប៉ះពាល់,មនុស្ស៤៤ នាក់ បាត់បង់ជីវិត និងដំណាំកសិកម្មប្រមាណ ៣៨ ម៉ឺនហិកតាត្រូវបានជន់លិច ៕

អត្ថបទ ៖ ណារី