មេឃុំក្បាលរមាស​ឱ្យប្រជាពលរដ្ឋ​ប្រុងប្រយ័ត្នចំពោះជំងឺ​ឆ្លង​ពេលទឹកស្រក​ចុះបន្តិច

​ក្រោយពីទឹកទន្លេសេសាន​ និងទន្លេស្រែពកស្រកចុះបន្តិចវិញ​អាជ្ញាធរឃុំក្បាលរមាស​ស្រុកសេសាន​ខេត្ត​ស្ទឹងត្រែងអំពាវនាវឱ្យប្រជាពលរដ្ឋបង្កើនការប្រុងប្រយ័ត្នការពារមូសដែកគោលមូសខ្លាខាំជាពិសេស​កូន​ចៅ​តូចៗ ចំពោះជំងឺគ្រុនឈាម គ្រុនចាញ់ និងជំងឺឆ្លងផ្សេងៗទៀត។

​លោក ប៉ែន សុបុល មេឃុំក្បាលរមាសបានបញ្ជាក់ថា៖ បងប្អូនប្រជាពលរដ្ឋដែលរងផលប៉ះពាល់​ពី​ទឹកជំនន់ត្រូវអនុវត្តតាមការណែនាំរបស់មន្ត្រីសុខាភិបាលដើម្បីថែរក្សាសុខភាពឱ្យបានល្អដើម្បីការ​ពារជំងឺគ្រុមឈាម ឬគ្រុនចាញ់ព្រោះពេលទឹកស្រកចុះបន្តិចសម្បូរទៅដោយពពួកម៉ូសខ្លា និង​មូស​ដែកគោលខាំ។

លោកបន្តថា៖ បញ្ហានេះបងប្អូនប្រជាពលរដ្ឋនៅតាមចំនុចគោលដៅ​ដែលកំពុងរង​បញ្ហាប្រឈម​ពីទឹកជំនន់នេះ ត្រូវនាំគ្នាសម្អាតបរិស្ថាននៅពេលទឹកស្រក ដើម្បីឱ្យការចូល​រួមអនុវត្តវិធាន​ការសុ​ខាភិបាល​ឱ្យមានប្រសិទ្ធភាពខ្ពស់ និងធ្វើឱ្យកូន​ចៅយើងចៀសវាងបានពីជំងឺឈឺថ្កាត់។

លោកបន្តថា៖ មួយវិញទៀតពេលមានជំងឺចូលបងប្អូនរួសរាន់ទៅមណ្ឌល​សុខភាពពិគ្រោះ​ជាមួយ​គ្រូពេទ្យ និងឱ្យកូនចៅពាក់ខោអាវវែង និងត្រូវដេកក្នុងមុងជ្រលក់ថ្នាំការពារកុំឲ្យមូសខាំនិង​ហាមកូន​ចៅទៅលេងទឹកផ្តេសផ្តាស់។

​លោកស្រី ថាន់ ដាលី តំណាងឱ្យប្រជាពលរដ្ឋភូមិក្របីជ្រុំស្នើទៅគ្រូពេទ្យស្ម័គ្រចិត្តភូមិសូមផ្តល់ថ្នាំអាបែតសម្រាប់ដាក់ក្នុងទឹកពាង ធុង សម្រាប់សម្លាប់ដង្កូវទឹក និងថ្នាំខ្ល សម្រាប់ដាក់ទឹកសម្លាប់មេ​រោគ​ផងដើម្បីរួមចំណែកនិងលើកកម្ពស់អនាម័យ​សុខភាពឱ្យបានកាន់តែល្អប្រសើរ។

លោកវេជ្ជបណ្ឌិត ទន វុទ្ធី អនុប្រធានមន្ទីសុខាភិបាលខេត្តបានបញ្ជាក់ថា ប្រការនេះលោកបានណែនាំទៅមន្ត្រីគ្រប់មណ្ឌលសុខភាពឱ្យចុះពិនិត្យ និងផ្តល់ថ្នាំប្រភេទនេះជូនទៅប្រជាពលរដ្ឋតាមមូលដ្ឋានឱ្យបានឆាប់។

លោកវេជ្ជបណ្ឌិតបានបង្ហាញថា៖ ជាមួយគ្នានេះបើបងប្អូនមានកូនចៅឈឺគ្រុនមានអាការក្តៅ​ខ្លួន​ខ្លាំង មានកំដៅចាប់ពី៣៩ទៅ៤០អង្សា ប្រើថ្នាំត្រជាក់មិនត្រជាក់ក្នុងរយៈពេលចាប់ពី២ថ្ងៃឡើងក្នុង​ស្ថានភាពមុខឡើងក្រហម ឬមានសញ្ញាព៌ណក្រហមលើស្បែកសូមប្រញាប់រុះរាន់មក​មណ្ឌល​សុខភាព ឬមន្ទីរពេទ្យបង្អែក ជួបគ្រូពេទ្យជាបន្ទាន់៕

អត្ថបទ៖ ងិនលីម