អាជ្ញាធរ ខេត្តកំពង់ចាម គ្រោងអភិវឌ្ឍសួនលំហែមាត់ទន្លេពីចំណុចគល់ស្ពានគីហ្សូណា ដល់ផ្សារ៧ មករា

អាជ្ញាធរខេត្តកំពង់ចាម គ្រោងនឹងរៀបចំអភិវឌ្ឍសួនលំហែរមាត់ទន្លេ ចាប់ពីចំណុចគល់ស្ពានគីហ្សូណា ដល់ផ្សារ៧ មករា ដើម្បីពង្រីកសក្ដានុពលអេកូទេសចរណ៍ឱ្យស័ក្តិសមជាទីក្រុងដែលធ្លាប់ទទួលបានជ័យលាភីរំដួល៣ទង ក្នុងការប្រឡងប្រណាំងទីក្រុងស្អាត និងដើម្បីជាការទាក់ទាញដល់ភ្ញៀវទេសចរជាតិជាតិ-អន្តរជាតិឱ្យមកលេងកម្សាន្តក្នុងខេត្តជាប់ដងទន្លេមេគង្គដ៏ស្រស់ត្រកាល ប្រកបដោយសុខសុវត្ថិភាព និងផាសុខភាព។

លោក អ៊ុន ចាន់ដា អភិបាលខេត្តកំពង់ចាម បានបើកកិច្ចប្រជុំពិភាក្សាស្ដីពីការរៀបចំអភិវឌ្ឍសួនលំហែរមាត់ទន្លេមេគង្គនេះកាលពីថ្ងៃទី០៨ ខែកុម្ភៈ ឆ្នាំ២០២២។  យោងតាមគម្រោងប្លង់ ការអភិឌ្ឍន៍សួនច្បារមាត់ទន្លេក្នុងក្រុងកំពង់ចាមនេះ គឺនឹងមានកន្លែងអាហារដ្ឋានលើទឹក បឹងហ្គាឡូ និងអាហារដ្ឋានសម្រាប់ភ្ញៀវជួលស្នាក់នៅ ក្លឹបហាត់ប្រាណ ផាប់  សួនច្បារ សួនបន្លែ កន្លែងថតរូប កន្លែងជិះឡានបុកគ្នា កន្លែងភិចនិច និងកញ្ចុះអង្គុយលេង ផ្សារអាហារ និងក្លិបកម្សាន្ត។

បន្ទាប់ពីបានពិភាក្សាជាមួយថ្នាក់ដឹកនាំ និងអ្នកវិនិយោគទាក់ទិនទៅនឹងគម្រោងប្លង់ខាងលើនេះ អភិបាលខេត្តកំពង់ចាម លោក អ៊ុន ចាន់ដា បានសម្រេចឲ្យម្ចាស់វិនិយោគធ្វើការកែប្រែប្លង់នូវទីកន្លែងសាងសង់មួយចំនួន រួចហើយនឹងលើកយកមកពិភាក្សាម្ដងទៀតនៅពេលក្រោយ ៕

ដោយ ៖ ហុង  ម៉េង ហៀ