៥០ឆ្នាំក្រោយអស់ជីវិត ម្ចាស់ស្នាដៃ​លែងមានសិទ្ធិ​គ្រប់គ្រងសមិទ្ធផល​របស់ខ្លួន

ប្រទេសកម្ពុជា បានកំណត់ថា ស្នាដៃណាក៏ដោយ មានតម្លៃត្រឹមមួយជីវិតនៃអ្នកនិពន្ធ បួកថែម ៥០ឆ្នាំ ក្រោយពីនេះទៅ នឹងក្លាយជារបស់សាធារណៈ។

លោកជំទាវ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ មានប្រសាសន៍នៅក្នុងកិច្ចសម្ភាសន៍កម្មវិធី Grow Under Peace របស់កម្ពុជាថ្មីថា ស្នាដៃណាក៏ដោយ ឧទាហរណ៍ ដូចជា ស្នាដៃអក្សរសាស្រ្ត ឬអក្សរសិល្ប៍ មានតម្លៃត្រឹមមួយជីវិតនៃអ្នកនិពន្ធ បួកថែម ៥០ឆ្នាំទៀតប៉ុណ្ណោះ ក្រោយពីនោះទៅ ស្នាដៃទាំងអស់ នឹងក្លាយរបស់សាធារណៈ។

លោកជំទាវ បានបន្ថែមដូច្នេះថា « នៅកម្ពុជា អ្វីដែលគ្មានមរតកសាស្រ្ត គឺជាកម្មសិទ្ធិរបស់រដ្ឋ ដែលមានក្រសួងវប្បធម៌​ជាសេនាធិការ ប្រសិនបើអ្នកណាយកមរតកដើមទៅប្រើប្រាស់ ឬកាឡៃ ដោយមិនបានឆ្លងការអនុញ្ញាត ក្រសួងមាន​សិទ្ធិប្តឹង ឬណែនាំ»។

ជាក់ស្តែងលោកជំទាវរដ្ឋមន្រ្តី បានថ្លែងពាក់ព័ន្ធមរតករបស់លោក ស៊ីន ស៊ីសាមុត ដូច្នេះថា« លោក ស៊ីន ស៊ីសាមុត គាត់មិនបានធ្វើមរតកសាស្រ្ត ដោយសារ បាត់បង់ជីវិតនៅក្នុងរបប ប៉ុល ពត ដូច្នេះកម្មសិទ្ធិរបស់គាត់ ត្រូវបានគ្រប់គ្រង​ដោយក្រសួងវប្បធម៌ ប៉ុន្តែប្រសិនបើគ្រួសាររបស់គាត់ ចង់សុំកម្មសិទ្ធិមរតករបស់លោក ស៊ីន ស៊ីសាមុត យកទៅគ្រប់​គ្រង ត្រូវបង្ហាញភស្តុតាងឯកសារគ្រប់គ្រាន់ ក្រសួងនឹងពិចារណាប្រគល់សិទ្ធិមួយចំនួនជូនទៅសាច់ញាត់គាត់(ស៊ីន ស៊ីសាមុន) វិញ»។

ប៉ុន្តែទោះជាសិទ្ធិនេះ នៅក្នុងការគ្រប់គ្រងរបស់ក្រសួង ឬក្រុមគ្រួសារក្តី ក៏សិទ្ធិនេះ មានសុពលភាពត្រឹមតែមួយ​អាយុកាល​របស់អ្នកនិពន្ធ បួករួម ៥០ឆ្នាំបន្ថែម បន្ទាប់ពីនេះទៅ នឹងក្លាយជាស្នាដៃសាធារណៈ។

រាល់ស្នាដៃដែលផុតអាយុកាល បានកំណត់នេះ សាធារណជនអាចយកទៅប្រើប្រាស់បាន ដោយមិនមានការហាមឃាត់ ឬខុសច្បាប់នោះទេ ប៉ុន្តែបើយកទៅកាឡៃខុសមរតកដើម គឺខុសសិទ្ធិសីលធម៌ទៅវិញ ពោលគឺត្រូវតែថែរក្សា​សិទ្ធិសីល​ធម៌ជូនម្ចាស់ដើម។ នេះបើតាមការបញ្ជាក់របស់រដ្ឋមន្រ្តីក្រសួងវប្បធម៌៕ ទួន សុផល