ព័ត៌មានជាតិ

រដ្ឋាភិបាលតែងតាំងគណៈកម្មការ អភិវឌ្ឍព្រលានយន្តហោះភ្នំពេញ ទៅជាសួនសាធារណៈ

បានផុស

៦ ខែ មុន

នៅ

ថ្ងៃអង្គារ ២០ មករា ២០២៦

ដោយ

ប្រមុខដឹកនាំរាជរដ្ឋាភិបាលកម្ពុជា សម្ដេចមហាបវរធិបតី ហ៊ុន ម៉ាណែត បានសម្រេចតែងតាំងសមាសភាពក្រុមការងារអន្តរក្រសួង ដើម្បីសិក្សាអំពីការគ្រប់គ្រង និងប្រើប្រាស់អាកាសយានដ្ឋានអន្តរជាតិភ្នំពេញ ខណៈរដ្ឋាភិបាលមានផែនការអភិវឌ្ឍព្រលានយន្តហោះនេះ ទៅជាសួនសាធារណៈ និងមួយផ្នែកបម្រុងទុកការចុះចតយន្តហោះពេលមានអាសន្ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមការងារអន្តរក្រសួងមានសមាសភាព ១៤ រូប ដឹកនាំដោយលោក ឈាង វណ្ណារិទ្ធិ រដ្ឋលេខាធិការ នៃទីស្ដីការគណៈរដ្ឋមន្ត្រី ជាប្រធាន និងអនុប្រធាន ២ រូប គឺលោក ជា អូន រដ្ឋលេខាធិការ នៃរដ្ឋលេខាធិការដ្ឋានអាកាសចរស៊ីវិល និងលោក ផាន់ ផល្លារ រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ ព្រមទាំងសមាជិក ១១ រូប។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍នៅក្នុងពិធីសម្ពោធអាកាសយានដ្ឋានអន្តរជាតិតេជោ នៅថ្ងៃទី ២០ ខែតុលា ឆ្នាំ ២០២៥នេះថា រាជរដ្ឋាភិបាលគ្មានគម្រោងលក់អាកាសយានដ្ឋានអន្តរជាតិភ្នំពេញនោះទេ ពោលគឺមានគោលការណ៍ចំនួន ២ គឺទី១ បម្រុងទុកសម្រាប់ការចុះចតយន្តហោះពេលមានអាសន្ន និងគ្រោងរៀបចំទៅជាសួនសាធារណៈ សម្រាប់ប្រជាពលរដ្ឋ។

សម្ដេច ហ៊ុន ម៉ាណែត បន្ថែមថា៖ «យើងកំពុងគិតគូថា ដាំដើមឈើមួយចំនួន កុំឱ្យប៉ះពាល់ផ្លូវហោះហើរ ហើយពេលទៅថ្ងៃមុខយើងអាចបើក ដាំដើមឈើរដើម្បីឱ្យបងប្អូនទៅលេង រត់កីឡា អីនៅនុង រៀបចំតាមស្រះៗ ស្រះមានស្រាប់ហើយ មិនបាច់ជីកស្រះលម្អទៀតទេ ព្រោះវាមានកន្លែងស្តុកទឹកស្រាប់ហើយ ប្រើវាទៅ»។

ដោយឡែក នៅខាងអាគារដែលមានស្រាប់ យើងអាចគិតគូសកម្មភាពសេដ្ឋកិច្ចពាណិជ្ជកម្មមួយចំនួន ដើម្បីយកចំណូលទៅថែទាំ ចិញ្ចឹមព្រលានយន្តហោះទាំងមូល តែមិនលក់ឱ្យឯកជនទេ។ កន្លែងខ្លះត្រូវរៀបចំជាសារមន្ទី ព្រោះព្រលានយន្តហោះអន្តរជាតិភ្នំពេញជា ព្រលានប្រវត្តិសាស្ត្រ តាំងពីស្នាមព្រហស្ដរបស់សម្ដេចតា។

អាកាសយានដ្ឋានអន្តរជាតិភ្នំពេញ ត្រូវបានកសាងឡើងនៅឆ្នាំ ១៩៥៤ លើផ្ទៃដី ៣៨៦ ហិកតា ស្ថិតនៅខណ្ឌពោធិ៍សែនជ័យ រាជធានីភ្នំពេញ៕