សម្តេច ហ៊ុន សែន៖ មិនយូរទេ​ព្រលានយន្តហោះ​ខេត្តសៀមរាប​នឹងបើកសម្ពោធទទួលយន្តហោះធំៗចូលចត

សម្តេចតេជោ ហ៊ុន សែន នាយករដ្ឋមន្រ្តីមានប្រសាន៍ថា នៅព្រលានយន្តហោះថ្មីមួយដែលកំពុងសាងសង់ ហើយមិនយូរប៉ុន្មានទេ ព្រលានយន្តហោះនេះ នឹងដាក់ឲ្យសម្ពោធប្រើប្រាស់ ដែលទទួលយន្តហោះធុនធំ មកពីចម្ងាយចុះចតនៅសៀមរាបតែម្តង។ សម្តេចមានប្រសាសន៍បែបនេះ នៅក្នុងពិធីសម្ពោធដាក់ដំណើរការជាផ្លូវការអគារជំងឺត្រចៀក ច្រមុះ បំពង់ក មិត្តភាពកម្ពុជា-កូរ៉េ ថ្ងៃទី២៨ ខែមីនា ឆ្នាំ២០២២។

សម្តេចបន្តដូច្នេះថា« ព្រលានយន្តហោះខេត្តសៀមរាបបច្ចុប្បន្ននេះ អាចចុះចតបានយន្តហោះប្រភេទធុនតូចប៉ុណ្ណោះ មិនអាចទទួលបានយន្តហោះធុនធំនោះទេ»។

អាកាសយានដ្ឋានថ្មីនេះ ស្ថិតក្នុងលំដាប់4E មានផ្លូវរត់ប្រវែង៣,៦០០ម៉ែត្រ ទទឹង ៤៥ម៉ែត្រ មាន៣៨ចំណតយន្តហោះ និងមានក្រឡាផ្ទៃស្ថានីយ អ្នកដំណើរជាង ៨ម៉ឺនម៉ែត្រក្រឡា ដែលអាចទទួលអ្នកដំណើរជាប្រចាំឆ្នាំប្រមាណជា ៧លាននាក់។ អាកាសយានដ្ឋានអន្តរជាតិខ្នាតដ៏ធំមួយនេះ ស្ថិតក្រោមកិច្ចព្រមព្រៀង គម្រោងវិនិយោគ BOT រយ:ពេល៥៥ឆ្នាំ ក្រោយពេលគម្រោងប្រតិបត្តិការនេះត្រូវបានបញ្ចប់ នឹងត្រូវប្រគល់ជូនរាជរដ្ឋាភិបាលកម្ពុជា។

អាកាសយានដ្ឋានអន្តរជាតិថ្មីនេះ គ្រោងនឹងបញ្ចប់នាពាក់កណ្តាលខែមីនា ឆ្នាំ២០២៣ខាងមុខ គឺមានរយ:ពេលសរុប ៣៦ខែ បើគិតចាប់ពីថ្ងៃបើកការដ្ឋាន ពាក់កណ្តាលខែ មីនា ឆ្នាំ២០២០។

អាកាសយានដ្ឋានថ្មីនៃទឹកដីខេត្តសៀមរាបនេះ គ្របដណ្តប់លើផ្ទៃដីទំហំ ៧០០ ហិកតា ស្ថិតនៅក្នុងឃុំតាយ៉ែក ស្រុកសូទ្រនិគម មានចម្ងាយប្រមាណជា៥១គីឡូមែត្រ ពីក្រុងសៀមរាប និងប្រហែលជា៤០គីឡូម៉ែត្រ ពីប្រាសាទអង្គវត្ត គ្រោងនឹងចំណាយថវិកាប្រមាណ៣,៥៦០លានដុល្លារអាមេរិក៕