​ក្រសួងការបរទេស ​ផ្សព្វផ្សាយសៀវភៅសិក្សាស្រាវជ្រាវ គាំទ្រកិច្ចប្រជុំកំពូលអាស៊ី-អឺរ៉ុប លើកទី១៣ ដែលកម្ពុជាធ្វើជាម្ចាស់ផ្ទះ

ក្រសួងការបរទេស និងសហប្រតិបត្តិការអន្តរជាតិកម្ពុជា នៅព្រឹកថ្ងៃទី ១១ ខែវិច្ឆិកា ឆ្នាំ ២០២១​នេះ បានរៀបចំ​​ផ្សព្វ ផ្សាយ «សៀវភៅសិក្សាស្រាវជ្រាវគាំទ្រ កិច្ចប្រជុំកំពូលអាស៊ី-អឺរ៉ុប លើកទី១៣» ក្រោមអធិបតីភាព​​លោក​ឧបនាយករដ្ឋមន្រ្តី​ ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ​​​នៅវិទ្យាស្ថានជាតិការទូត និងទំនាក់ទំនងអន្តរជាតិ។​

ថ្លែងក្នុងពិធីនោះ លោក​ឧបនាយករដ្ឋមន្រ្តី​ ប្រាក់ សុខុន ​បានលើកឡើងថា ចាប់ពីថ្ងៃនេះទៅ មានរយៈពេលមិនដល់ពីរសប្តាហ៍ទេ ​កម្ពុជានឹងមានកិត្តិយសធ្វើជាម្ចាស់ផ្ទះ រៀបចំកិច្ចប្រជុំកំពូលអាស៊ី-អឺរ៉ុបលើកទី ១៣ (ASEM13) ដែលនឹងប្រព្រឹត្តទៅតាមប្រព័ន្ធវីដេអូ ហើយលោកបាន​ឆ្លៀតយកឱកាស​នេះ រៀបចំពិធីផ្សព្វផ្សាយ សៀវភៅសិក្សាស្រាវជ្រាវគាំទ្រកិច្ចប្រជុំកំពូល ASEM13  ក្រោមចំណងជើងថា «កិច្ចប្រជុំអាស៊ី-អឺរ៉ុបលើកទី១៣៖ កិច្ចសហប្រតិបត្តិការពហុភាគីនិយម ដើម្បីអនាគតដែលមានភាពធន់ មានចីរភាព និងផ្អែកលើច្បាប់សម្រាប់ ASEM»។

លោកថា សៀវភៅនេះ គឺជាការបោះពុម្ពផ្សាយរួមគ្នា រវាងរាជរដ្ឋាភិបាលកម្ពុជា និងវិទ្យាស្ថានស្រាវ​ជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA) ដោយទទួលបានការសាទរយ៉ាងខ្លាំង ពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។​

បើតាមលោក​ឧបនាយករដ្ឋមន្រ្តី​ ប្រាក់ សុខុន​​ សៀវភៅនេះមានគោលបំណង បង្ហាញនូវមហិច្ឆតារបស់ ASEM ក្នុងការត្រួសត្រាយផ្លូវរបស់ស្ថាប័នមួយនេះ តាមរយៈកាលានុវត្តភាព និងបញ្ហាប្រឈមទូទៅនានានៅក្នុងពិភពលោក ដែលកំពុងមានការប្រែប្រួលយ៉ាងឆាប់រហ័ស នាពេលបច្ចុប្បន្ននេះ សំដៅសម្រេចបានអនាគតមួយ ប្រកបដោយបរិយាប័ន្ន ចីរភាព ភាពធន់ និងផ្អែកលើវិធានច្បាប់សម្រាប់ ASEM។

សៀវភៅនេះ ក៏បានគូសបញ្ជាក់ជាចម្បង លើមាគ៌ាធ្វើឲ្យប្រសើរឡើងវិញនូវពហុភាគីនិយម សម្រាប់កិច្ចសហប្រតិបត្តិការអាស៊ី-អឺរ៉ុប ឲ្យបានកាន់តែប្រសើរ និងរឹងមាំថែមទៀត។ សៀវភៅនេះ បានរួមបញ្ចូលនូវការគិតគូដ៏ហ្មត់ចត់តាមរយៈអត្ថបទនានា ដែលផ្តោតលើទិដ្ឋភាពសំខាន់ៗ ដោយរាប់ចាប់ពីការតភ្ជាប់ផ្នែកនយោបាយ និងរូបវ័ន្ត កិច្ចសហប្រតិបត្តិការសេដ្ឋកិច្ច និងហិរញ្ញវត្ថុ ការតភ្ជាប់រវាងស្ថាប័ន និងប្រជាជន រហូតដល់ការអភិវឌ្ឍប្រកបដោយចីរភាព។ សៀវភៅនេះទៀតសោត ក៏ផ្តល់នូវគំនិតល្អៗជាច្រើន ដើម្បីជំរុញ ASEM ឆ្ពោះទៅកាន់កិច្ចប្រជុំកំពូល នាពេលខាងមុខ។

ប្រមុខការទូតកម្ពុជា ​អះអាងថា ក្នុងរយៈពេល ​២៥ឆ្នាំកន្លងមកនេះ ASEM បានធ្វើឲ្យមានការផ្លាស់ប្តូរជាលក្ខណៈ ស្ថាប័នដ៏គួរឲ្យកត់សម្គាល់ និងបានចូលរួមដោះស្រាយបញ្ហាស្មុគស្មាញនានា នៅក្នុងតំបន់ និងសកល ដែលទាមទារឲ្យមានកិច្ចសហប្រតិបត្តិការជិតស្និទ្ធ រវាងបណ្តាប្រទេសនៃទ្វីបទាំងពីរ។ ទោះជាយ៉ាងណាក៏ដោយ ASEM មិនធ្លាប់ជួបប្រទះក្នុងការដោះស្រាយ​វិបត្តិសង្គម សេដ្ឋកិច្ច និងសុខភាពដ៏ធ្ងន់ធ្ងរមិនធ្លាប់មាន ក្នុងកម្រិតពិភពលោកដូចបច្ចុប្បន្ននេះទេ។ ជំងឺរាតត្បាតកូវីដ-១៩ បង្ហាញឲ្យឃើញថា ប្រធានបទនៃកិច្ចប្រជុំកំពូល ASEM13 គឺ «ការពង្រឹងពហុភាគីនិយម សម្រាប់កំណើនរួម» គឺពិតជាមានសារៈសំខាន់ ជាងពេលណាៗទាំងអស់។ ​

លោក​ឧបនាយករដ្ឋមន្រ្តី​ ប្រាក់ សុខុន ​បញ្ជាក់ថា ការធ្វើជាម្ចាស់ផ្ទះកិច្ចប្រជុំកំពូល ASEM13 ក្នុងអំឡុងពេលនៃជំងឺរាតត្បាតនេះ គឺជាឱកាសពិសេសសម្រាប់កម្ពុជា ដើម្បីលើកកម្ពស់កិច្ចប្រជុំកំពូលនេះ ឲ្យក្លាយជាវេទិកាមួយ សម្រាប់ថ្នាក់ដឹកនាំ ASEM ទាំងអស់ ដោះស្រាយបញ្ហាប្រឈមនៅក្នុងតំបន់ និងសកល រួមមាន៖ សុខភាពសាធារណៈ ការប្រែប្រួលអាកាសធាតុ កំណែទម្រង់អង្គការពាណិជ្ជកម្មពិភពលោក (WTO) បញ្ហាការងាររបស់យុវជន និងយេនឌ័រជាដើម៕

អត្ថបទ៖ កោះកែវ