Connect with us

ព័ត៌មានជាតិ

លោក ពៅ សុខ ៖ សៀវភៅអ្នកយុទ្ធសាស្រ្តវ័យក្មេងនៅអាស៊ី ស្តីពី ដំណើរស្វែងរកសន្តិភាពរបស់សម្តេច ហ៊ុន សែន បានចូលរោងពុម្ពហើយ

បានផុស

នៅ

លោក ពៅ សុខ សមាជិកក្រុមប្រឹក្សាភិបាល នៃសមាគមអ្នកនិពន្ធខ្មែរ និងជាទីប្រឹក្សាផ្ទាល់សម្តេចតេជោនាយក រដ្ឋមន្រ្តី ហ៊ុន សែន ដែលជាអ្នករៀបរៀងសៀវភៅ អ្នកយុទ្ធសាស្រ្តវ័យក្មេង នៅអាស៊ី ស្តីពី ដំណើរស្វែងរកសន្តិភាព របស់សម្តេចនាយករដ្ឋមន្រ្តី ហ៊ុន សែន បានឲ្យ​​ដឹង​ថា សៀវភៅនេះ បានចូលដល់រោងពុម្ព ដើម្បីបោះពុម្ពផ្សព្វ​ផ្សាយជាសាធារណៈជាស្ថាពរហើយ បន្ទាប់ពីចំ​ណាយ​​​ពេលចងក្រងរយៈពេលប្រមាណ៨ខែរួចមក។

ថ្លែងប្រាប់អ្នកសារព័ត៌មាន នៅថ្ងៃសៅរ៍ទី៣០ ខែតុលា ឆ្នាំ២០២១នេះ លោក ពៅ សុខ បានបញ្ជាក់បន្ថែមថា តាមការគ្រោងទុក សៀវភៅអ្នកយុទ្ធសាស្រ្តវ័យក្មេងនៅអាស៊ី នឹងត្រូវចេញ​​ផ្សាយ​ជាសាធារណៈ នៅចុងខែវិច្ឆិកា ឆ្នាំ២០២១នេះ ដើម្បីចូលរួមអបអរសាទរខួបទី៣០ឆ្នាំ នៃកិច្ចព្រមព្រៀង​​សន្តិភាព​ក្រុងប៉ារីស ខួបទី៤៣ឆ្នាំ នៃថ្ងៃ​បង្កើតរណសិរ្សសាមគ្គីសង្រ្គោះជាតិកម្ពុជា ០២ធ្នូ ១៩៧៨ និងខួបទី ៣៤ឆ្នាំ នៃការ​ជួប​ចរចាគ្នាលើកដំបូង​របស់​ម្តេចតេជោនាយករដ្ឋមន្រ្តី ហ៊ុន សែន និងព្រះករុណា ព្រះបាទនរោត្តម សីហនុ នៅហ្វ៊ែរ​​អង់តាដឺន័រ ប្រទេសបារាំង ថ្ងៃទី០២ ខែធ្នូ ឆ្នាំ១៩៨៧។

លោកលើកឡើងថា សៀវភៅ ដែលមានកម្រាស់ជិត៦០០ទំព័រ ចំណងជើងដ៏គួរឱ្យចាប់អារម្មណ៍ និងទាក់ទាញមិត្ត​អ្នកអាននេះ រៀបរាប់តែអំពីបញ្ហាប្រឈម និងមហាឧបសគ្គរាប់ពាន់ជំពូក នៃដំណើរស្វែងរកសន្តិភាព របស់សម្តេច ហ៊ុន សែន កំពូលស្ថាបនិក និងបិតាសន្តិភាពរបស់កម្ពុជា ចន្លោះពីអំឡុងឆ្នាំ១៩៨៧ ដល់ឆ្នាំ១៩៩៣ ប៉ុណ្ណោះ ហើយ​សៀវភៅនេះដែរ នឹងបង្ហាញមិត្តអ្នកអាន អំពីភាពឆ្លាតវាងវៃដ៏អស្ចារ្យ គួរឱ្យស្ងើចសរសើរ របស់សម្តេចអគ្គ​មហា​សេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។

