កម្ពុជាគាំទ្រដំណោះស្រាយដោយសន្តិវិធី ក្នុងជម្លោះអាម៉េរិក-អ៊ីរ៉ង់ ខណៈឈានដល់ការចុះកិច្ចព្រមព្រៀងសន្តិភាព

នៅថ្ងៃទី១៩ ខែមិថុនា ឆ្នាំ២០២៦ ក្រសួងការបរទេសកម្ពុជា តាមរយៈអ្នកនាំពាក្យ បានចេញសេចក្តីថ្លែងការណ៍ទាក់ទងទៅនឹងកិច្ចព្រមព្រៀងសន្តិភាពកាលពីពេលថ្មីៗនេះរវាងសហរដ្ឋអាម៉េរិក និងរដ្ឋអ៊ីស្លាមអ៊ីរ៉ង់។ ក្រសួងការបរទេស បានបង្ហាញពីការស្វាគមន៍របស់កម្ពុជាចំពោះកិច្ចព្រមព្រៀងដែលសម្រេចបាននេះក្នុងការពង្រឹងបទឈប់បាញ់ កាត់បន្ថយភាពតានតឹង រួមទាំងការបើកច្រកសមុទ្រ Hormuz ឡើងវិញ។

សេចក្ដីថ្លែងការណ៍របស់អ្នកនាំពាក្យក្រសួងការបរទេស បានបញ្ជាក់ថា កម្ពុជាតែងតែគាំទ្រជានិច្ចនូវការដោះស្រាយជម្លោះដោយសន្តិវិធី តាមរយៈការសន្ទនា ការទូត និងគោរពគ្នាទៅវិញទៅមក។ កម្ពុជា ក៏កោតសរសើរចំពោះកិច្ចខិតខំប្រឹងប្រែងរបស់គ្រប់ភាគីពាក់ព័ន្ធទាំងអស់ ដែលបានចូលរួមចំណែកក្នុងដំណើរការសម្របសម្រួល រហូតនាំឱ្យសម្រេចបាននូវសមិទ្ធផលដ៏សំខាន់នេះ។

ក្នុងសេចក្ដីថ្លែងការណ៍ដដែល កម្ពុជា ក៏សង្ឃឹមថា កិច្ចព្រមព្រៀងនេះនឹងត្រូវបានអនុវត្តដោយសុច្ឆន្ទៈ និងទៅរកសន្តិភាពយូរអង្វែង។ ចំពោះការបើកច្រកសមុទ្រ Hormuz ឡើងវិញ ក្រសួងការបរទេស ថា នឹងជួយស្តារទំនុកចិត្តឡើងវិញនៅក្នុងខ្សែច្រវាក់ផ្គត់ផ្គង់សកល និងរួមចំណែកដល់ស្ថិរភាពនៅក្នុងទីផ្សារថាមពលអន្តរជាតិ។

សេចក្ដីថ្លែងការណ៍ លើកឡើងថា «កម្ពុជាជឿជាក់ថា សន្តិភាព ស្ថិរភាព និងសេរីភាពនៃការធ្វើនាវាចរណ៍នៅតំបន់មជ្ឈិមបូព៌ាគឺមានសារៈសំខាន់យ៉ាងខ្លាំងសម្រាប់សន្តិសុខក្នុងតំបន់ និងពិភពលោក កំណើនសេដ្ឋកិច្ច ពាណិជ្ជកម្មអន្តរជាតិ និងវិបុលភាពរួម»។

កម្ពុជាលើកទឹកចិត្តឱ្យគ្រប់ភាគីទាំងអស់បន្តកសាងសន្ទុះវិជ្ជមាននេះ តាមរយៈការសន្ទនាប្រកបដោយ ចីរភាព និងការចូលរួមប្រកបដោយការស្ថាបនា ក្នុងគោលបំណងលើកកម្ពស់សន្តិភាព និងស្ថិរភាពយូរអង្វែង នៅមជ្ឈិមបូព៌ា និងក្នុងពិភពលោក៕