ព័ត៌មានជាតិ

ក្រសួងអប់រំនឹងដាក់ពង្រាយអប្បមាទជាង២ពាន់នាក់ ត្រួតពិនិត្យដំណើរការប្រឡងបាក់

បានផុស

៥ years មុន

នៅ

ថ្ងៃព្រហស្បតិ៍ ២ ធ្នូ ២០២១

ដោយ

ក្រសួងអប់រំយុវជននិងកីឡា នឹងដាក់ពង្រាយគណៈកម្មការអប្បមាទនិងជំនួយការអប្បមាទជាង២ពាន់នាក់នៅតាមបន្ទប់ប្រឡងនានាដើម្បីត្រួតពិនិត្យដំណើរការប្រឡងបាក់ឌុបនាពេលខាងមុខនេះសំដៅឲ្យដំណើរការប្រឡងប្រព្រឹត្តទៅប្រកបដោយស្តង់ដារខ្ពស់យុត្តិធម៌ តម្លាភាពនិងអាចទទួលយកបានទាំងអស់គ្នា។

លោករស់ សុវាចា អ្នកនាំពាក្យក្រសួងអប់រំយុវជននិងកីឡា ធ្លាប់បានមានប្រសាសន៍នៅយប់ថ្ងៃទី០២ធ្នូនេះថា ការប្រឡងសញ្ញាប័ត្រមធ្យមសិក្សាទុតិយភូមិ ឬ បាក់ឌុបនៅឆ្នាំនេះនឹងប្រព្រឹត្តិទៅនៅថ្ងៃទី២៧ ខែធ្នូ ឆ្នាំ២០២១ ដោយក្រសួងនឹងដាក់ពង្រាយគណៈកម្មការអប្បមាទនិងជំនួយការអប្បមាទជាង២ពាន់នាក់ នៅតាមបន្ទប់ប្រឡងនានាក្នុងនោះមានគណៈកម្មការអប្បមាទមានចំនួន៦១២នាក់និងអប្បមាទចំនួន១៥៧៨នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម លោក បណ្ឌិត សភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំយុវជននិងកីឡាធ្លាប់បានមានប្រសាសន៍ថា ជំនួយការអប្បមាទនេះ មានតួនាទីជាសេនាធិការឲ្យប្រធានគណៈកម្មការអប្បមាទទូទាំងប្រទេសប្រចាំមណ្ឌលសំណេរលើការត្រួតពិនិត្យនិងសង្កេតដំណើរការប្រឡងប្រចាំមណ្ឌលដោយជំនួយការអប្បមាទចំនួន១នាក់សម្រាប់ទទួលខុសត្រូវ២បន្ទប់ប្រឡង។

លោករដ្ឋមន្ត្រីបានបន្តថា ជំនួយការអប្បមាទនេះត្រូវបានជ្រើសរើសចេញពីគរុសិស្ស និងគរុនិស្សិតដែលមានភាពហ្មត់ចត់ភាពស្មោះត្រង់ សុចរិតភាព ស្នាដៃល្អនិងមានស្មារតីទទួលខុសត្រូវខ្ពស់យកមកបណ្តុះបណ្តាលដើម្បីឱ្យពួកគាត់មានសមត្ថភាពពេញលេញសម្រាប់ត្រួតពិនិត្យដំណើរការប្រឡងនៅតាមបន្ទប់ប្រឡងនានា។

លោក រស់ សុវាចា មានបន្តទៀតថា សម្រាប់ថាសម្រាប់ការប្រឡងបាក់ឌុបនៅឆ្នាំនេះមានបេក្ខជនដាក់ពាក្យប្រឡងចំនួន១១៥១៤៩នាក់ បេក្ខនារី៦០៦៨២នាក់, បេក្ខជនស្វៃរិន៤៣៣៤នាក់(នារី១៧៦២នាក់), បេក្ខជនបំពេញវិជ្ជា៣៤៦១នាក់ (នារី១០៥៣នាក់),បេក្ខជនស្វៃរិន-បំពេញវិជ្ជា ២០៤៣នាក់(នារី៤៦៨នាក់)ចែកជា២០៤មណ្ឌលស្មើនឹង៤៦៥២បន្ទប់។

លោកបានបន្ថែមទៀតថា ការប្រឡងសញ្ញាប័ត្រមធ្យមសិក្សាទុតិយភូមិ ឬ បាក់ឌុបនៅឆ្នាំនេះនឹងត្រូវកិលកាលបរិច្ឆេទពីថ្ងៃទី៦ធ្នូទៅធ្វើនៅថ្ងៃទី២៧ ខែធ្នូ ឆ្នាំ២០២១វិញតាមទម្រង់ដូចឆ្នាំកន្លងមក ដើម្បីទុកពេលវេលាឱ្យសិស្សរៀនបានច្រើនដើម្បីត្រៀមប្រឡង។

លោកបានបន្តទៀតថា ទោះបីជាមានការពន្យារពេលក្តី ក៏ការប្រឡងបាក់ឌុបត្រូវបន្តអនុវត្តន៍គោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របនឹងវិធានការសុវត្ថិភាពសុខភាព។

នៅក្នុងដំណើរការប្រឡបាក់ឌុបនេះដែរ លោកឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានណែនាំដល់អាជ្ញាធរ កងកម្លាំងមានសមត្ថកិច្ច និងមន្ត្រីពាក់ព័ន្ធទាំងអស់ ធ្វើយ៉ាងណារក្សាសន្តិសុខ សុវត្ថិភាព សណ្តាប់ធ្នាប់ក្នុងការប្រឡងសញ្ញាប័ត្រមធ្យមសិក្សាទុតិយភូមិឲ្យទទួលបានការជោគជ័យ។ ដោយត្រៀមលក្ខណៈការពារដូចជា ការពារការដឹកជញ្ជូនវិញ្ញាសា ,ការពារទីកន្លែងទុកដាក់វិញ្ញាសា,និងការពារបរិវេណមណ្ឌលប្រឡង៕

ដោយ ៖ សំអឿន