ខេត្តរតនគិរី៖ ស្ត្រីជនជាតិដើមភាគតិច ចារាយ ម្នាក់ បានឈឺពោះ ហើយបានសម្រាលកូននៅ ក្នុងផ្ទះរបស់ខ្លួន ខណៈអាជ្ញាធរបានហៅ ឡានពេទ្យរបស់មណ្ឌលសុខភាព ប៉ុន្តែទៅ មិនទាន់។

លោក សូយ សំណាង អធិការនគរបាលស្រុកអូរយ៉ាដាវ បានឱ្យ “កម្ពុជាថ្មី” ដឹងតាមប្រព័ន្ធទូរសព្ទនៅ រសៀលថ្ងៃទី ១៣​ ខែធ្នូនេះ ថា ដោយមានការស្នើសុំពីលោកស្រីអនុប្រធានភូមិឡំ លោកអធិការ និងកម្លាំងប្រចាំចំនួន២នាក់ គឺ លោកអនុសេនីយ៍ឯក សូម សន និង លោកអនុសេនីយ៍ទោ ពូយ ហ្វែន នៅ ម៉ោង ៨កន្លះ យប់មិញ បានយករថយន្តស៊ីរ៉ែន ទៅ ជួយដឹកស្ត្រីឈឺពោះឈ្មោះ រម៉ាម អ៊ីម អាយុ ៣៦ ឆ្នាំ ជនជាតិចារាយ រស់នៅ ភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ដើម្បីមកឆ្លងទន្លេនៅ មណ្ឌលសុខភាពស្រុក។​

លោក សូយ សំណាង បានឱ្យដឹងបន្ថែមថា ប៉ុន្តែនៅ ពេលកម្លាំងបានចុះទៅ ដល់ផ្ទះស្ត្រីឈឺពោះនោះ គាត់បានសម្រាលកូនរួចរាល់ហើយ ដោយឆ្មបបុរាណទៅ សម្រាលកូនឱ្យ ហើយមិនបានដឹកមកមណ្ឌលសុខភាពទេ។

លោកអធិការនគរបាលស្រុកអូរយ៉ាដាវ រូបនេះ បញ្ជាក់ថា នេះជាទំនៀមទម្លាប់ប្រពៃណីរបស់បងប្អូនជនជាតិដើមភាគតិច (ត្រណម)។ ស្ត្រីដែលបានសម្រាលកូននោះ រួមទាំងទារក មានសុវត្ថិភាពទាំងម្តាយ និងកូន។

គួរបញ្ជាក់ថា ទារកនេះ ជាកូនទី៣ របស់ស្រ្តីជនជាតិដើមភាគតិច ចារាយ ខាងលើ ដោយកូនទី១ និងទី២ ជាកូនស្រីទាំង២៕

អត្ថបទ៖ វុទ្ធឦសាន