ព័ត៌មានជាតិ
លោក មាន ទិដ្ឋភាព កែច្នៃសម្បកកង់កៅស៊ូចាស់ៗទៅជាវត្ថុមានតម្លៃលក់បានថ្លៃរាប់ពាន់ដុល្លារ
អតីតអ្នកគូរគំនូរ លោក មាន ទិដ្ឋភាព ប្រើប្រាស់សមត្ថភាពរបស់ខ្លួនជាង ២ឆ្នាំ កែច្នៃសម្បកកង់កៅស៊ូចាស់ៗ ដែលគេឈប់ប្រើប្រាស់ យកមកធ្វើជាវត្ថុសិល្ប:ផ្សេងៗដ៏គួរឲ្យទាក់ទាញ។ លោក មាន ទិដ្ឋភាព បានលើកឡើងថា ការកែច្នៃសម្បកកង់នេះ ក៏ជាផ្នែកមួយ ជួយសម្អាតដល់បរិស្ថានផងដែរ។ បរិស្ថានស្អាត គឺផ្តើមចេញពីយើងទាំងអស់គ្នា។ នេះជាការបញ្ជាក់របស់លោក ទិដ្ឋភាព។
ធ្លាប់ឆ្លងកាត់ជាអ្នកគូរគំនូរនៅផ្សាររាត្រីមាត់ទន្លេ លោក មាន ទិដ្ឋភាព គឺជាកូនអ្នកស្រុក សំរោងទង ខេត្តកំពង់ស្ពឺ បានចាប់ផ្តើមអាជីពកែច្នៃសម្បកកង់ និងកង់ម៉ូតូចាស់ៗ តាំងតែពីឆ្នាំ ២០២០ មក។ រយៈពេល ២ឆ្នាំមកនេះ លោកបានប្រមូលទិញ ឬរើសសម្បកកង់ម៉ូតូ និងសម្បកកង់ដែលគេបោះបង់ចោល ដើម្បីយកមកកែច្នៃធ្វើជាវត្ថុប្រើប្រាស់ និងមានតម្លៃឡើងវិញ។ លោកថា ចំណេះដឹងនេះ គឺទទួលបានពីការស្រាវជ្រាវតាមរយៈប្រព័ន្ធអនឡាញ។
ប្រែក្លាយពីអ្នកបិតសន្លឹកមាសនៅលើពុទ្ធបដិមា បុរសវ័យជាង ៣០ឆ្នាំរូបនេះ បានប្រាប់កម្ពុជាថ្មីថា ក្រោយពីបញ្ចប់មធ្យមសិក្សាទុតិយភូមិ លោកក៏បានចាប់ផ្តើមចេញ គូរគំនូរនៅតាមជញ្ជាំងវិហារ និងនៅតាមផ្សាររាត្រី។ មិនតែប៉ុណ្ណោះ លោកក៏ជាអ្នកសូន្យរូបផងដែរ។
ដោយសារតែចង់អភិវឌ្ឍខ្លួន និងមានគំនិតច្នៃប្រឌិតផងនោះ បុរសរូបនេះ បានចាប់ផ្តើមសាកល្បងដោយយកសម្បកកង់ម៉ូតូចាស់ៗ មកកែច្នៃចេញជាវត្ថុផ្សេងៗ។
សមិទ្ធផលដំបូង ដែលលោក ទិដ្ឋភាព ធ្វើគឺស្វាគីងកុង។ ជាបន្តបន្ទាប់ ដោយសារតែមានការគាំទ្រ លោកបានធ្វើចេញជាសមិទ្ធផលផ្សេងៗជាច្រើនទៀត មានដូចជា សត្វសេះ នាគ ក្រពើ គ្រុឌ និងមនុស្ស ជាដើម។ ចំពោះរយៈពេលនៃការធ្វើទម្រាំបានមួយៗ ប្រើពេលចន្លោះពី ១ខែ ទៅ៣ខែ។ នេះជាការបញ្ជាក់បន្ថែមរបស់លោក ទិត្យភាព។
សមិទ្ធផលដែលលោក ទិដ្ឋភាព ច្នៃចេញជារូបរាងនេះ ភាគច្រើនអតិថិជនទិញយកទៅដាក់តាំងនៅតាមរមនីយដ្ឋាននានា ក្នុងតម្លៃចន្លោះពី ៧០០ដុល្លារ ទៅ ២៥០០ដុល្លារ។
ចំពោះបច្ចេកទេសនៃការធ្វើ ដំបូងឡើយ លោក ទិដ្ឋភាពថា ត្រូវគូររូបជាមុនសិន ទើបយកដែកសរសៃមកពត់ឱ្យចេញជារូបរាង ហើយក៏ចាប់ផ្តើមច្រៀកសម្បកកង់យកទៅបិទភ្ជាប់លើដែកម្តងមួយបន្ទះៗ រហូតដល់ចេញជារូបរាងដែលចង់បាន។ បន្ទាប់មកទៀត ទើបលាបថ្នាំពណ៌ទៅតាមតម្រូវការ។
លោក ទិដ្ឋភាព បាននិយាយថា ”បើបានសំបកកង់ថ្មីយកមកធ្វើកាន់តែល្អ”។ សម្ភារ:ដែលត្រូវការសំខាន់ គឺមានតែសំបកកង់កៅស៊ូ និងដែកប៉ុណ្ណោះ សម្រាប់ធ្វើរូបភាពឡើង។ លោក មាន ទិដ្ឋភាព បានបន្តប្រាប់៖ ”សម្ភារ:សំបកកង់កៅស៊ូ គឺមានភាពងាយ ស្រួលក្នុងការរកទិញទេ អ្នកខ្លះក៏ឲ្យមកយើងទទេៗ ទៀតផង ជាពិសេសអ្នកទីក្រុង“។
អាជីវពនេះ បានផ្តល់ចំណូលដល់គ្រួសារលោក មាន ទិដ្ឋភាព ឱ្យមានជីវភាពល្អប្រសើរ។ លោក ទិដ្ឋភាព គូសបញ្ជាក់ថា លោកស្វាគមន៍ចំពោះអ្នកដែលចង់រៀន ឬចាប់អាជីពនេះ អាចមករៀនសូត្រ ក្រេបចំណេះដឹងពីលោកបាន លោកនឹងចែករំលែកចំណេះដឹងទាំងនេះ ដោយមិនមានការលាក់លៀម។ បច្ចុប្បន្នលោក មាន ទិដ្ឋភាព កំពុងបណ្តុះបណ្តាលសិស្សដែលចង់ចាប់អាជីពនេះផងដែរ៕
អត្ថបទ៖ នាង រតនៈ
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៦ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