សូមប្រយ័ត្ន! អ្នកបោះចោលសំរាមផ្តេសផ្តាស នៅតាមរមណីយដ្ឋានធម្មជាតិ នឹងអស់២ម៉ឺនរៀល ឡើងទៅ

មន្ត្រីនាំពាក្យ ក្រសួងបរិស្ថាន បានជំរុញឲ្យប្រជាពលរដ្ឋ ដែលបានធ្វើដំណើរកម្សាន្ត នៅតាមទីតាំងទេស ចរណ៍ធម្ម​ជា​តិ និងតំបន់ការពារធម្មជាតិនានា សូមទុកដាក់សំរាមឲ្យបានត្រឹមត្រូវ ហើយប្រសិនបើមានការបោះចោលផ្ដេស​ផ្ដាសនោះ នឹងត្រូវរងការផាកពិន័យ ចាប់ពី២ម៉ឺនរៀលឡើងទៅ។

លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន មានប្រសាសន៍ប្រាប់អ្នកសារព័ត៌មានកម្ពុជាថ្មី នៅព្រឹកថ្ងៃទី៨ ខែកញ្ញានេះថា ទន្ទឹមនឹងក្រសួងបរិស្ថាន ក៏ដូចជាមន្ទីរបរិស្ថាននានា បានរៀបចំធុង​សំរាមតាម​ទីតាំ​ងទេសចរណ៍ធម្មជាតិនានា ក៏ដូចជាមានការអប់រំផ្សព្វផ្សាយជាបន្តបន្ទាប់ហើយនោះ គឺលោកជំរុញឲ្យប្រជាពលរដ្ឋ ដែលបានធ្វើដំណើរកម្សាន្ដ នៅតាមទីតាំងទេសចរណ៍ធម្មជាតិ និងតំបន់ការពារធម្ម ជាតិនានា សូមទុកដាក់ និងវេច​ខ្ច​ប់​សំរា​ម ដែលបង្កើតឡើងដោយខ្លួនឯង ​ឲ្យ​បានត្រឹមត្រូវ ដើម្បីថែរក្សានូវសណ្ដាប់ធ្នាប់ និងសោភ័ណ្ឌភាព នៅទី​តាំង​ទាំងនោះ។​

លោក នេត្រ ភក្ត្រា មានប្រសាសន៍បន្តថា «បងប្អូន អាចយករបស់របរ ទៅហូបបាន ក៏អាចជួយវេចខ្ចប់ នូវសំណល់​សំរាមហ្នឹង ត្រឡប់មកវិញមក ដើម្បីធ្វើម៉េចឲ្យ ទីតាំងទេសចរណ៍ទាំងអស់ហ្នឹង វានៅរក្សាសោភ័ណ្ឌ​ភាពស្អាត​ដ​ដែ​ល ដើម្បីទាក់ទញភ្ញៀវទេសចរណ៍ផ្សេងទៀត ព្រោះថា បើសិនជាបងប្អូនអញ្ជើញទៅទស្សនា ហើយបោះសំរាម​ចោ​លពាសវាល ពាលកាល ដែលធ្វើឲ្យបំពុល ដល់ទីតាំងហ្នឹង ហើយបង្កើតជាភាពកង្វក់ នៅកន្លែងហ្នឹង អញ្ចឹងយើង​មិន​អាច ទាក់ទាញភ្ញៀវទេសចរណ៍ផ្សេងទៀតទេ»។

លោកថា អ្នកដែលបានបាត់បង់ផលប្រយោជន៍ ពីអ្នកទេសចរណ៍ ដែលទៅដើរលេងកម្សាន្ដ នៅតាមទីតាំងទេស​ចរណ៍​ធម្មជាតិ​ និងតំបន់ការពារធម្មជាតិនានា បន្ទាប់ពីមានការចោលសំរាមពាសវាល ពាសកាលនោះ គឺជាប្រជា​សហគមន៍មូលដ្ឋាន ដែលរស់​នៅទី​នោះ​តែម្ដង។ មន្ត្រីជាន់ខ្ពស់ ក្រសួងបរិស្ថាន បានបញ្ជាក់ថា «អញ្ចឹងបានជា​យើង ជំរុញឲ្យទុកដាក់សំរាម ឲ្យបាន​ត្រឹម​ត្រូវ ហើយជាមួយគ្នានេះ នៅពេលដែលយើងរៀបចំ ទីតាំងដាក់សំរាម ផ្សព្វផ្សាយអីហើយ បើសិនជាមិន អនុ​វត្តតាមទេ អាហ្នឹងគឺយើង នឹងអនុវត្តច្បាប់ ធ្វើការ ផាកពិន័យ ដែលការផាក​ពិន័យហ្នឹង​ គឺអាចតិចបំផុត២​ម៉ឺនរៀល​ឡើង​ទៅ ទៅតាមស្ថានភាព​ នៃការបំពុល ការបោះចោលសំរាមផ្ដេស​ផ្ដាស​ហ្នឹង»។

លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានគូសបញ្ជាក់ថា នៅពេលមន្ត្រីបរិ ស្ថាន ឃើ​ញអ្នកទេសចរណ៍ណាម្នាក់ បោះចោលសំរាម នៅតាមទីតាំងទេសចរណ៍ធម្មជាតិ និងតំបន់អភិរក្សនានានោះ គឺនឹង​ធ្វើ​ការផាកពិន័យតាមម្ដង មិនមានការអប់រំណែនាំទៀតទេ៕

អត្ថបទ៖ ឃួន សុភ័ក្រ