ព័ត៌មានជាតិ

១ថ្ងៃ បាន១០លានរៀល ក្រោយយកមាន់មកលក់ខ្លួនឯង

បានផុស

៤ years មុន

នៅ

ថ្ងៃអង្គារ ៣ សីហា ២០២១

ដោយ

កសិកររស់នៅខេត្តព្រៃវែង បានដឹកសត្វមាន់យកមកលក់នៅផ្សារច្បារអំពៅដោយខ្លួនឯង ព្រោះបានប្រាក់ច្រើនជាងលក់ឲ្យឈ្មួញ ដែលចុះទៅប្រមូលទិញតាមផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កសិករឈ្មោះ រុន ថានី ភេទស្រី អាយុ៥២ឆ្នាំ រស់នៅភូមិរមៀសឈរ ឃុំគោកខ្ចក ស្រុកកំពង់ត្របែក ខេត្តព្រៃវែង បានឲ្យកម្ពុជាថ្មីដឹងថា ដោយសារមិនចង់លក់មាន់ដែលគាត់ខិតខំចិញ្ចឹមអស់រាប់ខែហើយ នៅពេលដែលឈ្មួញចុះទៅទិញតាមផ្ទះមានតម្លៃថោកពេក ពួកគាត់សុខចិត្តងើបពីយប់ដឹកមាន់មកលក់ នៅផ្សារច្បារអំពៅ រាជធានីភ្នំពេញ ដោយខ្លួនឯងទើបដឹងថា បានលុយក្រាស់ក្រែល។

បងស្រីបន្តថា ឈ្មួញដែលចុះទៅទិញដល់ផ្ទះ គឺបានតម្លៃត្រឹមតែ១៥០០០រៀលប៉ុណ្ណោះ ក្នុងមួយគីឡូក្រាម។ តែបើដឹកយកមកអង្គុយលក់ដល់ផ្សារបែបនេះ បានថ្លៃរហូតដល់២៥០០០រៀល ក្នុង១គីឡូក្រាម។ ដូច្នេះហើយទើបកសិករភាគច្រើនសុខចិត្តយកសត្វមាន់ ដែលខ្លួនខិតខំចិញ្ចឹមយ៉ាងលំបាកលំបិនមកលក់ដល់ផ្សារទើបដឹងថា បានប្រាក់ច្រើនកាន់ពេញដៃ។

កសិកររស់នៅស្រុកកំពង់ត្របែកបានបញ្ជាក់ថា សព្វថ្ងៃនេះពួកគាត់ធ្វើដំណើរចេញពីស្រុកមកដល់ភ្នំពេញត្រឹម២ម៉ោងសោះបានមកដល់ភ្នំពេញបាត់ ក៏ព្រោះតែផ្លូវក្រាលកៅស៊ូស្រួលជិះគ្រប់កន្លែង។ ហើយក្នុងមួយជើងៗគាត់យកមាន់មកលក់ដល់ផ្សារបែបនេះ បានលុយមិនក្រោម១០លានរៀលទេ៕

អត្ថបទ៖ នរា