ប្រជាពលរដ្ឋនៅភ្នំពេញ អាចទទួលវ៉ាក់សាំងដូសទី ៤ ចាប់ពីថ្ងៃទី ១១ ខែកុម្ភៈ នេះតទៅ

ក្រសួងសុខាភិបាល នៅរសៀលនេះ បានសេចក្ដីជូនព័ត៌មាន ស្ដីពី ការក្រើនរំលឹកនៃការចាក់វ៉ាក់សាំងកូវីដ-១៩ ដូសទី៣ ឬដូសជំរុញនៅទូទាំងប្រទេស និងបន្តការចាក់វ៉ាក់សាំងកូវីដ-១៩ ដូសទី៤ ជូនប្រជាពលរដ្ឋទូទៅដែលដល់វេននៅរាជធានីភ្នំពេញ ចាប់ពីថ្ងៃទី ១១ ខែកុម្ភៈ ឆ្នាំ២០២២ នេះតទៅ។

ក្រសួងសុខាភិបាលបញ្ជាក់ថា ដោយរាជធានីភ្នំពេញបានផ្ដល់ការចាក់វ៉ាក់សាំងកូរ៉ដ-១៩ ដូសទី៣ ឬដូសជំរុញ ជូនប្រជាពលរដ្ឋទូទៅ ដែលមានអាយុ ចាប់ពី១៨ឆ្នាំឡើងមុនគេនោះ គណៈកម្មការចំពោះកិច្ចចាក់វ៉ាក់សាំង កូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) នឹងផ្តល់ការចាក់វ៉ាក់សាំងកូវីដ-១៩ ដូសទី៤ ជូនដល់ប្រជាពលរដ្ឋទូទៅដែលមានអាយុ ចាប់ពី១៨ឆ្នាំឡើង នៅរាជធានីភ្នំពេញ ចាប់ពីថ្ងៃទី១១ ខែកុម្ភៈ ឆ្នាំ២០២២ នេះតទៅ។ ដូចនេះ ប្រជាពលរដ្ឋ ដែលបានចាក់វ៉ាក់សាំងកូវីដ-១៩ ដូសទី៣ ឬដូសជំរុញរួច ហើយមានគម្លាតចាប់ពី៤ខែឡើង បន្ទាប់ពីការចាក់វ៉ាក់សាំងកូរ៉ដ-១៩ ដូសទី៣ ឬដូសជំរុញរួច ត្រូវទៅចាក់វ៉ាក់សាំងកូវីដ-១៩ ដូសទី៤ នៅតាមមន្ទីរពេទ្យបង្អែក មណ្ឌលសុខភាព និងទីតាំងចាក់ វ៉ាក់សាំងកូវីដ-១៩ ដែលរៀបចំជូនដោយរដ្ឋបាលរាជធានីភ្នំពេញ ហើយរដ្ឋបាលរាជធានីភ្នំពេញ នឹងរៀបចំសេចក្តីជូនព័ត៌មានជូនសាធារណជនជ្រាបផងដែរ។

ដោយឡែកមន្ទីរពេទ្យជាតិទាំង៥ រួមមានមន្ទីរពេទ្យកាល់ម៉ែត មន្ទីរពេទ្យព្រះអង្គឌួង មន្ទីរពេទ្យកុមារជាតិ មជ្ឈមណ្ឌលជាតិគាំពារមាតា និងទារក និងមន្ទីរពេទ្យមិត្តភាពខ្មែរ-សូវៀត ត្រូវបន្តចាក់វ៉ាក់សាំងកូវីដ-១៩ ដូសទី៤ ជូនមន្ត្រី រាជការថ្នាក់ជាតិ ជនវ័យចាស់ ក៏ដូចជាជនមានហានិភ័យខ្ពស់ ដែលនៅសេសសល់ ប៉ុន្តែបើមានប្រជាពលរដ្ឋទៅទទួលការចាក់ វ៉ាក់សាំងកូវីដ-១៩ ដួសទី៤ មន្ទីរពេទ្យជាតិអាចចាក់ជូនពួកគាត់បាន។

គ.វ.ក-១៩ សូមក្រើនរំលឹកថា ចំពោះបងប្អូនប្រជាពលរដ្ឋដែលត្រូវមកទទួលការចាក់វ៉ាក់សាំងកូវីដ-១៩ ដូសទី៤ ត្រូវភ្ជាប់ ជាមួយនូវឯកសារដូចខាងក្រោម៖

– ប័ណ្ណចាក់វ៉ាក់សាំងកូវីដ-១៩ ដែលចេញដោយក្រសួងសុខាភិបាល ឬប័ណ្ណចាក់វ៉ាក់សាំងកូវីដ-១៩ ដែលចេញដោយក្រសួងការពារជាតិ

– អត្តសញ្ញាណប័ណ្ណសញ្ជាតិខ្មែរ ឬឯកសារដែលប្រើប្រាស់ក្នុងការចុះឈ្មោះ ពេលចាក់វ៉ាក់សាំង កូវីដ-១៩ ដួសទី១។

