វៀតណាមផ្ដល់មេដាយដល់អតីតឯកអគ្គរាជទូតកម្ពុជា លោកស្រី ជា គឹមថា ក្នុងការរួមចំណែករឹតចំណងកម្ពុជា-វៀតណាម

លោកស្រី ជា គឹមថា ទីប្រឹក្សាក្រសួងការបរទេស និងជាអតីតឯកអគ្គរាជទូតកម្ពុជាប្រចាំប្រទេសវៀតណាម ទទួលបានមេដាយមិត្តភាព Order of Friendship ដែលផ្តល់ជូនដោយប្រធានរដ្ឋវៀតណាម។ ពិធីបំពាក់មេដាយនេះ ត្រូវបានធ្វើឡើងកាលពីព្រឹកថ្ងៃទី១៧ ខែមិថុនា ឆ្នាំ២០២៦ នៅស្ថានទូតវៀតណាម ក្នុងរាជធានីភ្នំពេញ ដោយលោក ង្វៀន មិញវូ ឯកអគ្គរដ្ឋទូតវៀតណាមប្រចាំកម្ពុជា។

ការប្រគល់ជូននូវមេដាយខាងលើ គឺជាការទទួលស្គាល់របស់រដ្ឋាភិបាលវៀតណាមចំពោះការចូលរួមចំណែកយ៉ាងសកម្មរបស់លោកស្រី ជា គឹមថា  ក្នុងការពង្រឹងចំណងមិត្តភាព សាមគ្គីភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែងរវាងកម្ពុជា និងវៀតណាម អំឡុងពេលបំពេញបេសកកម្មការទូតរបស់លោកស្រី នៅប្រទេសវៀតណាម ចាប់ពីខែកុម្ភៈ ឆ្នាំ២០២៣ ដល់ខែកុម្ភៈ ឆ្នាំ២០២៦។

លោកស្រី ជា គឹមថា បានក្លាយជាឯកអគ្គរាជទូតស្ត្រីដំបូងគេរបស់កម្ពុជាប្រចាំនៅប្រទេសវៀតណាម រាប់ចាប់ពីថ្ងៃដែលកម្ពុជា និងវៀតណាម បានបង្កើតទំនាក់ទំនងការទូតជាមួយគ្នា នៅឆ្នាំ១៩៦៧។ បច្ចុប្បន្ន បន្ទាប់ពីលោកស្រី ជា គឹមថា ដែលត្រូវបានផុតអាណត្តិ តំណែងជាឯកអគ្គរាជទូតប្រចាំនៅប្រទេសជិតខាងកម្ពុជាមួយនេះ ត្រូវបានជំនួសដោយលោកស្រី ទូច សុផារត្ន។ លោកស្រី ទូច សុផារត្ន គឺជាឯកអគ្គរាជទូតស្ត្រីទី២របស់កម្ពុជាប្រចាំនៅប្រទេសវៀតណាម៕

ដោយ៖ ធឿន វ៉ាន់សុង