ព័ត៌មានជាតិ

រាជរដ្ឋាភិបាលអនុម័តផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី (២០២១- ២០៣៥ )

បានផុស

៣ years មុន

នៅ

ថ្ងៃសៅរ៍ ១៤ សីហា ២០២១

ដោយ

រាជរដ្ឋាភិបាលកម្ពុជា បានអនុម័តដាក់ឲ្យប្រើប្រាស់ជាផ្លូវការ នូវផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរីសម្រាប់ឆ្នាំ ២០២១-២០៣៥ ។ ផែនការ មេនេះនឹងក្លាយជាត្រីវីស័យចង្អុលបង្ហាញអំពីយន្តការ និងទិសដៅយុទ្ធសាស្រ្តសំខាន់ៗ សម្រាប់ការអភិវឌ្ឍវិស័យសេដ្ឋកិច្ចនិងទេសចរណ៍នៅក្នុងខេត្តមណ្ឌលគិរីឆ្លើយតប ទៅនឹងចក្ខុវិស័យនៃការអភិវឌ្ឍជាតិក្នុងរយៈពេល(២០២១-២០៣៥ ) និងបណ្ដាឆ្នាំខាងមុខតទៅទៀត។ នេះបើយោងតាមរយៈលិខិតរបស់ទីស្តីការគណៈរដ្ឋមន្រ្តីចុះថ្ងៃ ទី១២ ខែសីហាឆ្នាំ២០២១ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផែនការមេអភិវឌ្ឍន៍ទេសចរណ៍ខេត្តមណ្ឌលគិរី (២០២១-២០៣០) នេះត្រូវបានសិក្សារៀបចំដោយគណៈកម្មការអន្តរក្រសួងដឹកនាំដោយលោក ថោង ខុន រដ្ឋមន្ត្រី ក្រសួងទេសចរណ៍។ផែនការមេនេះបានចាប់ផ្តើមដំណើរការរៀបចំនៅអំលុងខែសីហាឆ្នាំ២០២០និងបានបញ្ចប់ក្នុងខែសីហាឆ្នាំ ២០២១ ដោយមានការចូលរួមនិងពិគ្រោះយោបល់យ៉ាង ទូលំទូលាយទាំងនៅថ្នាក់ជាតិ និងថ្នាក់ក្រោមជាតិ និងក្នុងក្របខណ្ឌអន្តរក្រសួង។

ដោយឈរលើស្ថានភាពជាក់ស្ដែង និងជាប្រភពសក្ដានុពលនិងការអភិវឌ្ឍវិស័យទេសចរណ៍នៅខេត្តមួយនេះ រាជរដ្ឋាភិបាលបានកំណត់យកខេត្តមណ្ឌលគិរីជាគោលដៅ អេកូទេសចរណ៍លំដាប់អន្តរជាតិ និងជាខេត្តដ៏សំខាន់ក្នុងការផ្គត់ផ្គង់ ផ្កា បន្លែ ផ្លែឈើ និងសាច់ សម្រាប់បំពេញតម្រូវការប្រទេស និងឈានទៅដល់ការនាំចេញទៅ ទីផ្សារក្រៅប្រទេស។ រាជរដ្ឋាភិបាលក៏បានកំណត់អាទិភាពសំខាន់៦ចំណុច ត្រូវបានរក្សាទុក និងកំណត់អំពីវិសាលភាពនៃសកម្មភាពវិនិយោគនិងការអភិវឌ្ឍតំបន់ទាំង នោះឲ្យបានច្បាស់លាស់រួមមាន៖១.តំបន់របៀងអេកូទេសចរណ៍ និងទេសចរណ៍ធម្មជាតិ នៃដែនជម្រកសត្វព្រៃទាំង៥.២.តំបន់របៀងទេសចរណ៍វប្បធម៌និងអេកូទេស ចរណ៍ ប៊ូស-ដាក់ដាំ។៣. ក្រុងសែនមនោរម្យ ។៤.តំបន់ស្រុកអូររាំងភ្ជាប់ជាមួយការអភិវឌ្ឍអាកាសយានដ្ឋានខេត្តមណ្ឌលគីរី ។៥.តំបន់ប្រជុំជននៃស្រុកកោះញែកនិង ៦.តំបន់ទេសចរណ៍សមាហរ័ណតាមច្រកព្រំដែន។

ផែនការមេនេះក៏ត្រូវបានការគាំទ្រនិងជំរុញយ៉ាងសកម្មពីលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុនិងជាប្រ ធានគណៈកម្មាធិការជាតិអភិវឌ្ឍន៍ទេសចរណ៍ចាប់តាំងពីដំណាក់កាលចាប់ផ្តើមរហូតទទួលបានការអនុម័តពីរាជរដ្ឋាភិបាល៕

ដោយ៖ណារី