គ.វ.ក-១៩ សូមស្នើឱ្យរដ្ឋបាលរាជធានី-ខេត្ត និងអាជ្ញាធរមូលដ្ឋានគ្រប់លំដាប់ថ្នាក់ នៅទូទាំងប្រទេស ចាត់ចែងកៀរគរ ប្រជាជនដែលដល់វេនចាក់វ៉ាក់សាំងកូវីដ-១៩ ដូសទី៣ ឬដូសជំរុញ ហើយមិនទាន់បានចាក់វ៉ាក់សាំងកូវីដ-១៩ ដូសទី៣ ឬ ដូសជំរុញ ក៏ដូចជាដូសទី៤ នៅតាមមូលដ្ឋានរបស់ខ្លួនឱ្យមកទទួលយកការចាក់វ៉ាក់សាំងកូវីដ-១៩. ដូសជំរុញនេះឱ្យបានគ្រប់គ្នា និងឱ្យបានលឿន។

ទន្ទឹមគ្នានេះដែរ គ.វ.ក-១៩ បានបញ្ជាក់ថា ទោះបីជាបុគ្គលម្នាក់ៗបានទទួលការចាក់វ៉ាក់សាំងកូវីដ-១៩ រួចរាល់ហើយក្តី ក៏ត្រូវបន្តអនុវត្តនូវវិធានការ “៣ការពារ” (ពាក់ម៉ាស់ លាងដៃញឹកញាប់ និងរក្សាគម្លាតសុវត្ថិភាពបុគ្គលពី មួយម៉ែត្រកន្លះឡើងទៅ) និង “៣កុំ” (កុំទៅកន្លែងដែលមានមនុស្សច្រើនកុះករ កុំទៅកន្លែងដែលបិទជិតគ្មានខ្យល់ចេញចូល កុំប៉ះពាល់គ្នា កុំចាប់ដៃគ្នា កុំកៀកស្មាគ្នា) និងបន្តរួមគ្នាអនុវត្តតាមយុទ្ធនាការជាតិអប់រំក្រោមប្រធានបទ “រួមគ្នា ទទួលខុសត្រូវទប់ស្កាត់ការចម្លងវីរុសកូរ៉ដ-១៩ ក៏ដូចជាគោរពតាមសេចក្ដីណែនាំក្រើនរំលឹកចុះថ្ងៃទី០៨ ខែកុម្ភៈ ឆ្នាំ២០២២ របស់ក្រសួងសុខាភិបាល ស្តីពីការបន្តការការពារការចម្លងវីរុសកូវីដ-១៩ ជាពិសេស អូមីក្រុង ដើម្បីចូលរួមទប់ស្កាត់ការចម្លងវីរុសកូវីដ-១៩ នៅក្នុងសហគមន៍កម្ពុជា និងរក្សានិរន្តរភាព នៃការរស់នៅតាមគន្លងប្រក្រតីថ្មីក្នុងបរិបទនៃការប្រយុទ្ធនឹងជំងឺកូវីដ-១៩។

គួរបញ្ជាក់ថា ការផ្ដល់វ៉ាក់សាំងដូសទី ៤ នេះ យោងតាមអនុសាសន៍របស់ សម្តេចតេជោនាយករដ្ឋមន្រ្តី ក្នុងពិធីសម្ភោធដាក់ឱ្យប្រើប្រាស់ជា ផ្លូវការនូវកំណាត់ផ្លូវជាតិលេខ៥ ពីបាត់ដំបង ទៅក្រុងសិរីសោភ័ណ ខេត្តបន្ទាយមានជ័យ កាលពីថ្ងៃទី១០ ខែមករា ឆ្នាំ២០២២។ បច្ចុប្បន្ននេះ គ.វ.ក-១៩ កំពុងបន្តការចាក់វ៉ាក់សាំងកូវីដ-១៩ ដូសទី៤ ជូនមន្ត្រីរាជការជួរមុខ រហូតដល់អាជ្ញាធរមូលដ្ឋាន ជនវ័យចាស់ និងជនដែលមានហានិភ័យខ្ពស់ជាដើម ដោយប្រើវ៉ាក់សាំង Pfizer នៅរាជធានីភ្នំពេញ ដូចនេះសូមមន្ត្រីរាជការថ្នាក់ជាតិ និងមន្ត្រីរាជការក្រោមឱវាទរដ្ឋបាលរាជធានីភ្នំពេញ រហូតដល់អាជ្ញាធរ មូលដ្ឋាន ព្រមទាំងជនវ័យចាស់ ក៏ដូចជាជនដែលមានហានិភ័យខ្ពស់ ដែលមិនទាន់បានទទួលការចាក់វ៉ាក់សាំងកូវីដ-១៩ ដួសទី៤ សូមអញ្ជើញរួសរាន់ទៅទទួលយកការចាក់វ៉ាក់សាំងកូវីដ-១៩ ដូសទី៤ ឱ្យបានគ្រប់ៗគ្នា នៅតាមទីតាំងដែលបានជម្រាបជូនក្នុង សេចក្តីជូនព័ត៌មានរបស់ គ.វ.ក-១៩ លេខ ០១៥/២២ គ.វ.ក-១៩ ចុះថ្ងៃទី០៨ ខែមករា ឆ្នាំ២០២២៕

អត្ថបទ៖ ច័ន្ទ ​វីរៈ