សត្វត្រដក់មានជោគវាសនាបែប​ណា បើឈ្មួញប្រើឧបករណ៍នេសាទខុសច្បាប់រីកដូចផ្សិត?

ខេត្តបាត់ដំបង÷ ក្នុងរយះពេលចុងក្រោយ​នេះ បទល្មើសនេសាទត្រូវបានសមត្ថកិច្ចចម្រុះចុះបង្ក្រាបជាបន្តបន្ទាប់។សមត្ថកិច្ចនិងមន្ត្រីពាក់ព័ន្ធបានផ្តើមការបង្ក្រាបកាប់និងដុតបំផ្លាញចោលនូវឧបករណ៍ខុសច្បាប់ រហូតចុងក្រោយថ្មីៗនេះ លោកអភិបាលស្រុកឯកភ្នំ ខេត្តបាត់ដំបង បានដឹកនាំកម្លាំងឯកភាពស្រុកចុះពិនិត្យ ជាមួយមន្ត្រីពាក់ព័ន្ធបានរកឃើញបទល្មើសចំនួន ១៦ ទីតាំងបន្ថែមទៀត និង​ឲ្យម្ចាស់បទល្មើសរុះរើដោយខ្លួនឯងឲ្យអស់ក្នុងរយះពេល៣ថ្ងៃ បើមិនដូច្នេះរដ្ឋបាល​ស្រុកចាត់ការតាមផ្លូវច្បាប់។

លោកឈឹម វិច្ឆរ៉ា ប្រធានមន្ទីរកសិកម្មរុក្ខាប្រម៉ាញ់ និងនេសាទខេត្តបានប្រាប់កម្ពុជាថ្មីនៅថ្ងៃទី០៩ខែវិច្ចកាថា បានដាក់វិធានការដោយតឹងតែងបំផុតរួចហើយទៅលើមន្ត្រីជំនាញស្តីពីវិធានការបន្ទាន់និងមានប្រសិទ្ធិភាពទៅលើបទល្មើសនេសាទ ដោយគ្មានការអត់ឱនឲ្យមន្ត្រីណាម្នាក់ ដែលជាប់ពាក់ព័ន្ធបទល្មើសមិនលើកលែងឡើយ។ បើសិនជារកឃើញ​នឹង​កសាងសំណុំរឿងចាត់ការតាមផ្លូវច្បាប់ទៅតុលាការ។

ក្នុងនោះលោកបានសំណូមពរដល់ប្រជាកសិករ ក៏ដូចជាប្រជានេសាទលក្ខណះគ្រួសារឲ្យចូលរួមសហការផ្តល់ពត៌មានផ្ទាល់ពីបទល្មើសនេសាទ និងអ្នកប្រព្រឹត្តកាប់ទន្ទ្រានដុតបំផ្លាញព្រៃលិចទឹក ក្នុងដែនត្រីពងយកធ្វើជាកម្មសិទ្ធផ្ទាល់ខ្លួនលោកនឹងចាត់ការភ្លាមៗផងដែ។

លោកបញ្ជាក់បន្ថែមថា ដើម្បីឲ្យមានប្រសិទ្ធភាពជាងនេះ ខាងមន្ទីរក្នុងឆ្នាំនេះបានទិញបង្គោលបានចំនួន៦០បង្គោលដោយបានចាប់ផ្តើមបោះបង្គោល ពីចំណុចឃុំឫស្សីក្រាំងក្នុងស្រុកមោងឫស្សីរហូតដល់ឃុំព្រៃចាស់ស្រុកឯកភ្នំរួចរាល់ហើយ ដើម្បីកំណត់ខ្សែបន្ទាត់ព្រំដែនជម្រកមច្ឆាជាតិបានច្បាស់លាស់ និង​បន្តបោះបង្គោលនៅឆ្នាំមុខឲ្យបានដល់ស្រុកថ្មគោលបន្ត​ទៀត។

លោកកត បូរ៉ា ប្រធានមន្ទីរបរិស្ថានខេត្តបានប្រាប់កម្ពុជាថ្មីថា ចំពោះសត្វស្លាបប្រភេទត្រដក់បានកើនឡើងក្នុងរយះពេល២ឆ្នាំជាប់គ្នា ស្របពេលរដូវនេះសត្វប្រភេទនេះវាកំពុងបន្តកាច់សំបុកបន្តពូជជាបន្តបន្ទាប់ផងដែរ។ តែលោកមិនបានបញ្ជាក់ពីការប៉ះពាល់ដល់ចំណីអាហាររបស់វានោះទេ ខណះត្រីចម្រុះត្រូវបានកាត់បន្ថយដោយឈ្មួញទុចរិត​ឃុបឃិតជាមួយមន្ត្រីខិលខូចមួយចំនួន៕

អត្ថបទ៖ សៅ សារិទ្ធ