សម្ដេចតេជោ ហ៊ុន សែន ៖ អាស៊ាន កំពុងធ្វើការយ៉ាងស្វិតស្វាញ ដើម្បីបញ្ចប់ក្រមប្រតិបត្តិនៅសមុទ្រចិនខាងត្បូង (COC)

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ ២០២២នេះ បានឲ្យដឹងថា ប្រទេសជាសមាជិកអាស៊ាន បាននិងកំពុងធ្វើការយ៉ាងយកចិត្តទុកដាក់ ដើម្បីបញ្ចប់ក្រមប្រតិបត្តិនៅសមុទ្រចិនខាងត្បូង (COC) ខណៈឆ្នាំ ២០២២នេះ គឺជាខួបទី ២០ឆ្នាំ នៃសេចក្ដីថ្លែងការណ៍ ស្ដីពី ការប្រតិបត្តិរបស់បណ្ដាភាគីនៅសមុទ្រចិនខាងត្បូង (DOC)។

សម្តេចតេជោ ហ៊ុន សែន បានថ្លែងក្នុងពិធីបើកកិច្ចប្រជុំ រដ្ឋមន្ត្រីការបរទេសអាស៊ានលើកទី ៥៥ និងកិច្ចប្រជុំពាក់ព័ន្ធ នៅព្រឹកថ្ងៃទី ៣ ខែសីហានេះថា នៅក្នុងឆ្នាំ ២០២២នេះ គឺជាខួបទី ២០ឆ្នាំ នៃសេចក្ដីថ្លែងការណ៍ ស្ដីពី ការប្រតិបត្តិរបស់បណ្ដាភាគីនៅសមុទ្រចិនខាងត្បូង (DOC) ដែលជាឯកសារដ៏សំខាន់ក្នុងការគ្រប់គ្រងទំនាក់ទំនង រវាងគ្រប់ភាគីពាក់ព័ន្ធទាំងអស់នៅសមុទ្រចិនខាងត្បូង។

សម្ដេចតេជោ ហ៊ុន សែន បានថ្លែងបញ្ជកា់ថា «យើងក៏បាននិងកំពុងធ្វើការយ៉ាងស្វិតស្វាញផងដែរ ដើម្បីបញ្ចប់ក្រមប្រតិបត្តិនៅសមុទ្រចិនខាងត្បូង (COC) ដែលប្រកបដោយអត្ថន័យ និងប្រសិទ្ធភាព ដោយអនុលោមតាមច្បាប់អន្តរជាតិ ដូចជា អនុសញ្ញាសហប្រជាជាតិ ស្ដីពី ច្បាប់សមុទ្រ (UNCLOS) ផងដែរ»៕