គម្រោងសាងសង់អាកាសយានដ្ឋានអន្តរជាតិតេជោ សាងសង់បាន ៣២% ចំណាយ ៤១៤ លានដុល្លារ

គម្រោងអាកាសយានដ្ឋានអន្តរជាតិតេជោបច្ចុប្បន្នសម្រេចបាន​ ៣២% ហើយដែលបានចំណាយទឹកប្រាក់សរុប ៤១៤ លានដុល្លារអាមេរិក ដែលការចំណាយនេះដោយមិនរាប់បញ្ចូលថ្លៃដីដែលវិនិយោគរួចដោយ Cambodia Airport Investment Co., Ltd (CAIC)។ នេះបើយោងតាមការឱ្យដឹងពីក្រុមហ៊ុន CAIC។

CAIC គឺជាក្រុមហ៊ុនបណ្តាក់ទុនរួមគ្នារវាងរាជរដ្ឋាភិបាលកម្ពុជា ដែលតំណាងដោយរដ្ឋលេខាធិកាដ្ឋានអាកាសចរស៊ីវិលនិងក្រុមហ៊ុន OCIC។ រាជរដ្ឋាភិបាលកម្ពុជាបានផ្តល់សិទ្ធិឱ្យក្រុមហ៊ុន CAIC ក្នុងការកាន់កាប់រចនាប្លង់ សាងសង់ ធ្វើហិរញ្ញប្បទាន និងគ្រប់គ្រងប្រតិបត្តិការគម្រោងអាកាសយានដ្ឋានអន្តរជាតិតេជោ។

សូមជម្រាបថា អាកាសយានដ្ឋានអន្តរជាតិតេជោ បានចាប់ផ្តើមសាងសង់កាលពីខែមករា ឆ្នាំ២០២០ ដោយចែកចេញជា ៣ ដំណាក់កាល ក្នុងនោះទីតាំងស្ថានីយទី១ នឹងសាងសង់រួចរាល់នៅឆ្នាំ ២០២៣ ខាងមុខ ដោយនឹងអាចទទួលអ្នកដំណើរបានប្រមាណ ១៣ លាននាក់ក្នុងមួយឆ្នាំ។ ឯស្ថានីយតំណាក់កាលទី២ នឹងបញ្ចប់នៅឆ្នាំ ២០៣០ អាចទទួល បានអ្នកដំណើរប្រមាណ ៣០ លាននាក់ក្នុង ១ឆ្នាំ និងដំណាក់កាលចុងក្រោយនឹងបញ្ចប់នៅឆ្នាំ ២០៥០ ដែលអាចនឹងទទួលបានអ្នកដំណើររហូតដល់ ៥០ លាននាក់ ក្នុងមួយឆ្នាំ។ គម្រោងទាំងមូលនឹងត្រូវចំណាយទឹកប្រាក់សរុប ១.៥០០ លានដុល្លារ មិនបូកបញ្ចូលតម្លៃដី៕

អត្ថបទ៖ ណារី