ព័ត៌មានជាតិ

ក្រសួងនឹងចាត់វិធានការច្បាប់ ចំពោះការផ្សព្វផ្សាយពាណិជ្ជកម្ម ដែលមានលក្ខណៈភូតកុហក

បានផុស

៣ years មុន

នៅ

ថ្ងៃព្រហស្បតិ៍ ៨ កញ្ញា ២០២២

ដោយ

ក្រសួងពាណិជ្ជកម្មនឹងចាត់វិធានការច្បាប់ចំពោះការផ្សព្វផ្សាយពាណិជ្ជកម្ម ដែលមានលក្ខណៈភូតកុហក បំភាន់ការពិត ឬធ្វើឱ្យច្រឡំ ពិសេសការធ្វើឱ្យប៉ះពាល់ដល់សុខភាពអ្នកប្រើប្រាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្ដីប្រកាសព័ត៌មានរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ -ក.ប.ប.” នៃក្រសួងពាណិជ្ជកម្មចុះថ្ងៃទី០៨កញ្ញានេះបានអោយដឹងថា ក្នុងរយៈពេលកន្លងមកនេះ អគ្គនាយកដ្ឋាន ក.ប.ប. សង្កេតឃើញមានសកម្មភាពនិងខ្លឹមសារផ្សព្វផ្សាយពាណិជ្ជកម្មពាក់ព័ន្ធនឹងផលិតផលទំនិញ នឹងសេវាមួយចំនួននៅតែបន្តកើតមានជាយថាហេតុ ដែលការផ្សព្វផ្សាយនោះបានធ្វើឡើងតាមគ្រប់ទម្រង់នៃការ ផ្សាយពាណិជ្ជកម្ម មានដូចជាតាមរយៈទូរទស្សន៍ វិទ្យុ ផ្ទាំងប៉ាណូ និងបណ្ដាញសង្គមនានា មានលក្ខណៈភូត កុហក បំភាន់ការពិត និងអាចធ្វើឱ្យអ្នកប្រើប្រាស់មានការយល់ច្រឡំ អំពីការទទួលបាននូវអត្ថប្រយោជន៍ផ្សេងៗ ហើយជាពិសេសនោះអាចធ្វើឲ្យប៉ះពាល់ដល់សុខភាពរបស់ពួកគាត់ផងដែរ។

អគ្គនាយកដ្ឋាន ក.ប.បបានបន្តងាសកម្មភាពនិងខ្លឹមសារនៃការផ្សព្វផ្សាយ ពាណិជ្ជកម្មបែបនេះ បានធ្វើឲ្យខាតបង់ផលប្រយោជន៍អ្នកប្រើប្រាស់ ប៉ះពាល់ដល់ដំណើរការប្រកួតប្រជែងប្រកបដោយ សុចរិត និងកាត់បន្ថយប្រសិទ្ធភាពសេដ្ឋកិច្ច ដែលត្រូវហាមឃាត់ដោយច្បាប់ និងបទប្បញ្ញត្តិជាធរមាន ជាពិសេសនោះ គឺច្បាប់ស្ដីពីកិច្ចការពារអ្នកប្រើប្រាស់។

អគ្គនាយកដ្ឋាន ក.ប.បបានបន្តទៀតថាដើម្បីទប់ស្កាត់នូវការប្រព្រឹត្តល្មើសពាក់ព័ន្ធនឹងការផ្សព្វផ្សាយពាណិជ្ជកម្ម ព្រមទាំងលើកទឹកចិត្តដល់ការធ្វើ ធុរកិច្ចប្រកបដោយសុចរិតភាព ការប្រកួតប្រជែងប្រកបដោយសមធម៌ និងការការពារផលប្រយោជន៍អ្នកប្រើប្រាស់ អគ្គនាយកដ្ឋាន ក.ប.បសូមក្រើនរំលឹកដល់លោក លោកស្រី ដែល ជាបុគ្គលផ្សាយពាណិជ្ជកម្ម ឬបុគ្គលទទួលសិទ្ធិឱ្យចាត់ចែងផ្សាយពាណិជ្ជកម្ម ត្រូវបានត្រឹមត្រូវតាមខ្លឹមសារ នៃច្បាប់ និងឯកសារគតិយុត្តជាធរមាន។

អគ្គនាយកដ្ឋាន ក.ប.បបាននញ្ជាក់ថា ឈរលើមូលដ្ឋាននេះ សុំឱ្យ លោក លោកស្រី ដែលជាបុគ្គលផ្សាយពាណិជ្ជកម្ម ឬបុគ្គលទទួលសិទ្ធិឲ្យចាត់ចែងផ្សាយពាណិជ្ជកម្ម ធ្វើការកែសម្រួល សកម្មភាពនិងខ្លឹមសារផ្សព្វផ្សាយពាណិជ្ជកម្មរបស់ខ្លួនឱ្យស្របតាមខ្លឹមសារនៃច្បាប់ និងបទប្បញ្ញត្តិ ក្នុងរយៈពេល ៣០(សាមសិប)ថ្ងៃ បន្ទាប់ពីថ្ងៃចេញសេចក្តីជូនដំណឹងនេះ។ អគ្គនាយកដ្ឋាន ក.ប.បបានបន្ថែមទៀតថាក្នុងករណីរកឃើញថា បុគ្គលណាមួយបានប្រព្រឹត្តល្មើស ហើយមិនបានកែតម្រូវសកម្មភាព និងខ្លឹមសារផ្សព្វផ្សាយ ពាណិជ្ជកម្មរបស់ខ្លួន ក្នុងរយៈពេលកំណត់ខាងលើ ជាធរមាន។ អគ្គនាយកដ្ឋាន ក.ប.ប. និងចាត់វិធានការតាមច្បាប់ និងបទប្បញ្ញត្តិ។

អគ្គនាយកដ្ឋាន ក.ប.ប. នៃក្រសួងពាណិជ្ជកម្មសង្ឃឹមជឿជាក់យ៉ាងមុតមាំលើកិច្ចសហការពីគ្រប់ភាគីពាក់ព័ន្ធ ក្នុងការជំរុញការអនុវត្តច្បាប់ និងលិខិតបទដ្ឋានគតិយុត្តិនាពេទ្យមានប្រសិទ្ធភាព ដើម្បីផលប្រយោជន៍អ្នកប្រើប្រាស់និងសង្គមជាតិទាំងមូល៕

ដោយ ៖ សំអឿន