ក្រុមហ៊ុន ប៊ូយ៉ុង ចុះអនុស្សរណៈជាមួយរដ្ឋបាលរាជធានី និងឧបត្ថម្ភរថយន្តក្រុង ២០០ គ្រឿង

ប្រធានក្រុមប្រឹក្សាភិបាល ក្រុមហ៊ុន ប៊ូយ៉ុង គ្រុប (BOOYOUNG GROUP) លោកបណ្ឌិត LEE JOONG KEUN បានឧបត្ថម្ភ និងចូលរួមធ្វើកិច្ចការមនុស្សធម៌ជាច្រើននៅក្នុងប្រទេសកម្ពុជា ក្នុងនោះ ក្រុមហ៊ុន ក៏បានចូលរួមលើកស្ទួយសេដ្ឋកិច្ចជាតិរបស់កម្ពុជា ស្របពេលសេដ្ឋកិច្ចរបស់កម្ពុជាមានលំនឹង និងរីកចម្រើនក្រោមការដឹកនាំរបស់ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

លោកបណ្ឌិត LEE JOONG KEUN បានបញ្ជាក់ថា ដោយមើលឃើញពីទស្សនវិស័យ និងសកម្មភាពមនុស្សធម៌ ​ដ៏ល្អប្រពៃ ក្រុមហ៊ុន ប៊ូយ៉ុងគ្រុប (BOOYOUNG GROUP) បានចាប់អារម្មណ៍ និងមានទឹកចិត្តចូលរួមសកម្មភាពមនុស្សធម៌ជាមួយ រដ្ឋបាលរាជធានីភ្នំពេញ ដើម្បីជួយសម្រួលដល់ការធ្វើដំណើរប្រជាពលរដ្ឋនៅរាជធានីភ្នំពេញ តាមរយៈការឧបត្តម្ភរថយន្តក្រុង ប្រភេទថ្មី ចំនួន ២០០ គ្រឿង​ ជូនរដ្ឋបាលរាជធានីភ្នំពេញ​ ដើម្បីបម្រើសេវាថយន្តក្រុងសាធារណៈរបស់រាជធានីភ្នំពេញ នៃព្រះរាជាណាចក្រកម្ពុជា។

លោក ឃួង ស្រេង អភិបាល នៃគណៈអភិបាលរាធានីភ្នំពេញ បានលើកឡើងថា ការចុះ​អនុស្សរណៈយោគយល់គ្នា (MOU) គឺបានបង្ហាញនូវការគាំទ្រ និងចូលរួមសកម្មភាពមនុស្សធម៌ជាមួយរដ្ឋបាលរាជធានីភ្នំពេញ ដែលមានបេសកកម្មនៅក្នុងការបម្រើសេវាថយន្តក្រុងសាធារណៈរបស់រាជធានីភ្នំពេញ ជូនប្រជាពលរដ្ឋ។

លោក ឃួង ស្រេង បានបញ្ជាក់ថា បច្ចុប្បន្ន រាជធានីភ្នំពេញ មានការកក់ស្ទះចរាចណ៍យ៉ាងខ្លាំង ដូច្នេះដើម្បីសម្រួលដល់ការធ្វើដំណើរ និងបញ្ជៀសការកកស្ទះចរារណ៍ និងបង្កើនជម្រើក្នុងការធ្វើដំណើររបស់ប្រជាពលរដ្ឋក្នុងរាជធានីភ្នំពេញ ប្រជាពលរដ្ឋអាចជ្រើសរើសមធ្យោបាយធ្វើដំណើរតាមរយៈសេវាថយន្តក្រុងសាធារណៈ។

លោក ឃួង ស្រេង បានថ្លែងអំណរគុណ ក្រុមហ៊ុន ប៊ូយ៉ុងគ្រុប (BOOYOUNG GROUP) ដែលមានទំនុកចិត្តនៅក្នុងការបណ្ដាក់ទុនវិនិយោគនៅក្នុងប្រទេសកម្ពុជា ហើយបានចូលរួមចំណែកផ្ដល់នូវអត្ថប្រយោជន៍ផ្នែកសេដ្ឋកិច្ច និងសង្គមជាច្រើនសម្រាប់ប្រជាជនកម្ពុជា។

គួរបញ្ជាក់ថា រដ្ឋបាលរាជធានីភ្នំពេញ និង ក្រុមហ៊ុន ប៊ូយ៉ុងគ្រុប បានចុះអនុស្សរណៈយោគយល់គ្នា (MOU) ដើម្បីគាំទ្រ និងធ្វើសកម្មភាពមនុស្សធម៌ ដោយក្រុមហ៊ុន ប៊ូយ៉ុងគ្រុប និងឧបត្តម្ភរថយន្តក្រុង ប្រភេទថ្មី ចំនួន ២០០ គ្រឿង ជូនរដ្ឋបាលរាជធានីភ្នំពេញ។ ពិធីនេះបានរៀបចំធ្វើឡើងនៅសាលារាធានីភ្នំពេញ ថ្ងៃទី០១ ខែកញ្ញា ឆ្នាំ២០២២ ក្រោមវត្តមាន លោក ឃួង ស្រេង អភិបាល នៃគណៈអភិបាលរាធានីភ្នំពេញ និងលោកបណ្ឌិត LEE JOONG KEUN ប្រធានក្រុមប្រឹក្សាភិបាលក្រុមហ៊ុន ប៊ូយ៉ុងគ្រុប (BOOYOUNG GROUP)៕

អត្ថបទ៖ ស្រីរ័ត្ន