លោកទីប្រឹក្សាបញ្ជាក់ថា តាមពិតទៅសៀវភៅនេះ ពុំមានជារបកគំហើញថ្មីរបស់លោកទេ លោកគ្រាន់តែយកព្រឹត្តិ​ការណ៍ ដែលបានកើតឡើងអំឡុងឆ្នាំ១៩៨៧ ដល់ឆ្នាំ១៩៩៣ ដែលចងក្រងដោយឯកឧត្តម កែវ បាភ្នំ មកធ្វើ​បច្ចុ​ប្បន្នភាព និងរម្លេចឡើងវិញ ដើម្បីផ្សព្វផ្សាយជាសាធារណៈ ដើម្បីមិត្តអ្នកអាន និងសាធារណជនបានជ្រាបអំពី រឿងរ៉ាវ នៃយុទ្ធសាស្រ្ត និងភាពប៉ិនប្រសប់ដ៏អស្ចារ្យរបស់សម្តេច ហ៊ុន សែន ក្នុងការស្វែងរក និងការបញ្ចប់សង្រ្គាម​ទាំង​ស្រុង​នៅ​កម្បុជាតែប៉ុណ្ណោះ។

លោក ពៅ សុខ ពណ៌នាអំពីភាពអស្ចារ្យខ្លះៗនៅក្នុងសៀវភៅនេះថា ក្នុងដំណាក់កាល នៃដំណើរស្វែងសន្តិភាព​របស់​សម្តេចនាយករដ្ឋមន្រ្តី ហ៊ុន សែន គឺទោះបីសម្តេចជានាយករដ្ឋមន្រ្តីវ័យនៅក្មេងជាងគេ ដែលពិភពលោក​មិន​ដែលស្គាល់ក៏ដោយ។ ប៉ុន្តែតាមរយៈទេពកោសល្យ និងសិល្បៈ នៃការធ្វើនយោបាយ សម្តេចបានយកភាពអត់ធ្មត់​មក​​រម្លត់​ភាព​ក្រ​អឺតក្រទមរបស់គូបដិបក្ខ សម្តេចបានបំបែកមិត្តចេញពីសត្រូវ បានយកសត្រូវមកធ្វើមិត្តបំបែក​​យុទ្ធ​​សាស្រ្តកំពូលអ្នកនយោបាយនានា និងបញ្ចប់​ទស្សនៈរួមគោលដៅ តែមិនរួមដំណើររបស់គូបដិបក្ខ។

លោកអះអាងថា នៅមានយុទ្ធសាស្រ្ត សិល្បៈ និងទេពកោសល្យ នៃការធ្វើនយោបាយ ការទូត ការចរចា និងបញ្ហា​ប្រឈមនានាជាច្រើនទៀត របស់​សម្តេច ហ៊ុន សែន ដែល​នឹង​បង្ហាញនៅក្នុងសៀវភៅ (អ្នកយុទ្ធ​សាស្រ្ត វ័យ​ក្មេងនៅ​អាស៊ី)​នេះ។ ដូច្នេះ មិត្តអ្នកអាន ក៏ដូចជាសាធារណជនអាចនឹងស្ងប់ចិត្តក្រោយពេលបានអានសៀវភៅនេះរួច។

