ពលរដ្ឋ​ប្រាប់ពី​អត្ថប្រយោជន៍​២បែប​របស់​ដើមស្អំ

នៅតាមរបងផ្ទះរបស់ប្រជាពលរដ្ឋរស់នៅតាមទីជនបទគេសង្កេតឃើញបងប្អូនប្រជាពលរដ្ឋនាំគ្នាដាំដើមស្អំសឹងគ្រប់ផ្ទះដោយពួកគាត់គិតថា ស្អំមានប្រយោជន៍ ២បែបគឺ អាចបេះយកទៅធ្វើម្ហូប និងធ្វើជារបងព្រំដីផង។

លោកតា ហម កប រស់នៅភូមិក្រាំងដៃ ឃុំធ្លក ស្រុកទ្រាំង ខេត្តតាកែវបានប្រាប់ថា ជាទម្លាប់របស់ប្រជាពលរដ្ឋរស់នៅជនបទភាគច្រើននាំគ្នាដាំដើមស្អំធ្វើជារបងហើយវាជាប្រការល្អនោះគឺបានបេះយកត្រួយយកមកស្លរ ឆា និងចៀនជាមួយពងទា មានរស់ជាតិឆ្ងុយឆ្ងាញ់។

លោកតា ហម កប បានបញ្ជាក់ទៀតថា ផ្ទះខ្លះនាំគ្នាបេះត្រួយស្អំយកទៅលក់នៅផ្សារហើយលក់ដាច់ទៀតផង។

បើងាកមកសង្កាត់ព្រែកថ្មី ខណ្ឌច្បារអំពៅរាជធានីភ្នំពេញឯណេះវិញគឺដូចជាប្រជាពលរដ្ឋរស់នៅខេត្តតាកែវដែលនិយមដាំដើមស្អំតាមរបងផ្ទះព្រោះងាយស្រួលដាំហើយមានផលប្រយោជន៍ណាស់។អ្នកដែលមានដើមស្អំច្រើនគេឃើញមានឈ្មួញចុះទៅទិញដល់ផ្ទះដោយមិនចាំបាច់ដឹកយកមកលក់នៅផ្សារ។

ក្នុងនោះលោក លីវ វណ្ណថេង ចៅសង្កាត់ព្រែកថ្មីបានប្រាប់កម្ពុជាថ្មីថា ក្នុងមូលដ្ឋានសង្កាត់ព្រែកថ្មី គឺប្រជាពលរដ្ឋ លោកតែងចាប់យករបរកសិកម្ម ច្រើនជាងរកសុី។ ហើយបើនិយាយពីដើមស្អំវិញ គឺបងប្អូនប្រជាពលរដ្ឋលោកនាំគ្នាដាំធ្វើជារបងពិតប្រាកដមែន។ ក្រៅពីធ្វើជារបងក៏ជាបន្លែមួយដែលប្រជាពលរដ្ឋយើងចូលចិត្តណាស់។ ដូច្នេះបន្លែស្អំគឺពេញនិយមសម្រាប់ប្រជាពលរដ្ឋកម្ពុជាយើង៕

អត្ថបទ៖ នរា