​កម្មវិធី​ប្រណាំង​ខ្លែងឯក​ បង្ហាញ​ឱ្យយុវជន​ជំនាន់​ក្រោយ​ចងចាំវប្បធម៌ខ្មែរ​

កម្មវីធីជួបជុំប្រណាំងក្លែង និងល្បែងប្រណាំងមួយចំនួនទៀត ដែលជាការរៀបចំ ឡើងដោយព្រះសហគមន៍កាតូឡិចកម្ពុជា នៅ​ក្នុង​​ភូមិ​ពង​ទឹក​ខាង​ត្បូង ឃុំ​គុស​ ស្រុក​ត្រាំកក់ ខេត្ត​តាកែវ​ ដើម្បីអបអរឆ្នាំសកលថ្មី ២០២២ និងការថែរក្សាការពារវប្បធម៌ខ្មែរ។

លោក មាគ​ ស៊ន ​ប្រធាន​មណ្ឌល​សិប្បកម្ម​ដូង​តាកែវ ប្រាប់កម្ពុជាថ្មីថា កម្មវិធីនេះ នឹងរៀបចំឡើង​រយៈពេលពេញ១ ថ្ងៃ នៅថ្ងៃទី ៨ ខែមករា ឆ្នាំ ២០២២ នៅភូមិពងទឹកខាងត្បូង ឃុំ​គុស​ ស្រុក​ត្រាំកក់ ខេត្ត​តាកែវ​។

លោកបញ្ជាក់ថា “កម្មវិធិនេះជាគម្រោងរបស់ព្រះស​ហគមន៍កាតូឡិច រៀបចំឡើងដើម្បីអបអរឆ្នាំថ្មី និងឱ្យប្រជាជននៅក្នុងតំបន់ រីករាយនៅក្នុងឱកាសដែលពួកគាត់ប្រមូលផលស្រូវរួចរាល់ ព្រមទាំងការអបអរការចូលរួមថែរក្សាការពារវប្បធម៌ខ្មែរ ដែលមានការប្រណាំងខ្លែង ឱ្យអ្នកជំនាន់​ក្រោយស្គាល់ពីវប្បធម៌យើងដូច្នេះ”។

សូមជំរាបថា ខ្លែងដែលនឹងត្រូវដាក់ចូលរួមប្រកួតក្នុងកម្មវិធី នៅថ្ងៃទី ៨ ខែមករា ខាងមុខនេះ មានប្រមាណ ១៣០ ដែលការរៀបចំប្រកួតនេះ មានវគ្គជម្រុះជ្រើសរើសតែលេខ ១ ដល់លេខ ៥ ទើបចែករង្វាន់ ដែលអ្នកទទូលបានលេខ ១ បានទឹកប្រាក់ចំនួន ៦៥ ដុល្លារ ព្រមទាំងអ្នកមាន​លេខរៀងបន្តបន្ទាប់ចុះមក។ សម្រាប់ឆ្នាំ ២០២២ នេះ មានសេះ ១២ ក្បាល និងក្របីចំនួន ៦ ក្បាលក្នុងការដាក់ប្រណាំងក្នុងកម្មវិធីផងដែរ៕

អត្ថបទ៖ ឡេង ដេត