លោក ពៅ សុខ បញ្ជាក់ថា យុទ្ធសាស្រ្ត និងភាពឈ្លាសវៃមួយរបស់សម្តេច ហ៊ុន សែន ក្នុងចំណោមភាពឈ្លាវៃជា​ច្រើន​ទៀត គឺពេលមួយ ព្រះករុណា ព្រះបាទ សម្តេច ព្រះនរោត្តម សីហនុ ព្រះអង្គទាមទារ តម្រូវឲ្យមានការប្រ​ជុំ​រួមមួយ គឺចតុភាគី លើទឹកដីកម្ពុជា។ ប៉ុន្តែព្រះអង្គមិនយកទីតាំងប្រជុំ នៅភ្នំពេញ ឬលើទឹកដី ដែលគ្រប់គ្រងដោយ​សម្តេច ហ៊ុន សែន ឬសាធារណរដ្ឋប្រជាមានិតកម្ពុជាទេ តែព្រះអង្គក៏មិនជ្រើសរើសយកទីតាំង ដែលគ្រប់គ្រង​ដោយ​​ត្រីភាគី នៅជាយដែនដែរ ជាពិសេសព្រះអង្គមិនយកទីតាំងបរទេស សម្រាប់ប្រជុំ។ ការទាមទាររបស់ព្រះអង្គ គឺជាវិញ្ញាសា ដ៏លំបាកស្មុគស្មាញមួយសម្រាប់សម្តេច ហ៊ុន សែន។

ប៉ុន្តែ ដោយសារភាពឆ្លាតវៃរបស់សម្តេច សម្តេច ហ៊ុន សែន បានឆ្លើយតបយ៉ាងឆាប់រហ័ស ទៅ​ព្រះករុណាវិញដោយ​គ្មានការលំបាក គឺសម្តេចហ៊ុន សែន បានស្នើ​សុំ​រដ្ឋាភិបាលថៃ ឲ្យបើកស្ថានទូតកម្ពុជានៅប្រទេសថៃឡើងវិញ ព្រោះ​ក្នុងដំណាក់កាលនេះ ប្រទេសថៃ មិនទាន់ទទួល​ស្គាល់រដ្ឋាភិបាល សម្តេច ហ៊ុន សែន នៅឡើយទេ ហើយរៀបចំការ​ប្រជុំនៅក្នុងស្ថានទូតកម្ពុជា។

ការប្រជុំ ឬចរចា ចតុ​ភាគី នៅក្នុងស្ថានទូកម្ពុជាលើកទឹកដីថៃ គឺមានន័យថា ការជួបប្រជុំចរចាគ្នានៅ​លើទឹកដី​កម្ពុជា​។ តាម​សំណូម​ពរនេះ រដ្ឋាភិបាលថៃ របស់លោក ឆាតឆៃ ឈុនហាវ៉ាន់ បានយល់ព្រម និងបានជួយរៀបចំ​ជួសជុល​កែលម្អ​អតី​ត​ស្ថាន​​ទូតកម្ពុជាឡើងវិញ ដើម្បីរៀបចំការប្រជុំ ហើយដំណោះស្រាយ ដ៏លំបាកនេះ ក៏ត្រូវបានទទួល​យល់ព្រម​និង​ទទួលយក ​ពីព្រះ​ករុណា ព្រះបាទ នរោត្តម សីហនុ និងត្រីភាគីយ៉ាងក្លៀវក្លាដែរ។

ទីបញ្ចប់ លោក ពៅ សុខ មិនភ្លេចថ្លែងអំណរគុណ ដល់សាធារណជន និងមិត្តអ្នកអាន ដែលតែងតែគាំទ្រស្នាដៃ​របស់​លោក ជាពិសេសលោក សូមថ្លែងអំណរគុណយ៉ាងជ្រាលជ្រៅ ដល់សម្តេច ហ៊ុន សែន និងសម្តេចកិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ដែលផ្តល់ឱកាសឲ្យលោក បានរៀបរៀងចងក្រងសៀវភៅប្រវត្តិសាស្រ្ត ដ៏មានតម្លៃនេះ​ឡើង។ លោកក៏មិនភ្លេចអរគុណ ដល់ឯកឧត្តម កែវ បាភ្នំ ដែលជាអ្នករក្សាឯកសារ និងផ្តល់ឯកសារដ៏មានតម្លៃនេះ ដល់លោក ក្នុងការរៀបចំធ្វើបច្ចុប្បន្នភាព ឡើងវិញ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត
Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម