គំនរ​សំរាម​កើតឡើង​ជា​ថ្មី​ក្រោយ​បុរី​​កុមារកំព្រា ក្រោយ​ស្អាត​បាន​មួយ​រយៈ

គំនរ​សំរាម​បានកើតឡើងជា​ថ្មី​ម្តង​ទៀត តាមបណ្តោយផ្លូវដដែលៗនៅក្រោយ​បុរីកុមារកំព្រា ក្នុង​សង្កាត់ចំការ​សំរោង ក្រុង​បាត់ដំបង ក្រោយអាជ្ញាធរ​ចាត់វិធានការ​ចុះទៅ​​សម្អាត​មាន​សោភណភាព​បាន​មួយ​រយៈ​ខ្លី។

អ្នកធ្វើដំណើរគ្រវី​ក្បាល ក្រោយ​មើលឃើញ​សំរាម​ត្រូវ​បាន​បោះចោល​ដោយគ្មានការយកចិត្តទុកដាក់ ហើយ​ទាំង​អាជ្ញាធរសង្កាត់និងក្រុង និង​ក្រុមហ៊ុនអនាម័យបណ្តោយ​ឲ្យ​សំរាម​គរ​តាំងពីតិចតូចរហូតកើតឡើងយ៉ាងសម្បើមនៅតាមដងផ្លូវសាធារណះក្នុងក្រុងបាត់ដំបង ដែលជាទីក្រុងល្បីខាងបរិស្ថានស្អាត។

ប្រជាពលរដ្ឋម្នាក់បានលើកឡើងថា “ឃើញទិដ្ឋភាពបែបនេះវាហាក់មិនល្អមើលទាល់តែសោះ វាប្រៀបដូចជាសួនផ្កាអមតាមដងផ្លូវ ជាមួយក្លិន​ស្អុយបែរជាអាជ្ញាធរមូលដ្ឋានមើលមិនឃើញ ខណះដែលវាបានកើតឡើងនៅទីតាំងដដែលៗបង្កឲ្យ​មហាជនរិះគន់គ្រប់ៗគ្នាទាំង​ពួកខ្ញុំនិងអ្នកដំណើរផ្សេងទៀត”។

កាលពី​ប៉ុន្មាន​ខែ​មុននេះ កម្ពុជាថ្មី​​បានផ្សព្វ​ផ្សាយ​​ក្រោយ​ប្រជាពលរដ្ឋរស់នៅ​​លើ​ផ្លូវ​បេតុងក្រោយបុរីកុមារកំព្រា ក្នុង​សង្កាត់ចំការ​សំរោង ក្រុង​បាត់ដំបង បានរអ៊ួររទាំ​បញ្ហាក្លិន​ស្អុយចេញពីគំនរ​កាកសំណល់ចម្រុះជាច្រើនកន្លែង បង្កើតបានជាសំបុកសត្វមួសបង្កឲ្យមនុស្សចាស់ក្មេងប៉ះពាល់ដល់​សុខភាព​កើត​ជា​ជំងឺ​គ្រុនឈាមឬគ្រុនចាញ់ជាដើម។

គំនរ​សម្រាម​ដែលកើត​ជាថ្មី​ឡើង​វិញ​នេះ ក៏បានរាយការណ៍ជូនលោកអភិបាលខេត្តឲ្យបានជ្រាបជាមុនផងដែរ ដើម្បីជាប្រយោជន៍ដល់លោកអភិបាល​បានដាស់តឿន​ដល់មន្ត្រីក្រោមឱវាទ​ដោះស្រាយសម្អាតឲ្យបានទាន់ពេល ស្របពេលរដូវទឹកភ្លៀងកាន់តែធ្លាក់ជោគជាំបង្កឲ្យមានក្លិនស្អុយ បង្ក​ជាសំបុកសត្វមួស រុយ ចម្លងមេរោគ និងរោគគ្រុនឈាមដល់កុមារតូចៗក៏ដូចជាមនុស្សចាស់។

បើតាមអ្នកភូមិបានប្រាប់ថា ផ្លូវ១ខ្សែដែលជាសំបុកសំរាម​និងកាកសំណល់បានកើតឡើងនៅ​ទីតាំង​ដដែលៗ ដែល​ស្ថិត​ក្នុងសង្កាត់ ចំការសំរោង ក្រុងបាត់ដំបង នៅក្រោយបុរីកុមារកំព្រា។

ក្រុម​ប្រជាពលរដ្ឋ​បន្តថា “ខ្ញុំមិនដាក់កំហុសទៅលើអាជ្ញាធរ ឬខាងជំនាញណាមួយទេ ព្រោះអ្នកបោះចោលដែលគ្មានគំនិតក៏មានកំហុសដែរ។ តែខុសត្រង់ថា បើកន្លែងនឹងវាតែងកើតឡើងចឹងដដែលៗគួរអាជ្ញាធរឬខាងជំនាញព្យាយាមមកត្រួតពិនិត្យ និងតាមឃ្លាំមើលយ៉ាងហោចមួយអាទិត្យម្តង ដើម្បីរកមុខឲ្យឃើញអ្នកដែលយកមកបោះចោល ដើម្បីផាកពិន័យ។ ពេលខ្លះពួកខ្ញុំគិតថា មានអ្នកពីចម្ងាយក៏បានដឹកយក កាកសំណល់មក បោះចោលនៅទីកន្លែងនឹងផងដែរមិនមែនត្រឹមអ្នកភូមិមួយចំនួននោះទេ”។

ជាមួយគ្នានេះ ក្រុមប្រជាពលរដ្ឋក៏​សំណូមពរឲ្យអាជ្ញាធរបំពាក់អំពូលភ្លើងតាមដងផ្លូវឲ្យបានភ្លឺងាយស្រួលធ្វើដំណើរនៅ ពេលយប់ពិសេសសុវត្តិភាពចំពោះក្មេងតូចៗជិះកង់។ ម្យ៉ាងទៀត ក៏អាច​មើលឃើញអ្នកដែលដឹកយកសំរាមឬកាកសំណល់​មកបោះចោល ដែល​ងាយស្រួល​រាយការណ៍ដល់អាជ្ញាធរចាត់ការ​បាន​ទាន់ពេល​វេលា៕

អត្ថបទ៖ សៅ សារិទ្ធ